Páll Magnússon, þingmaður Sjálfstæðisflokksins og fyrrverandi útvarpsstjóri, gagnrýnir fyrrverandi samstarfsfólk sitt á RÚV harðlega fyrir að greiða Guðmundi Spartakusi Ómarssyni 2,5 milljónir króna í miskabætur og málskostnað vegna málshöfðunar Guðmundar á hendur RÚV. Á móti kemur að RÚV mun ekki leiðrétta fréttaflutning sinn eða biðjast afsökunar á honum og ummælin ekki dæmd ómerkt. 

„Er RÚV að borga peninga til að þurfa ekki að biðjast afsökunar? Kaupa sig frá því að leiðrétta frétt?“ spyr Páll á Facebook-síðu sinni. Þá segir hann prinsippið ekki flókið. „Ef fréttin er rétt þá stendurðu við hana - málaferli eða ekki. Ef hún er röng þá leiðréttirðu hana og biðst afsökunar,“ skrifar Páll. 

Guðmundur Spartakus stefndi fjórum fréttamönnum RÚV fyrir meiðyrði vegna fréttaflutnings af fíkniefnasmygli í Brasilíu og Paragvæ. Ríkisútvarpinu ásamt fréttamönnunum Jóhanni Hlíðari Harðarsyni, Rakel Þorbergsdóttur fréttastjóra, Pálma Jónassyni og Hjálmari Friðrikssyni var stefnt vegna alls 28 ummæla sem féllu í útvarpsfréttum og á vef Ríkisútvarpsins í janúar og maí 2016. Krafðist Guðmundur alls tíu milljóna króna í miskabætur vegna fréttanna og að ummælin yrðu ómerkt. 

„Ef fréttin er rétt þá stendurðu við hana - málaferli eða ekki. Ef hún er röng þá leiðréttirðu hana og biðst afsökunar.“

Önnur fyrirtaka átti að vera í málinu á morgun, 27. september, en lögmaður Guðmundar Spartakusar, Vilhjálmur H. Vilhjálmsson, sendi frá sér yfirlýsingu vegna málsins í gær. Þar kom fram að Guðmundur og Ríkisútvarpið hafi komist að samkomulagi um málalok vegna málshöfðunar Guðmundar á hendur Ríkisútvarpinu og nánar tilgreindum fréttamönnum í desember 2016. „Samkomulagið felur í sér að Guðmundur fær greiddan málskostnað og miskabætur, en telst að öðru leyti trúnaðarmál,“ sagði í yfirlýsingu Vilhjálms. 

Þá greindi Vísir frá því í gær að upphæðin sem RÚV greiðir Guðmundi Spartakusi væri samtals 2,5 milljónir króna. Margrét Magnúsdóttir, skrifstofustjóri RÚV, hafði áður sagt að upphæðin væri trúnaðarmál en eftir að Vísir skaut málinu til úrskurðarnefndar um upplýsingamál var fyrirspurninni svarað. 

Sigmundur Ernir sýknaður í sambærilegu máli

Guðmundur Spartakus stefndi sömuleiðis Sigmundi Erni Rúnarssyni vegna sambærilegra frétta sem birtust á Hringbraut á síðasta ári. Í báðum tilfellum, það er að segja í fréttum RÚV og Hringbrautar, var vitnað í paragvæska frétttamiðilinn ABC Color, sem var sá fyrsti til að birta fréttir sem tengdu Guðmund Spartakus við vafasöm viðskipti þar í landi. 

Hugsi yfir málalokum RÚVSigmundur Ernir Rúnarsson segist hugsi yfir þessum málalokum. „Sérstaklega fyrir hönd þeirra sem sitja svo í súpunni, blaðamanna og fréttamanna á minni miðlum sem hafa ekki bolmagn til þess að greiða út sama fjármagn og stærsti fjölmiðill landsins.“

Mynd: Kristinn Magnússon

Sigmundur Ernir var sýknaður í Héraðsdómi Reykjavíkur í apríl síðastliðnum. Í dómsorði Héraðsdóms segir meðal annars: „Með umfjöllun sinni tók stefndi ekki sérstaka afstöðu til sannleiksgildis fréttanna. Með hliðsjón af því að hinar umdeildu staðhæfingar byggðu á frásögn annarra fjölmiðla, telur dómurinn, eins og atvikum er háttað í máli þessu, að ekki sé unnt að leggja þá skyldu á stefnda eða gagnrýna hann fyrir að grennslast ekki sérstaklega fyrir um sannleika hinna umdeildu staðhæfinga. Er ekki unnt að slá því föstu að stefndi hafi vitað að ummælin væru ósönn eða borin út opinberlega gegn betri vitund. Þegar alls þessa er gætt verður ekki talið að stefndi hafi með umfjöllun sinni vegið svo að æru stefnanda að það hafi farið út fyrir mörk leyfilegrar tjáningar [...]“

„Menn semja sig sjaldan frá málum þar sem þeir telja sig hafa rétt fyrir sér.“

„Ég er dálítið hugsi yfir þessari leið Ríkisútvarpsins,“ segir Sigmundur Ernir í samtali við Stundina. „Sérstaklega fyrir hönd þeirra sem sitja svo í súpunni, blaðamanna og fréttamanna á minni miðlum sem hafa ekki bolmagn til þess að greiða út sama fjármagn og stærsti fjölmiðill landsins sem fær marga milljarða úr ríkissjóði. Það situr svolítið í manni. Þessi mikli aðstöðumunur sem er á milli lítilla og frjálsra fjölmiðla og síðan Ríkisútvarpsins þegar kemur að því að semja sig frá hugsanlegum málalokum.“

Sigmundur segir þessi málalok vera ígildi viðurkenningar á sekt. „Menn semja sig sjaldan frá málum þar sem þeir telja sig hafa rétt fyrir sér,“ segir hann. 

Guðmundur Spartakus áfrýjaði í málinu gegn Sigmundi Erni og verður það tekið fyrir í Hæstarétti á næstu misserum. Að sögn Sigmundar hefur ekki verið reynt að gera viðlíka samninga við hann og í máli RÚV. 

Yfirheyrður vegna hvarfs Friðriks Kristjánssonar

Nafn Guðmundar Spartakusar kom fyrir í ítarlegri umfjöllun Stundarinnar um hvarf Friðriks Kristjánssonar 1. desember síðastliðinn, en þar kemur fram að lögregluyfirvöld á Íslandi höfðu í rúm þrjú ár reynt að ná tali af Guðmundi vegna leitarinnar af Friðriki, en án árangurs. Það var ekki fyrr en í október á síðasta ári að lögreglan náði loksins tali af Guðmundi þegar hann birtist óvænt á landinu. „Samkvæmt heimildum Stundarinnar var Guðmundur handtekinn og færður til yfirheyrslu vegna hvarfs Friðriks en þetta var í fyrsta skipti sem lögreglan á Íslandi náði að ræða við Guðmund frá því Friðrik hvarf árið 2013. Ekki er vitað hvað Guðmundur sagði við lögreglu en honum var sleppt að lokinni yfirheyrslu,“ segir meðal annars í umfjöllun Stundarinnar frá því í desember. Þess má geta að ekki fékkst samband við Guðmund vegna þeirrar umfjöllunar.

Guðmundur Spartakus stefndi hins vegar blaðamanni Stundarinnar, Atla Má Gylfasyni, vegna umfjöllunarinnar og ummæla sem hann lét falla í tengslum við málið.