Pistill

Vandi Landspítala, vandi okkar allra

Hjúkrunarfræðingur sem starfar á bráðamóttöku Landspítalans í Fossvogi segir að mönnunarvandinn í heilbrigðiskerfinu sé raunveruleg ógn. „Ég hef aldrei verið eins hrædd og núna.“

Fyrir um tveimur árum fór að bera á innlagnarvanda spítalans og Bráðamóttakan fékk það erfiða hlutverk að sinna innlögðum sjúklingum sem ekki komust á deildir. Innlagnarvandi sjúkrahússins hefur hingað til verið útskýrður sem fráflæðisvandi, þ.e. gamalt fólk kemst ekki á öldrunarstofnanir og dvelur óþarflega lengi á legudeildum. Það er vissulega rétt en það sem sjaldan kemur fram í fjölmiðlum er að á spítalanum er búið að loka 20-30 plássum vegna þess að ekki fást hjúkrunarfræðingar til starfa. Það er ekki hægt að leggja sjúklinga inn á undirmannaðar deildar. Þessir 20-30 sjúklingar sem komast ekki í þessi lokuðu pláss þurfa því að liggja á Bráðamóttöku. Oft í gluggalausum rýmum, oft á gangi þar sem ekki er hægt að slökkva ljós á nóttinni, fá ekki viðeigandi læknismeðferð, hjúkrun og þjónustu, oftast gamalt fólk. Rannsóknir hafa sýnt að sjúklingum sem dvelja lengur en 4-6 tíma á Bráðamóttöku farnist verr og dánartíðni þeirra eykst.  

Á Bráðamóttöku eru 35 stæði fyrir bráðveika og slasaða. Þegar ástandið er "eins og það á að vera" eigum við fullt í fangi með að sinna því sem við eigum að sinna. Þjóðin er að eldast, ferðamönnum er að fjölga og heilsugæslan annar ekki sínu. Nú með 20-30 legudeildarsjúklinga til viðbótar við skjólstæðinga Bráðamóttöku ætti öllum að vera ljóst að dæmið gengur ekki upp. Hver einasti dagur er bókstaflega baráttta upp á líf og dauða hjá okkur. Vaktstjórinn, reyndur hjúkrunarfræðingur sem stýrir flæðinu um deildina, þarf að finna upp hjólið oft á hverri vakt til að troða inn fleiri og fleiri sjúklingum í rúm sem eru ekki til. Starfsfólkið verður bara að hlaupa hraðar. Fárveikt fólk þarf að sitja á eldhússtólum tímunum saman því við eigum ekki fleiri bekki. Ástandið er ömurlegt og ofan á það fáum við stóru slysin. Við erum aðframkomin. 

Í vor var tilkynnt að loka eigi Hjartagáttinni í heilan mánuð, skjólstæðingar hennar eiga að leita á Bráðamóttöku. Þar bætast við að meðaltali 15 manns til viðbótar á deildina okkar hverju sinni, flestir þeirra þurfa að vera tengdir við hjartasírita og dæmist þá að aðra skjólstæðinga að liggja á ganginum. Og svo má ekki gleyma endurlífgunum sem hafa hingað til farið á Hjartagáttina. Gáttinni er lokað vegna þess að ekki fást hjúkrunarfræðingar til að leysa af í sumarleyfi. Við bætast hefðbundnar sumarlokanir legudeilda og mannekla í heimahjúkrun. Þetta árið mun fíknigeðdeildin loka í sjö vikur vegna skorts á hjúkrunarfræðingum, já, sjö vikur. Skjólstæðingar hennar fá jú þjónustu á hinum geðdeildinum sem eru reyndar yfirfullar, en þetta hlýtur að reddast. Ríkið toppar þetta svo með því að endurnýja ekki samninga við Karítas, heimahjúkrun krabbameinsveikra, ætli þeirra skjólstæðingar eigi ekki bara líka að fara á Bráðamóttökuna. 

