Nanna Rögnvaldardóttir, ritstjóri hjá Forlaginu, er ekki trúuð. „Ég er ekki fermd til dæmis,“ segir hún en hún ólst upp við að haldið væri upp á jólin og það gerði hún í áratugi eftir að hún eignaðist sjálf börn. „Ég hef ekkert á móti jólunum. Þegar ég hélt jól þá kveikti ég alltaf á útvarpinu klukkan sex og lét jólamessuna vera undir eldamennskunni þó ég væri ekki að hlusta á hana. Það var bara partur af stemningunni.“

 Nanna segist hafa svo farið að draga smátt og smátt úr jólahaldi. „Ég smáhætti að skreyta og hætti svo að vera með jólatré.“ Börn hennar og barnabörn voru alltaf hjá henni á aðfangadagskvöld. „Barnabörnin harðneituðu að fara annað en til ömmu um kvöldið og vildu hafa alltaf allt í sömu skorðum en ég vildi sjálf breyta til, mér leiðist að elda alltaf sama matinn, og mér fannst að fjölskyldur þeirra ættu að fara …