Rannnsókn embættis landlæknis á tilkynningum um hugsanlegar alvarlegar aukaverkanir eftir bólusetningu við Covid-19 leiddi í ljós að í fjórum tilvikum af fimm var ekki eða mjög ólíklegt að um tengsl væri að ræða. Í einu tilviki var ekki hægt að útiloka tengsl með vissu en þó er líklegra að undirliggjandi ástand einstaklingsins hafi verið orsökin.

Þetta kom fram í máli Ölmu Möller landlæknis á upplýsingafundi embættis landlæknis og almannavarna nú áðan. Rannsóknin laut að fimm tilkynningum um alvarleg atvik, fjórum andlátum og einum alvarlegum veikindum. Tveir sérfræðingar í öldrunarlækningum fóru ítarlega yfir gögn og sjúkrasögu þessara fimm einstaklinga og lögðu mat á hvort að um hugsanleg orsakatengsl væri að ræða milli bólusetningar og umræddra alvarlegra atvika.

„Niðurstaða þeirra er að í fjórum þessara tilvika sé ekki eða mjög ólíklega um orsakatengsl að ræða en í einu tilviki var ekki hægt að útiloka tengsl með vissu, þótt líklega hefði andlátið fremur átt skýringar í undirliggjandi ástandi þess einstaklings,“ sagði Alma. Þeir læknar sem sinntu umræddum einstakling munu fá upplýsingar um rannsóknina og munu þá geta upplýst aðstandendur um niðurstöðurnar.

Þá var einnig kannað hvort andlát væru fleiri þessar vikur heldur en í venjulegu ári og var það ekki. Áfram verður fylgst með þeirri tölfræði. „Það verður að hafa í huga að íbúar hjúkrunarheimila landsins eru upp til hópa hrumir einstaklingar, með fjölda langvinnra sjúkdóma, fjöllyfjameðferð og færniskerðingu, og að meðaltali þá andast um átján einstaklingar úr þessum hópi á hverri viku,“ sagði Alma ennfremur.

Sendar voru fyrirspurnir til lyfjastofnuna Evrópu og Norðurlandanna um möguleg tengsl bólusetninga og alvarlegra atvika. Um fá dauðsföll hefur verið að ræða og almennt eru þau talin tengjast undirliggjandi sjúkdómum.

Alma sagði að áfram þurfi að vega og meta í hverju tilviki hvort bólusetja eigi eldri og hrumari einstaklinga, einkum ef ástand þeirra er nærri lífslokum. Einstaklingsbundið mat fer fram í hverju tilviki.