Íþrótta- og Ólympíusamband Íslands fékk árið 2014 ríflega þrjár milljónir króna í styrk frá Bjarna Benediktssyni fjármálaráðherra úr svokölluðu skúffufé, ráðstöfunarfé ráðherra. Þetta kemur fram í úttekt Vísis um skúffufé ráðherra. Bjarni varði jafnframt nærri fimmtungi ráðstöfunarfé síns í fyrra með því að styrkja hinn umdeilda tónlistarmann Sverrir Stormsker um 250 þúsund krónur.
Styrkur Bjarna til ÍSÍ er stærsti einstaki styrkur allra ráðherra ríkisstjórnarinnar allt núverandi kjörtímabil en utan þessa hefur Bjarni verið einna sparsamastur meðal ráðherra á ráðstöfunarfé sitt. Forseti ÍSÍ er Lárus Blöndal, einn helsti trúnaðarmaður Bjarna undanfarin ár. Lárus var í sumar skipaður af Bjarna stjórnarformaður hjá Bankasýslu ríkisins. Lögfræðistofan Juris, þar sem Lárus er meðeigandi, hefur enn fremur fengið tugi milljóna króna frá fjármálaráðuneytinu fyrir ráðgjöf og aðkeypta þjónustu.
RÚV greindi frá því í desember að lögfræðistofan hafi sent inn reikninga til ráðuneytisins upp á rúmlega 64 milljónir króna á tímabilinu janúar 2014 til upphaf síðastliðins nóvembermánaðar. Um var að ræða tvær greiðslur, annars vegar 11,3 milljónir króna vegna málflutnings fyrir EFTA-dómstólnum og hins vegar um 53 milljónir vegna þjóðlendumála. Lárus var auk þessa fulltrúi stjórnarandstöðunnar í samninganefnd Íslands um Icesave.
Ótengt tengslum
Í samtali við Stundina upplýsir Lárus að umræddur styrkur hafi verið vegna gjöf frá Alþjóðaólympíunefndinni. Nefndin hafi gefið ÍSÍ bíl að því gefnu að innflutningstollar féllu niður. Fjármálaráðuneytið hafi borgað skattinn með ráðstöfunarfé ráðherra. Athygli vekur þó að umræddur bíll, Daimler-Benz smárúta, hefur verið lengi á leiðinni til Íslands. Bíllinn er fyrst nefndur í fundargerðum ÍSÍ árið 2011. „Forseti skýrði einnig frá því að Alþjóðaólympíunefndin - IOC hefur ánafnað ÍSÍ Daimler-Benz smárútu en ÍSÍ hefur lengi verið á biðlista vegna þessa samstarfsverkefnis IOC og Daimler-Benz. Óska þarf eftir niðurfellingu á tollum og aðflutningsgjöldum vegna bílsins,“ segir í fundargerð 188. fundar framkvæmdastjórnar ÍSÍ frá árinu 2011.
Tveimur árum síðar eða í september árið 2013 er greint frá því í fundargerð að bíllinn sé kominn til landsins en ekki sé búið að vinna tollafgreiðslu hans. Í ársskýrslu 2015 er svo greint frá því að bíllinn hafi komið til landsins í upphafi 2014: „Fjármálaráðuneyti veitti ÍSÍ styrk til mæta kostnaði við aðflutningsgjöldum vegna innflutnings á bifreiðinni en skilyrði IOC fyrir gjöfinni var að ÍSÍ yrði ekki fyrir neinum gjöldum vegna innflutnings á bifreiðinni.“ Innflutningsgjöldin voru samtals 3.226.417.
Lárus segir tengsl sín við Bjarna ekki koma styrknum við. Lárus kannaðist fyrst ekki við nein tengsl við Bjarna. „Ég þekki manninn ágætlega en það eru engin þannig tengsl. Það kemur þessu máli ekki neitt við, forsendan fyrir gjöfinni af hálfu Alþjóðaólympíunefndin var að það séu ekki lagðir tollar á þetta og það kemur styrkur þarna á móti. Þetta er bara umsókn frá ÍSÍ sem er forsenda þess að gjöfin fáist og þetta hefur verið gert í ýmsum löndum,“ segir Lárus.
Sverrir fékk styrk
Líkt og fyrr segir fékk Sverrir Stormsker styrk frá Bjarna í fyrra, 250 þúsund krónur vegna afmælisútgáfu hljómdisks. Sverrir samdi meðal annars Eurovision-framlag Íslendinga árið 1988 en hefur í seinni tíð helst verið þekktur fyrir pólitísk skrif á bloggsvæði sínu. Síðastliðið haust var Sverrir nokkuð tíður gestur á Útvarpi Sögu en í nóvember hrósaði hann Bjarna Benediktssyni sérstaklega í útvarpsþættinum Fegurð og heilsa. „Nei, nei. Ég hef aldrei til dæmis drullað yfir Bjarna Ben. Ég hef ekki drullað yfir Sigmund Davíð. Ég hef ekki séð neina ástæðu til þess því þeir eru að reyna að gera ágætis hluti. Ég er ekki að drulla yfir alla, alls ekki,“ hefur Útvarp Saga eftir Sverri.
Í sumar fjallaði Stundin um bloggskrif Sverris, sem gengur einnig undir nafninu Serðir Monster, þar sem hann uppnefndi og gerði grín að málfari Salmans Tamimi, formanns Félags múslima á Íslandi. Þá hélt Sverrir því fram að múslimar hafi gert Svíþjóð að mesta „nauðgunarbæli“ heims og sagði meirihluta múslima í Evrópu styðja ISIS. Báðar eru staðhæfingar sem standast ekki fyllilega skoðun.
„Hr. Mansal Tamimi. Eins og þú getur kannski séð - þá er ég lítillega blyndur. Skryfblyndur. Ég segi og skrifa: Skuðbrundur. Þarna kom þetta rétt. Ég vil frekar nota orðið „skeyti“ en „bréf“ þegar ég skrifa til múslima. Held að þið eigið auðveldara með að skilja það. Við vesturlandabúar tölum um flugpóst en þið talið líklega um flugskeyti. Það er svona nær ykkar siðmenningu. Hvað um það,“ skrifaði Sverrir.
Athugasemdir