Bragi Guðbrandsson, forstjóri Barnaverndarstofu, taldi ótrúverðugt að barn hefði „viðurkennt“ samkvæmt skýrslu listmeðferðarfræðings að faðir hefði brotið gegn því. 

Hann sagði orðalagið einkennilegt og benda til þess að „gengið hefði verið á eftir þessum upplýsingum hjá barninu“.

Sjónarmið Braga birtist í fundargerð um fund sem var haldinn að hans frumkvæði þann 20. janúar 2017 og snerist um barnaverndarmálið í Hafnarfirði sem Stundin hefur fjallað um. Barnaverndarstofa afhenti Stundinni og RÚV fundargerðina fyrr í vikunni.

Fram kemur að í lok fundarins hafi verið „rætt almennt um að þegar foreldrar deili hart um umgengni þá geti það leitt til þess að ljótar ásakanir komi fram sem eigi ekki við rök að styðjast“. 

Mynd: Barnaverndarstofa

Þegar fundurinn var haldinn hafði Barnaverndarnefnd Hafnarfjarðar sent lögreglunni á höfuðborgarsvæðinu tilkynningu vegna vísbendinga um kynferðisbrot og lögreglan brugðist hratt við með bréfi, aðeins þremur dögum síðar, um að embættið hygðist bíða eftir niðurstöðum könnunarviðtals í Barnahúsi. Tilvísunin sem var send þangað lá óhreyfð í pósthólfi Barnahúss í mánuð auk þess sem tölvupóstkerfi stofnunarinnar bilaði á sama tíma. Þar var málið statt þegar Bragi Guðbrandsson skipti sér af störfum Barnaverndarnefndar Hafnarfjarðar og beitti sér fyrir umgengni stúlknanna við föðurfjölskylduna.

Undanfarna daga hefur Bragi hafnað því að afskipti hans af barnaverndarmálinu hafi tengst umgengni föðurins við dætur sínar en eins og Stundin hefur rakið stangast sá málflutningur á við gögn málsins og skráningu samskiptanna. Hér má sjá frumgögn um afskipti Braga, en velferðarráðuneytið komst að þeirri niðurstöðu að með þeim hefði Bragi farið út fyrir starfssvið sitt. 

Fundargerðin sem Barnaverndarstofa hefur afhent sýnir að Bragi hélt áfram að hafa áhrif á framgang umrædds barnaverndarmáls eftir að tilvísunarbréfið var móttekið. Það var á ráðgjafarfundi hjá Barnaverndarstofu, en samkvæmt minnisblaði Braga um málið var það „samhljóða niðurstaða fundarins“ að ekki yrði tekið könnunarviðtal við aðra stúlkuna þótt lögregla hefði tilkynnt um beðið væri eftir niðurstöðu slíks könnunarviðtals. 

Í upphafi fundarins ræddi Bragi um að starfsmenn barnaverndarnefnda þyrftu að gæta þess að „stíga ekki inn í deilur milli foreldra um umgengni“. Vísar hann þá væntanlega til þess að Barnaverndarnefnd Hafnarfjarðar hafði ráðlagt móðurinni að halda stúlkunum í „öruggu skjóli“ meðan meint kynferðisbrot föður væru könnuð. Hafði föðurfjölskyldan gagnrýnt þá ráðgjöf harðlega og fengið Braga til að beita sér fyrir umgengni.

Fram kemur í fundargerðinni að teknar hefðu verið „tvennar skýrslutökur af stúlkunni að beiðni lögreglu“, en hátt í tvö ár voru liðin síðan þessar skýrslur höfðu verið teknar. Samkvæmt minnisblaði Braga um málið var talið að það gæti gengið gegn hagsmunum barnsins að fara aftur í könnunarviðtal.

Á fundinum var vikið að tilkynningu listmeðferðarfræðings og áhyggna hans af meintum kynferðisbrotum. „Að mati BG [Braga Guðbrandssonar] var það mjög einkennilegt orðalag í tilkynningu þar sem sagt var að barnið viðurkenndi að faðir hefði brotið gegn því. Orðalag tilkynningarinnar þótti benda til þess að gengið hefði verið á eftir þessum upplýsingum hjá barninu.“

„Að mati BG var það mjög einkennilegt orðalag
í tilkynningu þar sem sagt var að barnið viðurkenndi að faðir hefði brotið gegn því“

Samkvæmt skjali frá 21. febrúar 2017 komst forstöðumaður Barnahúss skömmu síðar að þeirri niðurstöðu að listmeðferðarfræðingurinn hefði ekki gert sekur um neitt slíkt. Í minnisblaði frá Barnaverndarnefnd Hafnarfjarðar er fjallað um símtal sem starfsmaður átti við Ólöfu Ástu Farestveit, forstöðumann Barnahúss. Fram kemur fram að hún hafi rætt við listmeðferðarfræðinginn og farið yfir það með honum hvernig upplýsingarnar komu fram. „Hún sagði að það væri ljóst að upplýsingarnar hefðu komið fram í frjálsri frásögn.“ Auk þess er greint frá því að listmeðferðarfræðingurinn sé með mikla og góða reynslu, m.a. af barna- og unglingageðdeild Landspítalans, og sé meðvituð um að spyrja ekki leiðandi spurninga. 

Eins og lögmaður föðurins í málinu benti á í samtali við Stundina í gær er listmeðferðarfræðingum almennt ekki ætlað það hlutverk að rannsaka grun um meint kynferðisbrot. Þrátt fyrir þetta ákvað Barnahús að verða ekki við þeirri beiðni Barnaverndarnefndar Hafnarfjarðar að meint kynferðisbrot yrðu rannsökuð og önnur eða báðar stúlkurnar teknar í könnunarviðtal. Í staðinn var ákveðið að þær yrðu áfram hjá listmeðferðarfræðingnum.  Þar héldu áfram að koma fram „sterkar vísbendingar um kynferðislega misnotkun föður“ sem barnaverndarnefndin hafði áhyggjur af. Hvergi í þeim gögnum sem Stundin hefur komist yfir, hvort sem heldur formlega frá Barnaverndarstofu eða eftir óformlegum leiðum, kemur fram að lögreglu hafi verið tilkynnt um þá ákvörðun Barnahúss að verða ekki við beiðni barnaverndarnefndarinnar um könnunarviðtal. 

Uppfært kl. 16:30:
Ólöf Ásta Farestveit hafði samband og sagðist telja ummælin rangt höfð eftir. „Í símtalinu var ekki verið að meta trúverðugleika frásagnar barnsins hjá listmeðferðarfræðingi heldur upplýsa barnavernd Hafnarfjarðar hvað viðkomandi listmeðferarfræðingur hefði sagt undirritaðri,“ segir Ólöf. „Eins og fram kemur ef barnið færi að tala um kynferðisbrot hefði undirrituð að sjálfsögðu óskað eftir því að málið yrði kært á nýjan leik til lögreglu og það er hlutverk barnaverndar Hafnarfjarðar að aðhafast um slíkt.  Undirrituð taldi vinnu listmeðferðarfræðings faglega með tilliti til úrvinnslu tilfinninga en ekkert mat var gert á trúverðugleika upplýsinganna.“