Slökkvibílar, lögreglubíll og sjúkrabíll hafa leitað að upptökum rafmagnsleysis og hugsanlegs bruna í miðborginni nú fyrir kvöldmatarleytið. Talið er að brunalykt sem liggur yfir Pósthússtræti og Austurvöll gæti tengst rafmagnsleysinu. Rafmagnslaust varð í stórum hluta miðborgarinnar og voru veitingastaðir, ásamt öðrum vinnustöðum, óstarfhæfir.
Samkvæmt upplýsingum frá Veitum eru upptökin fundin og má rekja rafmagsnsleysið til háspennubilunar í miðbæ Reykjavíkur. Unnið er að viðgerð og er vonast til þess að rafmagn verði komið aftur á innan klukkustundar, eða um klukkan sjö í kvöld.
Eins er rafmagnslaust í Vesturbænum, þótt rafmagnsleysið nái ekki til allra heldur aðeins sumra húsa. Það er til að mynda ekki rafmagnslaust í Þjóðleikhúsinu þótt veitingastaðir séu margir í vanda.
Í leiðbeiningum frá Veitum er fólki bent á að slökkva á rafmagnstækjum sem slökkva ekki á sér sjálf og geta valdið tjóni þegar rafmagn kemur á að nýju, en það á sérstaklega við um sjónvörp, eldavélar, mínútugrill og fleiri hitunartæki.
Athugasemdir