„Þið megið kjósa um þetta en við ætlum ekki að taka mark á niðurstöðunni
ef hún er okkur ekki þóknanleg“

Þetta er inntakið í nýlegum yfirlýsingum og skilaboðum bæjarstjóra Reykjanesbæjar til okkar bæjarbúa vegna  íbúakosningar um kísilmálverksmiðju Thorsil í Helguvík.  Þarna er bæjarstjórinn að beita ákveðinni taktík sem ætlað er að draga úr áhuga og vilja bæjarbúa til að taka þátt í kosningunni.

Bæjarstjórinn er væntanlega að tala fyrir hönd núverandi meirihluta bæjarstjórnar, sem talsmaður bæjarfélagsins.  Ef þetta er viðhorfið til lýðræðisins getur þetta fólk alveg sleppt því að tala um íbúalýðræði og beina aðkomu bæjarbúa að stærri ákvörðunum, þegar þau fara á atkvæðaveiðar í lok kjörtímabilsins. Kjósendur munu hvort eð er ekki taka mark á þeim. Ekki frekar en þau á lýðræðislegum íbúakosningum.

Hvernig sem þessi kosning verður – hvort sem þátttakan verður lítil eða mikil og hver sem niðurstaðan verður, þá standa þessar yfirlýsingar eftir sem vitnisburður um yfirgengilegan valdhroka og ótrúlegt virðingarleysi gagnvart lýðræðinu. Það hlýtur að vera leitun að öðru eins, að minnsta kosti hér á landi. Líklega þarf maður að fara all leið niður til Afríku til að finna eitthvað sambærilegt. Reykjanesbær er Zimbabwe norðursins