Við erum að missa stjórn á aðstæðum. Við ráðum ekki við verkefnið og við getum ekki ábyrgst öryggi skjólstæðinga okkar öllum stundum. Þetta er staðan í dag og það hræðir mig meira en nokkru sinni fyrr. En virðist enginn ráðamaður hlusta á neyðarkall heilbrigðisstarfsmanna. Nú er hundruð ómannaðar vaktir hjúkrunarfræðinga á Bráðamóttöku í sumar. Þetta er ekkert að fara að reddast.

„Við ráðum ekki við verkefnið og við getum ekki ábyrgst öryggi skjólstæðinga okkar öllum stundum. Þetta er staðan í dag og það hræðir mig meira en nokkru sinni fyrr“

Samnefnarinn í öllum þessum dæmum er sá sami. Skortur á hjúkrunarfræðingum. Öldrunarstofnanir geta ekki tekið við vegna hjúkrunarfræðingaskorts, ekki legudeildarnar heldur. Hjartagáttin lokar vegna sama vanda. Sumarlokanir legudeilda, flugþjónarnir hjúkrunarmenntaðir... hvar endar þetta? Það eru hundruð hjúkrunarfræðinga sem hafa tekið þá ákvörðun að láta ekki bjóða sér þessar vinnuaðstæður. Það eru hundruð í viðbót sem hafa í huga að segja upp og snúa sér að öðru. 

Og hvað er til ráða? Ég hef rætt við tugi kollega minna og það sem við viljum er virðing og hærri laun. Þetta er ekki flókið. Virðinguna má endurheimta með því að leysa okkur undar niðurlægjandi Gerðardómi. Það er eitt ár eftir að þeirri ánauð. Og við viljum fá greitt fyrir vinnuna okkar, menntun, ábyrgð og reynslu. Stjórnvöld verða að fara að gera sér grein fyrir því að rekstur heilbrigðiskerfisins er í eðli sínu rándýr en er þó besta fjárfesting sem ríkið getur gert. Fjárfesting í heilbrigði og velferð þegna sinna. Þetta er vilji þjóðarinnar, sama hvaða flokk fólk kýs. 

Mannauðurinn er ómetanlegur og á sérhæfðum deildum Landspítala eins og gjörgæslu og Bráðamóttöku tekur um tvö ár að verða fullhæfur í starfi hjúkrunarfræðings. Ég hef starfað á Landspítala í 22 ár og oft hefur mér ekki staðið á sama um ástandið en ég hef aldrei verið eins hrædd og núna. Nú eru Alþingismenn farnir í sumarfrí. Farnir út í sumarið að grilla, „livva og njódda“. Sumir hverjir grunlausir um hættuna sem ógnar þjóðarsjúkrahúsi Íslendinga, aðrir vel meðvitaðir og líta björtum augum til yfirvofandi einkavæðingar heilbrigðisþjónustunnar sama hvað það kostar. Landspítali má engan tíma missa. Landspítalinn er í frjálsu falli.

Athugasemdir

Allar athugasemdir eru ábyrgð á þeirra sem þær skrifa. Stundin áskilur sér rétt til að fjarlægja ærumeiðandi og óviðeigandi athugasemdir.

Mest lesið í dag

Fréttir

Sósíalistar vilja afnema greiðslur slökkviliðsins til borgarstjóra

Fréttir

Bróðir Hauks handtekinn fyrir að flagga tyrkneska fánanum á Stjórnarráðshúsinu

Blogg

Hættum að bregðast Hauki

Blogg

Píp Trumps um viðskipahalla og fleira

Úttekt

Laun íslenskra bæjarstjóra hærri en í erlendum stórborgum

Pistill

Að búa í glerhúsi

Mest lesið í vikunni

Pistill

Hjúkrunarfræðingur: „Landspítalinn er í frjálsu falli“

Fréttir

Bankastjóri Landsbankans þiggur boðsferð á heimsmeistaramótið í Rússlandi

Fréttir

Hagnaður ISS dróst saman en hluthafar fengu 760 milljóna arð

Pistill

Krakkafréttir - hin raunverulega ógn mannkyns?

Fréttir

Sósíalistar vilja afnema greiðslur slökkviliðsins til borgarstjóra

Úttekt

Einkavæðingin í heilbrigðiskerfinu: 20 ára saga í máli og myndum