Vinnudegi kvenna ætti að ljúka á hverjum degi klukkan 14.38. Á þeirri mínútu væru konur búnar að vinna fyrir sínum launum, fengju þær sömu laun greidd fyrir störf sín og karlmenn. Meðalatvinnutekjur kvenna eru nú 70,3 prósent af meðalatvinnutekjum karla. Á þeim hraða sem launamunur hefur dregist saman þyrftu konur að bíða fram til ársins 2068, í 52 ár, eftir því að fá sömu laun og karlar.
Þessi framtíðarsýn þykir samtökum launafólks og samtökum kvenna óásættanleg og hafa því boðað til samstöðufundar á Austurvelli undir yfirskriftinni kjarajafnrétti strax. Þetta verður í fjórða sinn sem blásið er til kvennafrídags. Það var fyrst gert 24. október árið 1975. Þá lögðu þúsundir kvenna um land allt niður störf til að sýna fram á mikilvægi vinnuframlags þeirra. Tíu árum síðar var Kvennasmiðja opnuð dagana 24.–31. október, árið 2005 lögðu tugþúsundir kvenna niður störf klukkan 14.08 og árið 2010 gengu þær út klukkan 14.25. Í ár á að pakka saman klukkan 14.38 en fundurinn sjálfur hefst klukkan 15.15 á Austurvelli.
Athugasemdir