Svo virðist sem dögum þar sem snjódýpt mælist yfir 10 cm í Reykjavík hafi farið fjölgandi síðasta áratuginn þótt á því séu undantekningar. Þá virðast tilvik þar sem snjódýpt mælist yfir 20 cm einnig hafa farið vaxandi. Þetta er meðal þess sem fram kemur í minnisblaði sem lagt var fyrir umhverfis- og skipulagsráð Reykjavíkur í vikunni.
Síðasti vetur skar sig úr hvað varðar mikla snjódýpt og var sá vetur almennt erfiður. Kvörtunum yfir þjónustu borgarinnar rigndi inn og var ákveðið að bæta úr. „Með auknu þjónustustigi fylgir alla jafna aukinn kostnaður og hefur kostnaður í vetrarþjónustu Reykjavíkurborgar aldrei verið hærri en síðustu tvö ár,“ segir í minnisblaðinu. Vaxandi kostnaður helst einnig í hendur við stærð gatna- og stígakerfis. Sé horft aftur til ársins 2014 þá hefur til dæmis hjólastígakerfi borgarinnar lengst um 50%.
Raunkostnaður við vetrarþjónustu í Reykjavík á árunum 2011 til 2021 hefur verið á bilinu 700–1.000 milljónir en síðustu tvö ár hafa skorið sig úr, þar sem kostnaður hefur verið umtalsvert hærri – árið 2022 var kostnaður nærri 1.300 milljónir og á síðasta ári fór kostnaðurinn yfir 1.500 milljónir.
Athugasemdir