Harðorð yfirlýsing um Ísland er ein birtingarmynd breyttrar utanríkisstefnu Kínverja. Harðlínumenn innan Kommúnistaflokksins virðast hafa náð undirtökunum og reka sífellt harðari stefnu jafnt innanlands sem utan. Kínversk stjórnvöld ógna nágrönnum sínum, hafna allri gagnrýni vegna mannréttindabrota og ætla sér að kollvarpa núverandi skipulagi alþjóðamála að mati sérfræðinga.

Í júlí á þessu ári verða liðin 100 ár frá stofnun kínverska Kommúnistaflokksins. Stofnmeðlimir voru aðeins um fimmtíu talsins og hittust í gömlu og hrörlegu húsi í Sjanghæ. Innan við þremur áratugum síðar var þessi félagsskapur búinn að sölsa undir sig öll völd í þessu fjölmennasta ríki heims, reka burt innrásarlið Japana og stofna kommúnistastjórn byltingarleiðtogans Mao Zedong. 

Til að skilja stöðu Kommúnistaflokksins í kínversku samfélagi, bæði þá og nú, er nauðsynlegt að átta sig á því sem á undan hafði gengið. Kínverjar tala um tímabilið frá 1839 til 1949 sem ‘Öld niðurlægingarinnar’ og líta á það sem eitt sorglegasta tímabil þessarar mörg …