Sex þingmenn ganga inn á bar.

Hljómar næstum eins og byrjun á brandara. Nema að í brandaranum þá væru þetta þrír þingmenn og einn þeirra frá Hafnarfirði, svo gleymið því.

Sex ríkisstarfsmenn settust á klausturbar á vinnutíma og byrjuðu að baktala samstarfsfólk sitt. Klúrt orðbragð eins og húrrandi klikkaðar hórur, helvítis tíkur og ýmislegt fékk að fljúga, aðallega í átt að kvenkyns vinnufélögum en samt var líka skotið á letingja, fatlað fólk, samkynhneigða og eflaust fleiri. Einn þeirra játaði á sig alvarlegt brot sem fullt tilefni er til að rannsaka, þegar hann viðurkenndi að hann hefði ráðið mann í sendiherrastöðu á vafasömum forsendum, ráðið frænda sinn í leiðinni til að rugla fólk í ríminu, en að hann hefði aðallega gert það til að eiga inni sendiherrastöðu í framtíðinni.

Það má færa góð rök fyrir því að þetta sé brot gegn almennum hegningarlögum. Það er a.m.k. fullt tilefni til að rannsaka málið. Hér er góður pistill um málið, en eins og kemur fram í honum segir utanríkisráðherrann fyrrverandi Gunnar Bragi:

„Ég átti fund með Bjarna [Benediktsson] í fjármálaráðuneytinu. Ég sagði við Bjarna: „Það er algjörlega sjálfsagt. Auðvitað geri ég Geir að sendiherra.“ Og ég sagði við hann: „Og mér finnst sanngjarnt að þið horfið til svipaðra hluta þegar ég þarf á því að halda.“

Sigmundur Davíð, drykkjufélagi Gunnars Braga, og fyrrum forsætisráðherra staðfestir orð hans:

„… Niðurstaðan var sú að Bjarni féllst á það að ef þetta gengi eftir, þá ætti Gunnar inni hjá Sjálfstæðismönnum.“

Þarna eru menn að nýta sér aðstöðu sína og skipa menn í mikilvæg embætti án þess að litið sé til hæfni. GB hefur nú sagt í fjölmiðlum að hann telji sig geta orðið góðan sendiherra, en það verður að teljast hæpið. Ætli það verði ekki að teljast mikilvægur eiginleiki hjá sendiherra að hafa stjórn á drykkju sinni og baktala ekki samstarfsfólk sitt? En þetta setur ráðningu Árna Þórs og Geir Haarde í alveg nýtt ljós. Er Geir Haarde stætt að vera núna fulltrúi okkar við alþjóðabankann, og Árna Þór að vera áfram sendiherra?

En kannski er mest aðkallandi spurningin hvort þessir þingmenn geti setið áfram eftir þetta. Það er eiginlega ekki hægt að bjóða samstarfsfólki þeirra upp á það. Og ef samstarfsfólk þeirra lætur bjóða sér upp á það er vandséð að það sjálft eigi erindi inni á þingi. Besta sem klausturmenn geta gert er sennilega að finna sér annað hvort nýja vinnu eða setjast í helgan stein. Það er líka skýrasta merkið sem þeir gætu gefið um iðrun, sem er frumforsenda fyrirgefningar.

Orðatiltækið að setjast í helgan stein má rekja til þess þegar menn gengu í klaustur á efri árum eftir langa vinnuævi. Sennilega getum við þakkað mörgum öldungum sem settust í helgan stein að við höfum Íslendingasögurnar í dag, en ætla má að stór hluti þeirra hafi verið skrifaður af nunnum og munkum. Ekki voru samt allir munkar í jafnháfleygum þönkum og þeir sem helguðu sig bókmenntum, frægt er t.d. þegar Möðruvallaklaustur brann þegar hópur munka kom drukkinn heima af fyllerí á Gásum og fóru óvarlega með ljós.

Það er allavega ljóst að þetta er ekki fyrsta fyllerí Íslandssögunnar til að draga á eftir sér dilka.  Munkarnir sem kveiktu í Möðruvallaklaustri í ölæði lifðu það aldrei að sjá það aftur endurbyggt. Mögulega mun sagan verða svipuð um Miðflokkinn. A.m.k. er útlit fyrir fjölmenn mótmæli á morgun sem krefjast afsagnar þingmannanna sex á morgun. Ætli nokkur fulltrúi frá þeim flokki muni þora að mæta á opinn dag í þinghúsinu?

E.S.

Ef siðanefnd kemur saman til að ræða mál sexmenningana, þá er kjörið tækifæri fyrir hana til að taka fyrir erindi Björn Levís um hvernig eigi að bregðast við óhóflegum akstursgreiðslum þingmanna og grunsemdum um fjárdrátt.