Fréttir

Sara Lind klökk í réttarsal: „Átti lengi vel erfitt með að keyra framhjá VR“

Sara Lind Guðbergsdóttir í réttarsal. Stefnir VR fyrir einelti og ólögmæta uppsögn.

Klökk í réttarsal Sara Lind gengur inn í réttarsál ásamt Högna Óskarssyni geðlækni. Ólafía Björk Rafnsdóttir, formaður VR, sést í bakgrunni. Mynd: Kristinn Magnússon

Aðalmeðferð fór fram í Héraðsdómi Reykjavíkur í morgun í skaðabótamáli Söru Lindar Guðbergsdóttur gegn stéttarfélaginu VR, en Sara Lind stefndi félaginu fyrir ólögmæta uppsögn og einelti. Henni var vikið frá störfum hjá VR árið 2013 en hún hafði gegnt stöðu deildarstjóra ráðgjafadeildar VR. 

Sara var ráðin til VR í apríl árið 2012 en síðar varð hún sambýliskona þáverandi formanns félagsins, Stefáns Einars Stefánssonar. DV fjallaði um það í desember 2012 að Sara Lind hefði verið ráðin í yfirmannsstöðu hjá VR þrátt fyrir að hafa ekki verið metin hæfust. Í umfjölluninni segir meðal annars að innan VR hafi sú saga gengið að áður en ráðningarferlið fór af stað væri búið að ákveða að Sara Lind fengi starfið. Sara Lind og Stefán Einar stefndu í kjölfarið útgáfufélaginu DV og Reyni Traustasyni, fyrrverandi ritstjóra blaðsins, fyrir meiðyrði. Niðurstaða fékkst í málið þann 31. mars síðastliðinn þegar DV var sýknað í málinu í Hæstarétti. 

Í réttarsal
Í réttarsal Sara Lind Guðbergsdóttir stefndi VR fyrir ólögmæta uppsögn og einelti.

Ásakanir um einelti ekki á rökum reistar

Krefst Sara Lind tveggja milljóna króna í bætur frá stéttarfélaginu vegna miska sem ólögmæt uppsögn og einelti hafa valdið henni. Nokkru áður en Söru Lind var sagt upp höfðu félagsmenn VR hafnað Stefáni Einar í kosningu til formanns þar sem Ólafía Björg Rafnsdóttir hafði sigur. Ástæður uppsagnar Söru Lindar voru sagðar skipulagsbreytingar innan félagsins. Sara Lind sakaði Ólafíu Björk í kjölfarið um einelti eftir að henni var sagt upp störfum hjá VR og voru þessar ásakanir rannsakaðar af sálfræðistofunni Líf og sál. Niðurstaða sálfræðistofunnar Líf og sál eftir þá rannsókn var á þá leið að ásakanir Söru Lindar um einelti væru ekki á rökum reistar.

Skýrslutaka Söru Lindar hófst á því að lögmaður hennar Jónas Fr. Jónsson spurði hana hvert hennar ábyrgðarsvið hefði verið. Hún sagðist hafa verið deildarstjóri ráðgjafadeildar. „Ég sá um málefni atvinnuleitanda, sem er mjög viðamikið verkefni. Skyldur mínar fólust í vikulegum fundum og skipulagningu,“ sagði Sara Lind.  Hún sagði að samskipti sín við Ólafíu hafi verið stirð frá upphafi.

Segist hafa verið hunsuð af Ólafíu

Sara Lind fór yfir starfsvið sitt hjá VR sem fólst í yfirumsjón yfir ráðgjafadeild. Það fólst í fundum og skipulagningu. Svo lýsti Sara Lind samskiptum sínum við Ólafíu Rafnsdóttur, formann VR. „Ástæðan fyrir því að við erum hér er að því miður var samstarf okkar ekki eins og á væri kosið. Þetta hefst með því að hún á fund með öllum stjórnendum félagsins. Hún kom vel fyrir og ég óskaði eftir því að hún myndi eiga fund með mér. Eftir nokkra daga hafði ég ekkert svar fengið og þá óskaði ég formlega um fund í tölvupósti. Það var upphafið af þeirri hunsun sem að mér sem stjórnanda var sýnd. Ég fékk snubbótt svör um að ég gæti komið inn þegar ég vildi. Þótt ég hafi ítrekað óskað eftir að ræða við hana þá varð því miður ekkert úr því. Þessi dans endaði eins og frægt er orðið í fjölmiðlum að mér var sagt upp,“ sagði Sara Lind.

