Pistill

Er hlutverk ríkisins að styðja yfirnáttúrulega trú?

Það kviknaði í Illuga Jökulssyni gamall trúleysingi.

Guð faðir. Myndina gerði Cima da Coneligano (1460-1518).

Ég rakst í gærkvöldi á umræður á Facebook um trúmál og þó sérstaklega hlutverk þjóðkirkjunnar svokölluðu - en sú kirkjudeild mætti reyndar fara að huga að nafnbreytingu nú þegar stór hluti þjóðarinnar tilheyrir henni ekki.

En hvað um það, á Facebook-þræðinum fóru umræður fram af mikilli kurteisi og töluvert var talað um félagslegt hlutverk kirkjunnar, félagsauð, sem svo var nefndur og allskonar hlutverk sem kirkjan gegnir í samfélaginu.

Hvort þessi félagsauður réttlætti ekki að ríkið styddi sérstaklega við kirkjuna.

Og ekkert nema gott um það að segja að til séu stofnanir eða félög sem sinni slíkum hlutverkum. Ég hef sjálfur óhikað notað þjónustu kirkjunnar við athafnir eins og skírnir, fermingar, brúðkaup og jarðarfarir, einfaldlega af því það er í samræmi við fornar hefðir og maður er að svo mörgu leyti þjónn vanans.

En mér fannst fljótlega eins og umræðurnar á Facebook sneiddu vandlega - og nánast vísvitandi - hjá höfuðatriði og þungamiðju kirkjunnar.

Sem er trúin sjálf.

Þarna var nefnilega aðallega talað um kirkjuna sem hálfgerða félagsmálastofnun.

En kirkjan snýst ekki um það, þótt hún hafi tekið sér þar hlutverk og margir prestar - en ekki allir þó - gegni því með sóma.

Kirkjan snýst um trú sumra - en alls ekki allra þó - á yfirnáttúrulega hluti.

Yfirnáttúrulegar verur eða öfl sem hafi áhrif á náttúruna og líf og hugsun okkar mannanna.

Trúin er alveg óhögguð þótt ekkert af því sem rannsóknir okkar á heiminum og umhverfi hafa sýnt okkur styðji á nokkurn hátt tilveru þessara yfirnáttúrulegu afla, hvaða nafni sem þau nefnast.

Ekkert: Nákvæmlega ekki neitt, ekki ein arða, ekki svo mikið sem nögl á þumalfingri.

Enda eru þessi yfirnáttúrulegu öfl ekki öflugri en svo að ekki nema sumir „finna fyrir“ tilvist þeirra.

Allt í lagi með það. Fólk má auðvitað trúa því sem það vill.

„Whatever gets you thru the night,“ eins og séra Frederick J. Eikerenkoetter II sagði svo ógleymanlega.

En getur það virkilega verið hlutverk ríkisins að styðja stofnun utan um trú sumra - aðeins sumra - á yfirnáttúrulegar og ósannanlegar verur eða öfl?

 

 

 

Athugasemdir

Allar athugasemdir eru ábyrgð á þeirra sem þær skrifa. Stundin áskilur sér rétt til að fjarlægja ærumeiðandi og óviðeigandi athugasemdir.

Mest lesið í dag

Fréttir

Sögðust hlæjandi og í kaldhæðni hata karlmenn og eru nú tekin í gegn á netinu

Fréttir

Segir ummæli Brynjars ófagleg og afvegaleiða umræðu

Aðsent

400 manns senda Katrínu Jakobsdóttur opið bréf vegna „vanrækslu stjórnvalda“ í máli Hauks

Fréttir

Tíu launahæstu forstjórarnir með 7,6 milljónir að meðaltali á mánuði

Fréttir

Yfirlýsing frá Trans Ísland vegna niðurlægjandi umfjöllunar í ósamræmi við veruleikann

Fréttir

Kallar tilmæli Svandísar „veruleikafirringu“ – Ljósmæður telja sig hafa gert samning

Mest lesið í vikunni

Fréttir

Ætlar ekki að segja sig úr Sjálfstæðisflokknum

Fréttir

Sögðust hlæjandi og í kaldhæðni hata karlmenn og eru nú tekin í gegn á netinu

Viðtal

Finnur mun meira fyrir fötluninni á Íslandi

Fréttir

Vigdís Hauksdóttir lætur víkinga bera sig í kosningamyndbandi

Fréttir

Segir ummæli Brynjars ófagleg og afvegaleiða umræðu

Aðsent

400 manns senda Katrínu Jakobsdóttur opið bréf vegna „vanrækslu stjórnvalda“ í máli Hauks