Hörður J. Oddfríðarson segist í samtali við Stundina hafa „dregið við sig“ að svara fyrirspurnum um hvort hann væri maðurinn sem Jódís Skúladóttir, alþingiskona nefndi í status á Facebook í fyrradag, „Ég gengst við því“ segir Hörður hinsvegar í samtali við Stundina og bætir við að hann sé að klára yfirlýsingu þess efnis sem hann muni svo senda frá sér. Valgerður Rúnarsdóttir, forstjóri Vogs segir að Hörður sé kominn í leyfi frá störfum sínum fyrir SÁÁ og málið sé til skoðunar hjá samtökunum.
Jódís lýsti því að maður sem misnotaði yfirburðastöðu sína gagnvart henni hefði tekið á móti henni þegar hún var send í eftirmeðferð á Staðarfelli þremur árum síðar.
„Þegar ég mætti með rútunni í eftirmeðferð á Staðarfell í Dölum tók á móti mér maður sem var kanóna innan SÁÁ, sá sami hafði misnotað yfirburðaðstöðu sína gagnvart mér þrem árum fyrr. Ég hafði þá verið 17 ára, hann 30 ára. Hann, edrú, gaf mér áfengi, káfaði á mér og tróð tungunni upp í mig. Ég forðaði mér en hann mætti heim til mín um nóttina og vildi komast inn.“
Á hans ábyrgð að stíga fram
Jódís sagði nóg komið og kallaði eftir aðgerðum því „hvert ömurlega málið hafi rekið annað árum saman innan SÁÁ“. Hörður segir í samtali við Stundina að hann hafi viljað að taka tillit til Jódísar og því ekki sagt frá því að hann væri maðurinn sem um ræddi. ,,En ég gengst við þessu og hefði gjarnan viljað ræða við hana en ég rengi að sjálfsögðu ekki frásögn Jódísar á neinn hátt og mun birta yfirlýsingu um málið hið fyrsta.” segir Hörður.
„Ég gengst við því“
Stundin náði tali af Jódísi og bar þessi orð undir hana. „Ég tók ákvörðun um að nafngreina hann ekki af því að það er á hans ábyrgð að stíga fram.“
Hörður hefur sagt sig frá öllum trúnaðarstörfum fyrir Samfylkinguna vegna málsins, en hann var formaður fulltrúaráðs flokksins.
Hörður segist einnig vera búinn að segja sig úr stjórn Sundsambands Íslands en hann var formaður sambandsins um árabil. „Moldviðrið í SÁÁ undanfarið gerir það að verkum að ég ætla að draga mig í hlé frá trúnaðarstörfum fyrir Samfylkinguna og úr Sundsambandinu.“
Heldur áfram hjá SÁÁ enn um sinn
Aðspurður hvort hann ætli að halda áfram að vinna hjá SÁÁ þar sem hann er dagskrárstjóri göngudeildar á Akureyri segist hann halda áfram, enn um sinn, að sinna þeim verkum sem yfirmenn sínir hjá SÁÁ muni fela sér. „Þetta samtal er ekki búið milli mín og minna yfirmanna hjá SÁÁ,“ segir Hörður.
Hann segist hafa gengið of langt í að gagnrýna Sjúkratryggingar Íslands en sem kunnugt er hafa Sjúkratryggingar kært SÁÁ til saksóknara vegna þúsunda tilhæfulausra reikninga og krafið samtökin um 174 milljóna króna endurgreiðslu. „Sú skoðun tengist að nokkru leyti verkefnum sem ég hef haft með að gera og kostar mikla vinnu og yfirlegu. Ég þarf eins og aðrir þegar ég sé fréttir af því að verið sé að kæra það að setjast yfir það og athuga hvort einhver fótur sé fyrir því þegar saksóknari bankar uppá,“ segir Hörður og aðspurður um gagnrýni sína á störf Sjúkratrygginga í Fréttablaðinu fyrir nokkrum dögum síðan vegna málsins. Þar sakaði Hörður Sjúkratryggingar Íslands um að hafa framið brot við rannsókn málsins.
Þá segist hann enn vera á þeirri skoðun að starfsstétt ráðgjafa sé sýndur hroki í bréfi SÍ en það skipti ekki máli þegar upp sé staðið. „Ég var of fljótur á mér þegar ég gagnrýndi SÍ sem er bara að vinna sína vinnu,“ segir Hörður.
Valgerður Rúnarsdóttir, forstjóri Vogs staðfestir við Stundina að Hörður sé enn starfandi hjá SÁÁ en að málið sé til skoðunar þar. Hún segir að rannsókn á málinu hafi byrjað hjá SÁÁ þegar hún sá skrif Jódísar Skúladóttur alþingiskonu. Valgerður segist hafa sent Jódísi skilaboð og beðið um að fá að heyra í henni. „Ég spurði hvort sá sem hún væri að skrifa um væri starfsmaður hjá SÁÁ núna. Hún staðfesti það og þá fór af stað rannsókn á málinu hér hjá okkur. Atburðurinn sem Jódís segir frá átti sér stað áður en starfsmaðurinn kom til vinnu hjá SÁÁ, hins vegar var hann sannarlega að vinna hjá samtökunum þegar Jódís kom í meðferð eins og hún lýsir sjálf,“ segir Valgerður og bætir við að nú sé verið að skoða málið út frá starfseminni í dag. , ,Verklag í þessum málum er gjörbreytt hjá samtökunum en það er alltaf hægt að gera betur og læra af því sem gerst hefur í fortíðinni“ segir Valgerður Rúnarsdóttir, forstjóri Vogs.
Hörður J. Oddfríðarson sendi eftirfarandi tilkynningu eftir að Stundin birti frétt um málið síðdegis:
Yfirlýsing varðandi sögu Jódísar Skúladóttur alþingismanns
Jódís Skúladóttir, þingmaður VG, hefur greint frá atviki sem hún varð fyrir þegar hún var sautján ára og undirritaður þrítugur. Þremur árum eftir þetta atvik átti sér stað fór hún í meðferð og þá tók ég á móti henni, þá orðinn starfsmaður SÁÁ.
Ég fór sjálfur í meðferð skömmu eftir að þetta atvik átti sér stað og hóf störf hjá samtökunum skömmu síðar.
Ég rengi ekki frásögn Jódísar á nokkurn hátt og bið hana afsökunar því sem gerðist og þeim afleiðingum sem það hefur haft fyrir hana.
Ég er í samtali við mína yfirmenn hjá SÁÁ um framtíð mína og hef óskað eftir því að úttekt verði gerð á mínum störfum þar sl. 25 ár.
Akureyri 27. janúar 2022
Hörður J. Oddfríðarson
Valgerður Rúnarsdóttir, forstjóri Vogs, hafði samband við Stundina rétt í þessu og tilkynnti að Hörður væri kominn í leyfi frá störfum sínum fyrir SÁÁ.
Athugasemdir (2)