Lögreglustjórinn á höfuðborgarsvæðinu segir að gagnrýni sem kemur fram á stöðu jafnréttismála innan lögreglu í nýútkomnu júníhefti tímaritsins Stjórnmál og stjórnsýsla eigi ekki lengur við, enda hafi framfarir orðið síðan rannsóknin var gerð.
Þetta kemur fram í bréfi sem Sigríður Björk Guðjónsdóttir lögreglustjóri sendi starfsmönnum embættisins á dögunum. Stundin birti nýlega frétt þar sem vitnað var í rannsókn tveggja kynjafræðinga á stöðu jafnréttismála hjá embættinu, en þar er gagnrýnt að lögreglan hafi ekki sett sér jafnréttisáætlun og aðgerðabundna framkvæmdaáætlun í samræmi við ákvæði jafnréttislaga og ábendingar Jafnréttisstofu. Þá hafi áhættumat og heilsuverndaráætlun samkvæmt reglugerð um aðgerðir gegn einelti og kynferðislegri áreitni á vinnustöðum ekki komist til framkvæmda innan embættisins.
Í bréfi Sigríðar Bjarkar til starfsmanna segir hún að ný jafnréttisáætlun hafi einmitt verið samþykkt hjá lögreglunni á höfuðborgarsvæðinu í ársbyrjun 2019 og Jafnréttisstofa hrósað embættinu.
„Í umfjöllun í nýjasta tölublaði Stundarinnar um stöðu þessara mála hjá okkur er ekki byggt á nýjustu tölum eða upplýsingum frá okkur. Þetta skýrist af því að í nýútkomnu júníhefti tímaritsins Stjórnmál og stjórnsýsla birtist grein eftir Kristínu Önnu Hjálmarsdóttur og Gyðu Margréti Pétursdóttur, um niðurstöður rannsóknar þeirra tveggja á stöðu jafnréttismála hjá Lögreglunni á höfuðborgarsvæðinu,“ segir í bréfinu. „Rannsóknin fór fram árin 2016 og 2017 og voru niðurstöður hennar birtar opinberlega í ársbyrjun 2018. Grein þeirra Gyðu og Kristínar er þannig vissulega ný en hún byggir, sem áður segir, á eldri rannsóknarniðurstöðum sem búið var að kynna ítarlega og fjalla um.“
Fram kemur í bréfinu að því sé ranglega haldið fram í frétt Stundarinnar að greina megi ráðaleysi og uppgjöf í jafnréttismálum lögreglu. „Þetta á sér hvorki stoð í rannsókninni sjálfri né þegar horft er á stöðu jafnréttismála hjá embættinu í dag.“
Þetta er ekki rétt, því í umræddri rannsókn segir orðrétt að víða heyrist orðræða innan lögreglu sem „birtist sem ráðaleysi eða hálfgerð uppgjöf lykilstarfsfólks lögreglunnar í jafnréttismálum“. Er eftirfarandi haft eftir Sigríði Björk, lögreglustjóranum sjálfum, í rannsókninni: „Þú breytir ekki viðhorfi í 85% karlamenningu, það er bara ekki hægt því þeir sem eru á annarri skoðun þeir bara eru undir.“
Upplýsingafulltrúi lögreglunnar sendi fjölmiðlum tilkynningu í dag þar sem vakin er athygli á því að margt hafi áunnist á sviði jafnréttismála innan embættisins. „Í þessu samhengi má nefna að í heildina fjölgaði konum á meðal lögreglumanna úr 19% árið 2016 í 24% árið 2018 og í maí 2019 voru konur 28% lögreglumanna hjá embættinu. Kynjahlutföll hafa því batnað, en þess má enn fremur geta að kynjahlutföll eru nú jöfn á lögreglustöðinni á Vínlandsleið 2-4 í Reykjavík.“ Þá bendir hann á að nú sé starfandi sérstakur jafnréttisfulltrúi hjá Lögreglunni á höfuðborgarsvæðinu og nú sé unnið að verkefni með Capacent sem nefnist Jafnréttisvísir, um stefnumótun og vitundarvakning í jafnréttismálum. „Að þessu sögðu er ljóst að mikil vinna á sér stað í málaflokknum og um það eru starfsmenn Lögreglunnar á höfuðborgarsvæðinu vel meðvitaðir og taka fullan þátt.“
Athugasemdir