Þessi færsla er meira en 7 ára gömul.
Sérlegur dagur borgarans
Það er ekki nóg að telja atkvæði, gera skoðanakannanir, rétta upp hönd og velja. Lýðræði er aðferð til að laða fram visku eða vilja fjöldans. Lýðræði er samræða þar sem leitað er heillavænlegra leiða fyrir alla til að halda áfram. Mannréttindi og lýðræði haldast í hendur, stjórnarfarið á að mótast af jafnræði og jafnrétti borgaranna.
Lýðræði krefst sterkrar vitundar borgaranna um gildin í samfélaginu. Lýðræði er aðferð sem krefst jafnframt góðra skilyrða í samfélaginu. Það krefst umhugsunar, tíma og gaumgæfilegra athugana, gagnsæis, virðingar og umfram allt náungakærleika.
Tími, virðing, hófsemd og ígrundun ásamt leikni í rökræðum eru forsendur fyrir lýðræðissamfélagi. Lýðræði er andstæðan við öfgar, meðalhófið á að vera við völd í lýðræðissamfélagi.
Lýðræði er ekki bein lína líkt og tímahugtakið á Vesturlöndum er oft táknað, lýðræði er fremur spírall sem vindur sér hægt upp eða niður.
Lýðræðið þarf nauðsynlega á öflugum almenningi að halda og borgararnir þurfa góðan vettvang þar sem viska fjöldans getur brotist upp á yfirborðið.
Borgarar geta látið til sín taka á margvíslegan hátt, þeir geta tekið valdið til sín ef þeir vilja og án þess að beita ofbeldi. Kraftmiklir borgarar geta steypt hverjum sem er af stóli með samstöðu sinni.
Lýðræðið getur reynst svifaseint en það er kostur sem getur komið í veg fyrir ýmsan óskunda og skyndiákvarðanir óraunsærra valdamanna. Lýðræði er ekki fyrir einn hóp umfram annan og þar af leiðandi skal jöfnuður ríkja í lýðræðissamfélagi.
Öflugur borgari lætur ekki telja úr sér kjarkinn heldur verður fullnuma, velur sér vettvang og byrjar starf sitt í þágu annarra. Það þarf löngun og ástríðu til að vinna að gæfu annarra. Það er rangt sem fólki er stundum talið trú um, að best sé að sitja áhyggjulaus heima og búast við þjónustu. Þá fyrst fer lúmsk spillingin á stjá.
Það minnsta hægt er að gera er að mótmæla fáviskunni, deila gæðunum með öðrum og berjast fyrir mannréttindum allra.
Dagur borgarans er ekki aðeins þegar kosið er, heldur alla daga, en segja má að dagurinn í dag sé sérstakur.
Teikning: Sirrý Margrét Lárusdóttir með texta um borgaravitund úr bókinni Hugskot, skamm- fram- og víðsýni eftir Friðbjörgu Ingimarsdóttur og Gunnar Hersvein.
Fleiri færslur frá höfundi
Tilfinningamál fyrir langreyðar
Umræða um aflífun hvala í landhelgi Íslands fór fram í Vikulokunum á Rás 1, laugardaginn 13. maí 2023. Þar voru ræddar sláandi niðurstöður í skýrslu Matvælastofnunar um meðferð á langreyðum, hvort réttlætanlegt væri að veiða hvali með þeim hætti sem gert er. Velferð þeirra er augljóslega fórnað fyrir óljósa hagsmuni en dauðastríðið er oft verulega langvinnt og sársaukafullt....
Furðulegt frumvarp um áfengislög kolfellur
Fréttafyrirsagnir um breytingar á áfengislögum, til að rýmka afgreiðslutíma Vínbúða og gefa þeim leyfi til að selja áfengi um helgar og á frídögum, eru á þessa leið: „Áfengis- og tóbaksverslun ríkisins setur sig ekki upp á móti frumvarpi þingmanna Framsóknarflokksins um rýmri afgreiðslutíma vínbúða.“ (RÚV) og „ÁTVR leggst ekki gegn rýmkun“ (MBL). „Afnám banns gæti rýmkað opnunartíma...
Barnamálaráðherra vs. dómsmálaráðherra
Forvarnir styðjast við lög og reglugerðir um hvað er leyfilegt og bannað og hvar mörkin liggja. Tilslökun á reglum sem tengjast alkóhóli geta þurrkað út árangur sem hefur fengist með forvörun. Nefna má að í könnun árið 1995 kom fram að 80% tíundu bekkinga höfðu smakkað áfengi. Ný könnun sýnir að 30% tíundu bekkinga hafa smakkað áfengi. Þessi árangur getur...
Áramótaheitin: 3. Að hætta að drekka áfengi
Við áramót er vinsælt að stíga á stokk og strengja þess heit að hætta einhverju eða byrja á einhverju. Hér er pistill handa þeim sem langar til að hætta að drekka áfengi en það er enginn skortur á ástæðum og rökum fyrir slíkri ákvörðun. Alkóhól er ávanabindandi efni og neyslan er samofin samskiptum í samfélaginu, það telst því töluverð áskorun...
Athugasemdir