Viðræðum um nýja hægri stjórn Viðreisnar, Bjartrar framtíðar og Sjálfstæðisflokks hefur nú verið slitið. Líklegt er að stjórnarmyndunarumboðið færist nú til Katrínar Jakobsdóttur, formanns VG.
Boðað hefur verið til fundar á Bessastöðum klukkan fimm í dag, þar sem Bjarni Benediktsson hittir Guðna Th. Jóhannesson forseta.
Óttarr útskýrir á Facebook að Björt framtíð hafi staðið fast á prinsipum í viðræðunum.
Pawel Bartoszek, þingmaður Viðreisnar, segir á Facebooksíðu sinni að Bjarni Benediktsson hafi slitið viðræðunum: „Stjórnarmyndunarviðræðum DAC var slitið af Bjarna Benediktssyni fyrr í dag. Við fórum í þessar viðræður bjartsýn og með áherslu á ákveðin málefni. Því miður reyndist bilið, sérstaklega í sjávarútvegsmálum, óbrúanlegt að sinni.“
Bjarni vill breiðari skírskotun
Í tilkynningu frá framkvæmdastjóra þingflokks Sjálfstæðismanna kemur ekki fram hvar ágreiningurinn lægi: „Fundir flokkanna að undanförnu hafa leitt í ljós góðan samhljóm um ýmis mál, en áherslumun um útfærslu annarra, enda stefna flokkanna ólík á ýmsum sviðum,“ segir þar.
Haft er eftir Bjarna í fréttatilkynningunni að málefnagrunnurinn hafi ekki staðist. „Ég tel að samtöl undanfarinna daga hafi leitt í ljós að það væri afar óvarlegt að leggja af stað með þann málefnagrunn sem um er rætt og nauman meirihluta inn í kjörtímabilið. Margt segir mér að aðstæður kalli á ríkisstjórn með breiðari skírskotun og sterkari meirihluta en þann sem þessir þrír flokkar geta boðið. Ég útiloka ekkert fyrirfram í þeim efnum.“
Vildu raða í ráðherraembætti
Samkvæmt fréttum Kjarnans og DV stóð Sjálfstæðisflokkurinn gegn því að bjóða upp aflaheimildir á markaði, eða svokallaðri uppboðsleið. Bæði Viðreisn og Björt framtíð höfðu á stefnuskrá sinni að fara markaðsleið með fiskveiðistjórnunarkerfið.
Þá kemur fram hjá DV að Sjálfstæðisflokkurinn hafi strax viljað raða í ráðherraembætti.
Björt Ólafsdóttir sagði í samtali við Stundina í gærkvöldi að ótímabært væri að ræða ráðherraembætti.
„Það er ekki komið á það stig. Það er ekki tímabært að ræða fyrr en öll málefni eru „in the clear“. Og við erum ekki komin þangað. Ég veit ekki einu sinni hvort ég vilji verða ráðherra. Við erum lítill þingflokkur. Kannski væri Óttarr bara mjög góður forseti þingsins. Eða hvað. Þetta er bara svo ótímabært hjá okkur.“
Sjávarútvegsmálin stóðu í veginum
„Tekið verði upp markaðstengt auðlindagjald í sjávarútvegi. Íslendingar beiti sér af afli gegn mengun hafsins varðandi þrávirk efni og aðra mengunarvalda,“ segir í stefnu Viðreisnar.
Björt framtíð styður einnig markaðsleið. „Við viljum byggja á aflamarkskerfi, en nýta markaðinn til að greinin greiði sanngjarnt gjald fyrir aðgengið að miðunum. Um leið geta nýir aðilar haslað sér völl án þess að kaupa veiðiheimildir af öðrum í greininni, í samræmi við álit mannréttindanefndar SÞ.“
Sjálfstæðisflokkur viðheldur kvótakerfinu
Sjálfstæðisflokkurinn hefur verið andvígur uppboðsleiðinni og vill að núverandi eigendur kvótans haldi honum, nema þeir kjósi að áframselja hann. Aðstoðarmaður Bjarna Benediktssonar, nýkjörni þingmaðurinn Teitur Björn Einarsson, er einn meðlima málefnahóps Sjálfstæðisflokksins í viðræðunum. Hann skrifaði meðal annars grein í ágúst þar sem hann gagnrýndi uppboðsleiðina út frá því að hún gæti raskað byggð í landinu.
Í stjórnmálaályktun Sjálfstæðisflokksins er skýrt kveðið á um að núverandi kvótakerfi verði viðhaldið.
„Tryggja þarf stöðugleika í rekstrarumhverfi íslensks sjávarútvegs á grundvelli núgildandi aflamarkskerfis svo greinin haldi áfram að vaxa á grundvelli sjálfbærrar nýtingar fiskistofna. Í skjóli öflugs sjávarútvegs vex nýsköpun og vöruþróun. Grundvöllur arðsemi sjávarútvegs mun byggja á samþættingu veiða, vinnslu og markaðar. Góðar samgöngur innanlands og milli landa eru forsenda þess að tryggja gæði og afhendingaröryggi sjávarafurða“.
Fleiri ríkisstjórnir í boði
Vinstri grænir gætu myndað tvær fimm flokka ríkisstjórnir án Sjálfstæðisflokksins, annars vegar með Viðreisn, og hins vegar Framsóknarflokki.
Benedikt Jóhannesson, formaður Viðreisnar, hefur hins vegar lýst því yfir að hann vilji ekki „Píratabandalag“.
Stjórn með Framsókn: VG (10)+Píratar (10)+Framsókn (8)+Björt framtíð (4) og Samfylking (3): 35 þingmenn
Stjórn með Viðreisn: VG (10)+Píratar (10)+Viðreisn (7)+Björt framtíð (4) og Samfylking (3): 34 þingmenn.
Athugasemdir