Garðar heillaðist ungur af hernum og er einn af fáum Íslendingum sem hafa farið í liðsforingjanám, kannski vegna þess að faðir hans var í ameríska hernum upp úr 1950. Hann hefur átt heldur óvenjulegt lífshlaup þar sem hann hefur starfað á framandi slóðum við framandi aðstæður og upplifað margt sem minnir helst á bíómynd.

Garðar er sonur Elínar Hansdóttur og Garðars Forberg flugvirkja, fæddur á Íslandi en alinn upp í Lúxemborg frá nokkurra mánaða aldri, með tveggja ára viðkomu í Bandaríkjunum, áður en leiðin lá aftur til Íslands í Verslunarskólann og þaðan til Þýskalands í liðsforingjanám.

Þegar Garðar var í Verslunarskólanum að velta því fyrir sér hvað hann ætti að gera í framtíðinni fannst honum liðsforingjanámið spennandi, kannski vegna herreynslu föðurins. Líka vegna þess að aðeins örfáir Íslendingar fara í slíkt nám og hann ímyndaði sér að eftir námið myndi hann starfa við eitthvað tengt varnarmálum á Íslandi hjá utanríkisráðuneytinu. …