Þórólfur Guðnason sóttvarnalæknir er kominn í sóttkví eftir að covid-smit kom upp hjá sóttvarnasviði embættis landlæknis.
Þrír starfsmenn sviðsins eru komnir í sóttkví.
Þórólfur bíður nú niðurstöðu sýnatöku sem fór fram í dag. Hann fer í fimm daga sóttkví og í aðra sýnatöku á fimmta degi.
Þetta kemur fram í fréttatilkynningu frá embætti landlæknis.
Á sama tíma er Víðir Reynisson, yfirlögregluþjónn almannavarna, kominn úr einangrun eftir að hafa fengið í sig covid-smit.
Skömmu eftir að tilkynningin var send gaf Þórólfur út yfirlýsingu um fréttaflutning dagsins af töfum á bólusetningu þjóðarinnar.
„Að gefnu tilefni vill sóttvarnalæknir taka fram að á þessari stundu liggja einungis fyrir áreiðanlegar upplýsingar um afhendingu fyrstu skammta bóluefnis frá Pfizer. Á upplýsingafundi í morgun mátti skilja á orðum mínum að ekki væri að vænta bóluefna frá öðrum framleiðendum fyrr en á síðari hluta næsta árs. Þetta var ofsagt. Ísland hefur þegar tryggt sér kauprétt á bóluefni fyrir um 60–70% þjóðarinnar en ekki liggur enn fyrir hvenær og hversu mikið bóluefni kemur í hverri sendingu. Áætlanir framleiðenda munu skýrast þegar fram í sækir.“
Athugasemdir