Ásta Kristín Guðrúnardóttir Pálsdóttir var komin á fullorðinsaldur þegar hún komst að því að faðir hennar væri ekki lífræðilegur faðir hennar. Hún hefur því síðastliðinn áratug leitað líffræðilegs föður síns en móðir hennar dó árið 1991, þegar Ásta var aðeins fjögurra ára gömul. Hún segir forvitnina knýja sig áfram og vonast til þess að græða fleira fólk í kringum sig en fyrir eigi hún ótrúlegan fjölda af góðu fólki sem hún er afskaplega þakklát fyrir.
Móðir Ástu hét Guðrún Margrét Þorbergsdóttir og var fædd árið 1961. Hún var mikið í dansi segir Ásta dóttir hennar og í Íslendingabók er Guðrún sögð danskennari. Meðal annars vann Guðrún á Prikinu og á Orkustofnun.
Ásta fæddist í Reykjavík árið 1987, ólst þar upp og býr þar enn. „Ég ólst upp hjá góðri fjölskyldu og á frábæran föður. Mamma mín dó árið 1991 og ég komst að því á fullorðinsárum að ég ætti annan líffræðilegan föður. Ég veit hinsvegar ekki hver það er og hef engar upplýsingar, en mig myndi langa til að reyna að finna hann,“ segir Ásta í Facebook-færslu sem hún birti í gærkvöldi. Sú færsla hefur vakið gríðarlega athygli og hefur verið deilt í hundruðum tilvika.
Ótrúlega heppin með pabba sinn
Spurð hvort hún hafi fengið einhverjar upplýsingar og þræði til að rekja segir Ásta að enn sem komið er hafi færslan ekki borið slíkan árangur, enda stutt síðan hún birti hana. „Ekki ennþá en það er fullt af fólki að senda mér vinabeiðnir og margir hafa gefið mér ráð um hvernig ég eigi að bera mig að við leitina. Ég er hins vegar eiginlega búin að prófa allt annað en að birta þetta svona opinberlega. Ég hef leitað í mörgum genabönkum og reynt að bera saman upplýsingar við Íslendingabók. Það er hins vegar alveg gríðarlega mikil vinna og ég hef af og til í mjög langan tíma verið að bera þetta saman, hingað til án árangurs.
Nú eru hins vegar komnir miklu fleiri hausar til að pæla í málinu, fólk sem hefur verið á alls konar stöðum á alls konar tímum. Sumir sem hafa verið að skrifa athugasemdir hafa augljóslega þekkt mömmu og ég er búin að sjá ótrúlega margar fallegar athugasemdir um hana sem mér þykir mjög vænt um. Fólk vill hjálpa mér, mjög mikið.“
„Á þessari vegferð hef ég þess vegna kynnst mömmu og það er mér dýrmætt“
Ásta var 24 ára þegar hún komst að því að faðir hennar væri ekki líffræðilegur faðir hennar. Tíu ár eru síðan það var og hefur hún frá þeim tíma leitað upplýsinga um hver líffræðilegur faðir hennar sé. „Ég byrjaði á að spyrja alla sem ég vissi að hefðu þekkt mömmu og hún hefði mögulega getað trúað fyrir hlutunum. Að sama skapi notaði ég tækifærið og spurði fólk um mömmu, rannsakaði eiginlega líf hennar svolítið því í þessu ferli uppgötvaði ég að ég vissi í raun sáralítið um hana, hvað hún hefði gert mikið í lífinu. Á þessari vegferð hef ég þess vegna kynnst mömmu og það er mér dýrmætt.“
Spurð hvernig faðir hennar hefði tekið uppgötvuninni segir Ásta að hann hafi tekið henni ótrúlega vel. „Eins og höfðingi. Hann er mín stoð og stytta, í lífinu en líka í þessari leit.“
Ásta útskýrir að hún hafi tekið ákvörðun um að birta Facebook-færsluna nú vegna þess að hún hafi verið örugg með ákvörðunina. „Ég var kannski ekki alveg viss hvernig fólk myndi tala um mömmu, hvort það yrði sárt kannski, en ég var orðin örugg í mínu skinni. Svo eru allir búnir að vera ótrúlega hlýir svo þetta hefur bara verið eflandi fyrir mig. Mig langaði ekki að þetta yrði eins og einhver sorgarasaga, þetta er það ekki, ég er ótrúlega heppin í lífinu og ótrúlega heppin með pabba minn. Ég er hins vegar forvitin um hver er líffræðilegur faðir minn og ef ég finn hann er ég vonandi bara að græða fleira fólk í kringum mig.“
Athugasemdir