Fréttir

Frambjóðandi Sjálfstæðisflokksins vill ekki að „duglega fólkið“ haldi uppi sjúklingum sem keppast við að vera veikir

Viðar Guðjohnsen, sem býður sig fram í oddvitasæti Sjálfstæðisflokksins fyrir borgarstjórnarkosningarnar, vill ekki borga fyrir „klessufeitt fólk“ eða „annarra manna börn“ og telur að veikir fíkniefnaneytendur eigi að mæta örlögum sínum óstuddir.

Viðar Guðjohnsen Vill að sjúkir fíkniefnaneytendur mæti örlögum sínum óstuddir. Mynd: Sjálfstæðisflokkurinn

„Vitið þið ekki að það er mannfjölgunarvandamál hérna?“ segir Viðar Guðjohnsen, frambjóðandi í oddvitasæti Sjálfstæðisflokksins í Reykjavík fyrir borgarstjórnarkosningarnar, sem vill að hætt verði að styðja sjúka fíkniefnanotendur, sérstaklega þá sem eru erlendir að uppruna. Hann vill skera niður í félagsþjónustu Reykjavíkurborgar með því að hætta þjónustu við þá sem verst eru haldnir.

Viðar, sem er einn af fimm frambjóðendum sem gefa kost á sér í leiðtogaprófkjöri Sjálstæðisflokksins í Reykjavík fyrir komandi borgarstjórnarkosningar, kynnti skoðanir sínar í þættinum Harmageddon á útvarpsstöðinni X-inu 977 fyrr í dag

Ekki eigi að halda lífi í fólki

Viðar segir að útigangsmenn og fíkniefnaneytendur eigi ekki að fá neina hjálp. Spurður hvað eigi að gera fyrir þá segir hann: „Ekkert. Þeir ákváðu sjálfir að vilja tortíma sjálfum sér. Á ég allt í einu að taka þátt í því að vekja þá til lífsins? Vitið þið ekki að það er mannfjölgunarvandamál hérna? Það vantar ekki að halda lífi í fólki sem vill ekki lifa.“

Þekkt er að tengsl eru milli geðsjúkdóma og misnotkun vímuefna. Þannig er því gjarnan haldið fram að án sálrænna vandamála sé ólíklegt að misnotkun vímuefna eigi sér stað. 

Reykjavíkurborg rekur gistiskýlið sem er neyðarnæturathvarf fyrir heimilislausa karlmenn með lögheimili í Reykjavík. „Öðrum er þó ekki vísað frá nema hvert rúm sé skipað,“ segir á vef borgarinnar. 

„Þeir vilja gera alla að aumingjum.“

Viðar vill úthýsa erlendum mönnum í fíknivanda sem leita ásjár. „Þessir jafnaðarmenn, þessi illmenni, vil ég nú oft kalla, vegna þess að þeir eru svo hugsunarlausir, þeir vilja gera alla að aumingjum. Og það á að halda utan um alla. Og það á að vera svo góður við alla og helst á að ná í sjúklinga erlendis frá. Og vitum það, hvernig þetta er í skýlinu hérna, niðri í bæ, að það er orðið allt fullt af útlendingum. Rónum frá útlöndum.“ 

Duglegir haldi ekki uppi sjúkum

Viðar heldur því fram að útlendir útigangsmenn hugsi sér gott til glóðarinnar: „Ryksugum úr þeim sem er duglegur!“ segir Viðar. 

Viðar hefur áður látið til sín taka í starfi Sjálfstæðisflokksins. Hann segist vera harður hægrimaður og telur að sumir þeirra, sem eru veikir, keppist við það og eigi að mæta örlögum sínum óstuddir. 

„Ég myndi láta þá sem eru fyrir, og eru alvöru veikir, ekki þá sem eru að keppast við að vera veikir, ég myndi búa til hvatakerfi, að það yrði tekið meiri ábyrgð á því hvað þú setur upp í munninn á þér. Hvað þú dópar. Vegna þess að þetta er komið út í óáran, að láta einhvern annan, sem er duglegur, sem vinnur, píparann eða smiðinn, hann á allt í einu að fara að halda uppi einhverju fólki.“

Þá lýsir hann því að feitir eigi að taka ábyrgð á þeim heilbrigðisvandamálum sem þeir mæta. „Einstaklingurinn á að taka ábyrgð. Ekki að búa til einhverjar stofnanir og einhver kerfi og fundarhöld um það hvernig á að finna einhver lyf til að leysa undirhökuvandamál eða of breiðar mjaðmir eða klessufeitt fólk.“ 

Vill hækka laun karla í skólum

Þá er Viðar andsnúinn því að skattfé renni til menntunar ungs fólks. „Þetta liggur í skólum. Og hver á að borga skólagjöldin? Jú, skattborgarinn! Sá duglegi.“

Þá telur hann undarlegt að 30 prósent drengja geti ekki lesið sér til gagns og tengir það við að 83 prósent kennara í grunnskólum séu konur. Hann vill hækka laun karlmanna í skólunum. „Við verðum að bjóða í þá. Þeir eru greinilega eftirsótt vara í grunnskóla. Því við getum ekki alltaf látið konurnar ráða yfir öllu. Þetta er orðið vandamál. Konurnar, femínisminn, hann vill búa til stofnanir sem ala upp börnin. Ég segi, ef þið getið ekki haft efni á því að eiga börn, eða hafið ekki tíma eða metnað, þá eigið þið bara ekkert að eiga börn. Því ég vil ekki borga fyrir annarra manna börn.“

 

Athugasemdir

Allar athugasemdir eru ábyrgð á þeirra sem þær skrifa. Stundin áskilur sér rétt til að fjarlægja ærumeiðandi og óviðeigandi athugasemdir.

Mest lesið í dag

Pistill

Sannleikurinn um Viðar Guðjohnsen

Fréttir

Húsleit á Arnarnesinu hjá fiskútflytjanda úr Panamaskjölunum: „Ég hef ekkert að fela“

Viðtal

Dýralæknirinn sem keypti kaupfélag

Pistill

Katrín: Mas, mas, mas í heila mínútu

Úttekt

Ótrúlegur ráðherraferill Sigríðar Andersen: Lögbrot, leyndarhyggja og harka gagnvart hælisleitendum

Fréttir

Listi Roberts yfir stúlkur er enn til - lögregla hefji aftur rannsókn á kynferðisbrotum hans

Mest lesið í vikunni

Pistill

Sannleikurinn um Viðar Guðjohnsen

Fréttir

Húsleit á Arnarnesinu hjá fiskútflytjanda úr Panamaskjölunum: „Ég hef ekkert að fela“

Fréttir

Skýrsla Hannesar rituð á ensku – „Ótækt“ segir formaður íslenskrar málnefndar

Viðtal

Dýralæknirinn sem keypti kaupfélag

Pistill

Katrín: Mas, mas, mas í heila mínútu

Fréttir

Barnafjölskylda svipt framfærslufé vegna reglugerðar Sigríðar um útlendinga