Kappræður Stundarinnar og Reykjavik Media með forsetaframbjóðendum standa nú yfir í Gaflaraleikhúsinu í Hafnarfirði. 

Sýnt er frá umræðunum í beinni útsendingu á Facebook en tekið er við spurningum áhorfenda í gegnum Facebook og Twitter. Þeir sem fylgjast með eru hvattir til að taka þátt í gegnum myllumerkið #kosningastundin.

Greint verður frá helstu tíðindum kvöldsins í beinu fréttastreymi hér að neðan. 

Kl. 21:28 – Kappræðunum er lokið. Stundin og Reykjavik Media þakka þeim sem hlýddu og sendu inn spurningar.

Kl. 21:27 – Lokaspurning: Ef þú værir ekki í framboði, hvern myndurðu kjósa? Sturla og Ástþór vilja ekki annan forseta en sjálfan sig en hinir eru jákvæðari í garð mótframbjóðenda sinna. Elísabet myndi kjósa Andra Snæ.

Kl. 21:20 – Nú er rætt um hitt og þetta. Hildur Þórðardóttir segir fjölmiðla slíta orð sín ítrekað úr samhengi, alhæfa og snúa út úr. Ástþór segist hafa bílainnflutning og ljósmyndun að atvinnu. Elísabet segir að kominn sé tími til að forsetinn geri ekki neitt. 

Kl. 21:10 – Í hraðaspurningum kom í ljós að allir forsetaframbjóðendur telja óréttlætanlegt að nota skattaskjól. Halla vill vera málsvari íslenskra fyrirtækja á erlendum vettvangi svo lengi sem það er gert á grundvelli góðra siðareglna. Hinir frambjóðendurnir eru á öðru máli, fyrir utan Sturlu Jónsson sem er sammála Höllu.

Kl. 21:04 – Forsetaframbjóðendurnir eru sammála um að hlúa verði betur að flóttamönnum sem leita hér hælis. Guðni vill almennt liðka fyrir komu útlendinga utan Evrópska efnahagssvæðisins til landsins. Ástþór varar hins vegar við því að Ísland taki á móti mörgum flóttamönnum og Guðrún vill leitast við að hjálpa þeim sem þegar eru komnir til Íslands. Elísabet segir framgöngu Íslendinga gagnvart flóttamönnum til háborinnar skammar.

Kl. 20:54 – Fimm hraðaspurningum er lokið og frambjóðendur hafa gert grein fyrir svörum sínum. Guðni Th. var aftur spurður hve mikið hann teldi kosningabaráttu sína hafa kostað. Hann sagði kostnaðinn hlaupa á milljónum en kosningabaráttuna varla hafa kostað meira en 20 milljónir.

Kl. 20:45 – Sturla Jónsson segist ekki aðeins ætla að leggja fram frumvarp um bann við verðtryggingunni heldur hafi hann líka áhuga á að breyta umferðarlögum.

Kl. 20:40 – Guðni Th. Jóhannesson segist vilja að forseti Íslands standi utan átakalína til hægri og vinstri og standi utan fylkinga og flokka. Aðspurður hvernig hægt sé að vera bæði félagshyggjumaður og frjálshyggjumaður segir Guðni að taka þurfi það besta úr öllu. Bæði eigi að reka gott velferðarkerfi sem haldi utan um alla og gefa fólki frelsi til að spreyta sig í lífinu. Þetta sé í samræmi við stefnu Sjálfstæðisflokksins og vinstriflokka og Pírata.

Kl. 20:26 – Fyrsta spurningin er frá Vigdísi Grímsdóttur rithöfundi. Spurt er hve miklu fé frambjóðendur hafi varið til kosningabaráttu sinnar. Elísabet Jökulsdóttir segir að líklega hafi hún fengið um 200 þúsund krónur frá vinum sínum á Facebook. Andri Snær Magnason segist vera með tvo starfsmenn í vinnu. Edda Heiðrún Backman hafi haldið uppboð til styrktar framboðinu auk þess sem tónlistarmenn hafi gefið vinnu sína. Guðrún Margrét segist telja að kostnaðurinn við framboð sitt sé innan við milljón. Hluti kostnaðarins sé vegna Dale Carnegie-námskeiðs sem hún sótti. Ástþór Magnússon segist ekki hafa þegið nein fjárframlög og ekki tekið saman hve mikið kosningabarátta sín hafi kostað. Guðni segir framboð sitt fjármagnað með frjálsum framlögum einstaklinga og fyrirtækja í samræmi við lög og reglur þar um. Reynt sé að halda kostnaði í lágmarki. Hildur Þórðardóttir fjármagnar sína kosningabaráttu með bókasjóði sem hún heldur utan um. Sturla Jónsson segir kosningabaráttu sína hafa kostað um 250 þúsund krónur, þar af hafi jakkafötin kostað 100 þúsund krónur. Halla segir kosningabaráttu sína hafa kostað einhverjar milljónir og hún hafi gengið á sparifé sitt frá því fyrir hrun. 

Kl. 20:18 – Umræðurnar eru hafnar og allir forsetaframbjóðendur hafa kynnt sig og sínar áherslur. Nú taka spurningar við.