Lögreglan hefur ekki til rannsóknar mögulegt peningaþvætti og fjársvik í tengslum við morðið sem framið var í Rauðagerði 13. febrúar síðastliðinn. Þetta staðfestir Margeir Sveinsson, aðstoðaryfirlögregluþjónn. Margeir staðfestir jafnframt að albanskur karlmaður, sem er í haldi lögreglu, sé sá sem grunaður sé um morðið. Morðrannsóknin er langt komin og vonir standa til að hægt verði að senda málið til ákærusviðs innan fárra vikna.
Í lok febrúarmánuðar greindi Ríkisútvarpið frá því að það hefði heimildir þess efnis að samhliða rannsókn á morðinu í Rauðagerði væri lögreglan einnig að rannsaka mögulegt peningaþvætti og fjársvik í tengslum við málið. Margeir Sveinsson, aðstoðaryfirlögregluþjónn staðfestir í samtali við Stundina að svo sé ekki, hann viti ekki hvaðan Ríkisútvarpið hafi fengið þær upplýsingar. „Rannsókn á morðinu í Rauðagerði felur í sér rannsókn á morðinu,“ svaraði Margeir fyrirspurn blaðamanns. Þar að auki segir Margeir að ef svo væri, að peningaþvætti væri rannsakað samhliða, myndi hann ekki „endilega segja frá því ef svo væri“ eins og hann orðaði það, slíkar upplýsingar gætu varðað rannsóknarhagsmuni.
Albani grunaður um verknaðinn
Fjórtán hafa nú réttarstöðu sakbornings við rannsókn málsins. Meðal þeirra er albanskur karlmaður sem situr í gæsluvarðhaldi, grunaður um að hafa skotið fórnarlambið Armando Bequiri níu sinnum fyrir utan heimili sitt í Rauðagerði 28, á meðan þunguð kona hans var inn á heimilinu. Margeir segir að grunur lögreglunnar um að það hafi verið Albaninn sem varð Armando að bana hafi vaknað snemma við rannsókn málsins.
Lögreglan lagði nýlega hald á skotvopnið sem Albaninn á að hafa notað við verknaðinn. Rannsóknin er lang umfangsmesta morðrannsókn lögreglunnar til þessa en lögreglan hefur til þessa farið í húsleit á yfir 30 stöðum þar sem hún hefur lagt hald á muni, til að mynda bíla.
Rannsókn málsins að ljúka
Að sögn Margeirs bindur lögreglan vonir við að hægt verði að senda málið til ákærusviðs lögreglunnar innan tveggja til þriggja vikna þar sem rannsókn af hendi lögreglu fari senn að ljúka. Að sögn Margeirs það sem út af stendur af rannsókninni að miklu leyti það að ljúka við pappírsvinnu.
Þar sem rannsókn málsins fer að ljúka hjá lögreglu segir Margeir að næsta skref sé að boða fjölmiðla til fundar til að „ljúka málinu við fjölmiðla“. Lögreglan eigi eftir að taka saman hvað nákvæmlega verði farið yfir á þeim fundi og hvort að nýjar upplýsingar muni líta dagsins ljós.
Verjandi í samskiptum við aðra sakborninga
Stundin fjallaði nýverið um lögmann Anton Kristins Þórarinssonar, eins sakborninga í málinu, en skipun lögmannsins Steinbergs Finnbogasonar sem verjanda Antons var felld úr gildi af héraðsdómi Reykjavíkur og var sú ákvörðun staðfest af Landsrétti. Anton er eini Íslendingurinn með stöðu sakbornings í málinu. Eins og Stundin hefur fjallað um áður er Anton samkvæmt gögnum lögreglunnar talinn hafa verið „langstærsti fíkniefnabaróninn á Íslandi“. Gögnin sem um ræða var lekið í janúar síðastliðnum en þau benda til þess að hann hafi verið uppljóstrari lögreglu til fjölda ára.
Lögreglan telur Steinberg mikilvægt vitni í málinu þar sem fjarskiptagögn sýna fram á að hann hafði haft samskipti við aðra sakborninga áður en hann varð verjandi Antons. Steinbergur var lögmaður Antons áður en Anton óskaði eftir því að hann yrði skipaður verjandi en Steinbergur fullyrti við blaðamann Stundarinnar að samskipti hans við sakborninga, fyrir og eftir að morðið var framið, hafi verið í samræmi við skyldur hans sem lögmanns Antons til fjölda ára.
Margeir vill ekki staðfesta hvort Steinbergur hafi verið kallaður til skýrslutöku eða ekki í tengslum við að rannsókn málsins sé að ljúka. Ríkisútvarpið greinir þó frá í dag að samkvæmt heimildum þeirra hafi hann ekki verið boðaður til þessa.
Athugasemdir