Þessi færsla er meira en 8 ára gömul.
Ertu með hausinn upp í „****gatinu á þér“?
„Vona að þetta fólk geti rifið hausinn út úr rassgatinu á sér bara þennan eina dag."
Þessi huggulegu skilaboð eru frá borgarfulltrúanum Guðfinnu J. Guðmundsdóttur. Hún myndi aldrei tala svona niðrandi um flugvöllinn, enda sérlegur vinur flugavallarins. Ósátt fólk ... ekki svo mikill vinur þeirra.
Sumum þykir ósvífið að mótmæla á 17.júní. Eins og það sé óíslenskt. Ég er ekki viss um að Jón Sigurðsson myndi setja sig á móti því og ég skil ekki hvað það er sem gerir þennan dag svona heilagan frá því að fólk mótmæli þegar það telur sig undir oki valdníðslu og hræðilega vondra ákvarðanna.
Lýðræði er ekkert upp á punt til að draga upp á fjögurra ára fresti. Það er í gildi alla daga, alltaf.
Í fyrra var tekinn upp sá (ó)siður að meina almenningi aðgengi að ræðuhöldum og fjallkonunni. Svæðið var girt af og eingöngu útvöldum boðið upp á að mæta. Núna þurfa fjölmiðlamenn að sækja um sérstakt leyfi til að komast á hátíðarsvæðið.
Er það hátíðleikinn sem ykkur er svo umhugað um að raska ekki?
Börnin, sem svo mörgum er umhugað um að geti hámað í sig candyfloss, ráfað á milli hoppukastala og grátið söltum tárum rándýrar blöðrur sem svífa til himins verður ekkert meint af.
Það er meðal annars vegna þeirra sem foreldrar þeirra, afar og ömmur, frænkur og frændur vilja mótmæla. Þessi sem eru börn í dag verða nefnilega væntanlega einn daginn hjúkrunarfræðingar, dýralæknar, verksmiðjustarfsmenn og því miður munu einhver þeirra verða öryrkjar.
Öll (flest) verðum við gömul og viljum síður lepja dauðann úr skel krumpuð og félagslega einangruð vegna ómegðar.
Þessi borgarfulltrúi kemur svo sem ekkert á óvart með taktlausu tali sínu. Það er hennar aðalsmerki.
En þið hin ... það er ekki verið að eyðileggja 17.júní með mótmælum. Það er verið að reyna að spyrna við þeim ömurlegu ákvörðunum sem hafa verið teknar og eru á teikniborðinu.
Sama hvað forsætisráðherra sperrir fram bringuna undir þrumandi ræðunni þar sem því er haldið fram að hér drjúpi smjör af hverju strái, þá er það ekki upplifun fjöldans. Rofið, þið vitið.
Upplifunin er eingöngu þeirra sem höfðu það frekar gott um og strax á eftir hrun og hafa það enn betra núna.
Þeirra er kaupmátturinn og dýrðin
Fleiri færslur frá höfundi
Hvar varst þú?
Það er þekkja allir einhverja stóratburði í samtímasögunni sem höfðu svo mikil áhrif að þeir muna nákvæmlega hvar þeir voru og hvernig þeim leið þegar fregnir bárust. Þekktasta dæmið er líklega þegar Kennedy var skotinn. Fyrir okkur er það líklega árásin á World Trade Center turnanna. Fyrir mig er það mómentið sem ég hætti að vera meðvitundarlaus og áttaði mig...
Okkar eigið Trump-Klan
Á DV birtist frétt á dögunum um íbúafund á Kjalarnesi. Sem ætti ekki að vera neitt merkilegt. Íbúar á Kjalarnesi hafa áhyggjur af börnunum sínum og maður skyldi ætla að það væri sjálfsagt að funda um það. En þessi tiltekni íbúafundur endurspeglar vel á hvaða vegferð við erum og sú vegferð er ekki bara vond. Hún er hættuleg og henni...
Kjallaraíbúð, rauðamöl, léreftstuskur og barn
Þessi blaðsíða úr Morgunblaðinu frá því 18.mars 1964 er svo sem ekkert merkileg fyrir aðra en mig. Rauðamölin sem Vörubílastöðin Þróttur var að auglýsa til sölu er væntanlega löngu seld og léreftstuskurnar sem þeim í Ísafold vantaði löngu gleymdar. Íbúðir fundnar og farnar. En þarna er samt ein lítil auglýsing sem tengist mér og mér þykir afskaplega vænt um....
Áttu pening?
Á meðan við bíðum eftir því að hæstvirt ráðherranefnd ákveði hvað við höfum pláss fyrir marga Sýrlendinga í landi allsnægtanna þá er ýmislegt sem við getum gert. Hjálparsamtök eins og Unicef og Rauði krossinn taka á móti aðstoða alla daga allan daginn. En svo eru líka Íslendingar í sjálfboðastarfi á nokkrum stöðum þar sem neyðin er hvað mest eins og...
Athugasemdir