Þetta og svo ótal margt fleira er á döfinni næstu þrjár vikurnar.

Verslunarmannarhelgin 2019

Hvar? Víðs vegar
Hvenær? 2.–4. ágúst
Aðgangseyrir: Fer eftir hátíðinni.

Á þriggja daga helginni sem er kennd við frídag verslunarmanna er ofgnótt af spennandi bæjarhátíðum fyrir gleðipinna. Evrópumeistaramótið í Mýrarbolta er enn og aftur haldið á Bolungarvík, en auk viðvaningsvænu keppninnar verða líka tónleikar, bjór jóga og fleira í boði. Fyrir norðan á Akureyri er Ein með öllu haldin og fyrir austan, í Neskaupstað, er Neistaflug haldið, en báðar hátíðirnar eru fjölskylduvænar með fjölbreytta dagskrá fyrir alla aldurshópa. Á Laugarbakka er Norðanpaunk, DIY árshátíð pönkara, haldið, en þar koma fram um 45 jaðarsveitir sem spila erfiða tónlist fyrir gott fólk. Innipúkar geta líka glaðst yfir því að hátíðin Innipúkinn verður haldinn í 18. sinn í Reykjavík, í þetta sinn á Granda.

Flæði – opnunarpartí

Hvar? Flæði
Hvenær? 1. ágúst 14.00–22.00
Aðgangseyrir: Ókeypis!

Flæði er nýtt listamannarekið rými sem verður opnað á Grettisgötu 3, en það er hugsað sem stökkpallur fyrir fjölbreytta flóru lista af mismunandi toga. Í opnunarhófinu verða sýnd listaverk eftir Sunnu Axels, keramikverk eftir Antoníu Bergþórsdóttur og ljósmyndir eftir Brynju. Um kvöldið spilar síðan danska tónlistarkonan Zaar draumkennda tóna.

… og hvað svo?

Hvar? Nýlistasafnið
Hvenær? Til 4. ágúst
Aðgangseyrir: Ókeypis!

Á sumarsýningu Nýlistasafnsins mætast verk ellefu listamanna sem, hvert fyrir sig og í samtali sín á milli, ávarpa hið yfirvofandi og rannsaka listina sem áhrifavald. Sýningin spyr stórra spurninga eins og hvort list geti haft mótandi áhrif á það sem á eftir að gerast, og hvort listin hjálpi fólki að kljást við raunveruleikann eða hvort hún feli í sér raunveruleikaflótta.

Öll brögð möguleg

Hvar? Kling & Bang
Hvenær? Til 4. ágúst
Aðgangseyrir: Ókeypis!

Sumarsýning Kling & Bang er hópsýning sjö ungs myndlistarfólks sem kemur allt úr mismunandi átt. Í þessum bræðingi koma fyrir innsetningar og lifandi tónverk, hljóðleiðsagnir og sérsaumaðir sandpokar. Viðkvæmar töfflur úr pitsukössum sitja við hliðina á ís sem bragðast eins og göngutúr og sápu sem lyktar eins og sumarið. Ekkert er satt og allt er leyfilegt á þessari sýningu.

Mill

Hvar? Norræna húsið
Hvenær? 4. ágúst kl. 15.00
Aðgangseyrir: Ókeypis!

Hanna Mia er sænskt-íslenskt söngvaskáld, betur þekkt sem Mill. Tónlist hennar vakti athygli þegar hún hóf tónsmíðaverkefni þar sem hún samdi eitt lag á dag í heilt ár. Á Pikknikk-tónleikum hennar í Norræna húsinu mun Mill flytja hápunktana frá þessu ferli í samstarfi við vini og námsfélaga frá tónlistardeild Listaháskóla Íslands. Tónleikarnir verða haldnir í gróðurhúsi Norræna hússins.

míní-míní múltíversa

Hvar? Hafnarhúsið
Hvenær? Til 11. ágúst
Aðgangseyrir: 1.800 kr.

Ragnheiður Káradóttir kannar mörkin á milli hins manngerða og hins náttúrulega á þessari sýningu. Sérstaklega lítur hún til staða sem hannaðir hafa verið til afþreyingar; með innsetningu sinni kallar Ragnheiður fram eins konar rof í veruleika áhorfenda með innsýn í ímyndaða hliðarvídd sem kallast á við það umhverfi sem við þekkjum. Hinn 8. ágúst klukkan 20.00 verður Ragnheiður með leiðsögn um sýninguna.

HIMA 2019

Hvar? Harpa
Hvenær? 6., 10., 11. & 15. ágúst
Aðgangseyrir: frá 5.000 kr.

Alþjóðlega tónlistarakademían í Hörpu var fyrst haldin árið 2013, en hún samanstendur bæði af æfingabúðum fyrir ungt tónlistarfólk og röð af tónleikum. Opnunarhóf er 6. ágúst, en 10. og 11. má hlýða á unga og upprennandi flytjendur. 15. ágúst eru síðan hátíðartónleikarnir þar sem strengjasveit HIMA leikur fjögur verk, auk þess sem mismunandi tónverk eru flutt á mismunandi stöðum í tónleikasalnum.

