Aðilar sem segjast vera hluti af Norrænu mótstöðuhreyfingunni, samnorrænu bandalagi nýnasista, hafa dreift límmiðum á ruslatunnur og á skólalóðir í Mosfellsbæ. Fyrir ári síðan var sams konar áróðri dreift í Hlíðahverfinu í Reykjavík.
Á vefsíðu hreyfingarinnar kemur fram að hún aðhyllist „þjóðernisfélagshyggju“ og þann 27. maí síðastliðinn birtist færsla birt á vefnum þar sem lagt er út orðum Adolfs Hitlers: „Það sem við verðum að berjast fyrir, er að vernda tilveru og fjölgun kynþáttar okkar og þjóðar, við verðum að berjast fyrir afkomu barna okkar og hreinleika blóðs okkar, fyrir frelsi og sjálfstæði föðurlandsins, svo að okkar fólk geti þroskast til að uppfylla verkefnið sem að því hefur verið úthlutað af skapara alheimsins. Hver einasta hugsun og hver einasta hugmynd, hver kenning og öll þekking, verða að þjóna aðeins þessum tilgangi. Og allt verður að meta einungis út frá þessu sjónarhorni og nota eða hafna eftir gagnsemi þess.“
Hreyfingin hefur verið bönnuð í Finnlandi vegna hvatningar til ofbeldis og hatursorðræðu og í Svíþjóð hafa þrír menn sem tengjast samtökunum verið dæmdir í fangelsi fyrir sprengjuárás í Gautaborg.
Límmiðar í Mosfellsbæ
Thomas Brorsen Smidt, íbúi í Mosfellsbæ tilkynnti um límmiða með færslu á Facebook-síðu íbúa í Mosfellsbæ í morgun:
Fleiri íbúar Mosfellsbæjar segjast hafa tekið eftir slíkum áróðri í bænum. „Við konan fundum svona á öllum körfuboltakörfunum í Varmárskóla í vor,“ segir einn þeirra. Annar segist hafa rifið 10 til 15 nasistalímmiða niður af ljósastaurum í hjólatúr um Leirvogstunguna um daginn.
Árás í Breiðholti
Í byrjun vikunnar bárust fréttir af því að ráðist hefði verið á múslima í Breiðholti, hvæst og hrækt á þá, og er atvikið nú til rannsóknar hjá lögreglu. Í kjölfarið birtust fjöldinn allur af rasískum ummælum víðsvegar á Facebook þar sem ódæðin voru réttlætt.
„Meiri hluti Íslendinga kærir sig ekki um íslamska menningu. Þeir hafa fullan rétt á því og þeir hafa fullan rétt á því að láta þá skoðun sína í ljós,“ sagði í Facebook-færslu Vakurs, samtaka þjóðernissinna sem reka áróður gegn innflytjendum og fjölmenningu og beita sér fyrir hertri innflytjendastefnu. Eins og Stundin greindi frá hefur umsjónarmaður síðunnar gengist við því að aðhyllast fasisma.
Athugasemdir