Gauti Þeyr Másson – betur þekktur sem rapparinn Emmsjé Gauti – mætir í viðtalið í bleikum jakka, eign ljósmyndarans Sögu Sig. Við ræðum litinn og merkingu hans í samhengi við kynjatvíhyggju, fordóma og eitraða karlmennsku. Hann er öruggur í sínu, elskar litinn og ekki vanur að verða fyrir aðkasti. Hálftíma eftir viðtalið fær blaðamaður skilaboð frá honum; „Random móment í tengslum við bleika jakkann, er á Mathöll Höfða og sirka fimmtugur verkamaður spurði mig hvort ég væri kona og hló svo að mér“ segir hann og bætir við að það stingi hann ekki persónulega, en þarna sé þetta týpíska karlmennskudæmi. 

„Týpískur hvítur, miðstéttarlistamaður, faðir sem býr í Vesturbænum og rekur hamborgarastað“

Gauti gengur mikið í bleiku þessa dagana, sem skírskotun í nýju plötuna hans, Bleikt ský, sem kemur út 11. júlí. Hann segir nafnið tilkomið af hamingjunni; hann svífi um á bleiku skýi, en hann sé flughræddur. Undirliggjandi er óttinn um geldingu hamingjunnar á listinni og ímyndinni. Hann lifði á árum áður fyrir aðdáendurna, lífsstílinn, senuna, djammið og stelpurnar. Síðan þá hefur líf hans umturnast og runnið í form hins heilsteypta og reglusama föður í venjulegri vísitölufjölskyldu. Spurningar vakna um hvort maður þurfi að þjást fyrir listina eða hægt sé að lifa þægilegu miðstéttarlífi með fjölskyldunni á daginn og lifa rappstjörnulífi á kvöldin.