Hinsegin dagar

Hvar? Reykjavík
Hvenær? 8.–17. ágúst
Aðgangseyrir: Fer eftir viðburðum

Hinsegin dagar, eða Reykjavík Pride, hafa verið haldnir árlega frá 1999 og fagna því 20 ára afmæli í ár. Þessi hátíð hamingju, ástar og fjölbreytni hefur spilað stóran þátt í vitundarvakningu á málefnum hinsegin fólks, en nú er hún orðin fastur liður í viðburðadagatali borgarinnar. Auk fjölmargra viðburða í vikunni er Gleðigangan haldin 17. ágúst klukkan 14.00.

FINGERED EYED

Hvar? i8
Hvenær? Til 10. ágúst
Aðgangseyrir: Ókeypis!

Verk bandarísku myndlistarkonunnar B. Ingrid Olson hafa fram til þessa fallið illa að flokkunarkerfi listmiðlunar: um leið og þau eru svo miklu meira en „skúlptúrar og ljósmyndir í innrými“ eru verkin vitanlega mestanpart skúlptúrar, oft ljósmyndir og alltaf í samspili við innrými. Skúlptúrverkin á þessari sýningu eru hvert um sig föst á fleti, þau rjúfa vegginn og nota hann sem undirstöðu til að vaxa útfrá.

Elín Harpa

Hvar? Norræna húsið
Hvenær? 11. ágúst kl. 15.00
Aðgangseyrir: Ókeypis!

Elín Harpa er íslensk raftónlistarkona sem gaf nýverið út sitt fyrsta lag „Run“, fyrsta smáskífa hennar er væntanleg síðar á þessu ári. Þrátt fyrir ungan aldur hefur Elín starfað lengi í tónlist en hún hóf sinn tónlistarferil eftir þátttöku í The Voice Iceland. Undanfarin ár hefur Elín Harpa starfað með íslensku hljómsveitinni Bang Gang og spilað með þeim um Asíu.

Ed Sheeran

Mynd: Markus Hillgärtner

Hvar? Laugardalsvöllur
Hvenær? 11. ágúst kl. 18.30
Aðgangseyrir: frá 15.990 kr.

Enski tónlistarmaðurinn Ed Sheeran leggur land undir fót og heldur stórtónleika á Íslandi. Það seldist upp á svipstundu á tónleika hans 10. ágúst og var því þessum aukatónleikum bætt við. Með honum í för eru samlandi hans, James Bay, sænska poppstirnið Zara Larsson og upprennandi íslenska stjarnan Glowie sem býr í Lundúnum þar sem hún vinnur hörðum höndum að fyrstu breiðskífu sinni.

ADHD

Hvar? Norræna húsið
Hvenær? 14. ágúst kl. 21.00
Aðgangseyrir: frá 2.000 kr.

Djasshljómsveitin ADHD gaf á dögunum út sína sjöundu plötu, ADHD 7, og hefur því spilað víða í sumar. Sveitin tekur nú þátt í Sumartónleikaröð Norræna hússins þar sem efni bæði af nýju og eldri plötum verður leikið fyrir gesti. Hljómsveitin var stofnuð í kringum blúshátíð Hafnar á Hornafirði fyrir tólf árum og hefur verið starfrækt síðan þá.

Jaðar

Hvar? Hafnarhúsið
Hvenær? 15. ágúst til 22. september
Aðgangseyrir: 1.800 kr.

Verk Emmu Heiðarsdóttur byggjast á inngripi í þau rými sem hún sýnir í auk sjálfstæðra þrívíðra verka og myndbandsverka. Emma er 39. listamaðurinn til að sýna í sýningaröð Listasafns Reykjavíkur í D-sal, en hún einkennist af því að bjóða efnilegum listamönnum sem hafa mótandi áhrif á íslenska myndlistarsenu að halda sína fyrstu einkasýningu í opinberu safni.

FM Belfast

Hvar? Havarí
Hvenær? 17. ágúst
Aðgangseyrir: 4.000 kr.

Rafmögnuðu poppararnir og gleðisprengjurnar í FM Belfast spila enn og aftur í Havarí á Karlsstöðum í Berufirði. Sveitin hefur verið virk í fjórtán ár, gefið út fjórar breiðskífur og spilað á öllum hátíðum og tónleikastöðum sem vert er að minnast á. Þessir tónleikar eru þeir síðustu í seríunni „Sumar í Havarí 2019“ og því má búast við því að í engu verði sparað og að þakið verði endanlega rifið af hlöðunni.

Toolraiser 2019

Hvar? Verkfærasafn Reykjavíkur
Hvenær? 18. ágúst kl. 17.00–23.30
Aðgangseyrir: eitt verkfæri.

Verkfærasafn Reykjavíkur var opnað fyrir ári, en á þessu safni býðst meðlimum að fá verkfæri lánuð í nokkra daga. Þessi viðburður er í senn afmælisfögnuður og fjáröflun fyrir komandi vetur, en aðgangseyririnn er eitt verkfæri. Boðið verður upp á tónleika þar sem MSEA, Skoffín, Dead Bird Lady og fleiri koma fram. Á boðstólum verður kaka og bjór frá Ægisgarði.