„Hingað til Póllands eru komin yfir 600 þúsund börn á flótta undan stríðinu í Úkraínu, á aðeins tólf dögum,“ sagði starfskona Rauða kross Póllands við ljósmyndara í þorpinu Hrebenne, á landamærum ríkjanna tveggja. Rétt áður höfðum við horft á þrjár rútur og fjóra sjúkrabíla þjóta framhjá, en bílalestin var á leið frá Kænugarði til Varsjár, yfir þúsund kílómetra leið, með 170 krabbameinssjúk börn. Öll börnin á krabbameinsdeildinni. Foreldrarnir voru ekki með í för. 

Í gær höfðu tvær milljónir Úkraínumanna flúið landið sitt. Um sextíu prósent þeirra hafa flúið hingað til Póllands en seinnipartinn í gær höfðu 1.204.403 skráð sig inn í landið á þessum örfáum dögum. Það er tekið á móti þeim með opnum örmum, maður finnur hve allir Pólverjar eru samtaka að hjálpa til, veita húsaskjól eða skutl á næsta gistiheimili eða í næstu rútu. 

Taka lítið með sérFæst flóttafólkið hefur mikinn farangur, þau sem eru á ferðinni með börn hafa einkum nauðsynjar fyrir þau í farteskinu.

Mynd: Páll Stefánsson

Á landamærunum Póllands megin eru komnar upp tjaldbúðir þar sem alþjóðleg hjálparsamtök bjóða flóttafólkinu upp á heitan mat, hlýrri föt, og leikföng og bleyjur fyrir börnin. Flóttafólkið kemur ekki með mikið með sér, flestir með í mesta lagi tvær töskur, af smærri gerðinni. Hvað myndi maður sjálfur taka með, ef maður þyrfti að taka sig upp og flýja?

„Það fyrsta sem ég setti í bakpokann minn var myndaalbúm, ég vil eiga myndir af foreldrum mínum, manni og æsku minni, ef allt fer á versta veg,“ sagði Irína við mig. Hún var búin að vera fimm daga á leiðinni frá austurhluta Úkraínu. „En bróðurparturinn í mínum bakpoka eru föt og nauðsynjar fyrir barnið.“

Pólverjar samtaka Mikil samstaða ríkir hjá Pólverjum í garð nágranna sinna í Úkraínu og fólk er boðið og búið að aðstoða, enda svíður því óréttlætið í striðsaðgerðum Rússa sem bitna, eins og alltaf er í stríði, verst á börnum.

Mynd: Páll Stefánsson