„Ótrúlega mikil lítilsvirðing“

Sara Lind segir að eftir uppsögnina hafi henni liðið mjög illa og hafi það endað með því að hún hafi þurft að leita til geðlæknis. Þegar hún lýsti líðan sinni var hún heyranlega klökk. „Mér leið eðlilega ekki vel. Mér persónulega fannst þetta ótrúlega mikil lítilsvirðing. Það var eins og formaðurinn hafi lagt sig fram til að grafa undan mér. Mér fannst þetta ótrúlega mikil niðurlæging og erfitt að rifja þetta upp. Ég og framkvæmdastjóri ræddum þessi mál. Í öllum mínum samskiptum við formanninn reyndi ég að taka á þessu uppbyggilega. Mér fannst mikilvægt að við værum samstíga út á við. Þá ræddi ég við framkvæmdastjóra og fór yfir leiðir með honum, vildi komast við móts við hegðun formannsins,“ sagði Sara Lind.

Leið illa vegna fréttatilkynningar

Sara Lind sagði að hún telji það missi fyrir VR að hafa sagt sér upp. „Mér leið hrikalega illa. Það bætti ekki þegar fyrirtækið tilkynnti það opinberlega að mér hafi verið sagt upp í fréttatilkynning og fjölmiðlar sögðu frá eðlilega. Mér leið mjög illa og átti lengi vel mjög erfitt með að keyra fram hjá VR. Þetta hafði mikil áhrif á sjálfsmynd mína, ég skildi ekki af hverju mér var sagt upp þar sem ég stóð mig vel. Mér fannst þetta til þess fallið að grafa undan mínum trúverðugleika. Það var erfitt að horfa upp á vera svona lítilsvirt. Ég leitaði til geðlæknis til að komast i gengnum þessa tíma. Ég komst ekki sjálf í gegnum þetta,“ sagði Sara Lind.

„Ég skildi ekki af hverju mér var sagt upp“

Hún sagði að það hefði gengið mjög brösuglega að fá nýja vinnu og taldi hún upp tilvik þar sem henni hefði verið tjáð að ekki væri hægt að ráða hana þar sem Ólafíu væri svo illa við hana.

Athugasemdir

Allar athugasemdir eru ábyrgð á þeirra sem þær skrifa. Stundin áskilur sér rétt til að fjarlægja ærumeiðandi og óviðeigandi athugasemdir.

Mest lesið í dag

Fréttir

Geir Jón skrifaði meðmæli fyrir nauðgara sem hann rannsakaði

Fréttir

Sveinn segir söguna alla: „Okkur fannst þessi tengsl mjög skrítin“

Fréttir

Brynjar kemur fyrir í gögnunum sem áttu að fara leynt

Fréttir

Brynjar settur af sem formaður stjórnskipunar- og eftirlitsnefndar

Viðtal

Halldór Auðar um kynferðisofbeldið: Sektin helltist yfir

Fréttir

Júlíus Vífill veitti lögmanni meðmæli

Mest lesið í vikunni

Fréttir

Hjalti fundaði með Bjarna og Brynjari eftir að hann var kærður

Fréttir

Dæmdur fyrir hrottalega nauðgun gegn þroskahamlaðri konu – fékk uppreist æru í fyrra

Fréttir

Geir Jón skrifaði meðmæli fyrir nauðgara sem hann rannsakaði

Pistill

Þessi ótrúlegi óheiðarleiki

Pistill

Karlmaður í kventíma

Fréttir

Faðir forsætisráðherra var meðmælandi Hjalta – ráðuneytið hélt því leyndu