Þórður Snær Júlíusson
Að tapa samfélagi en vera settur á bið
Grindvíkingar standa frammi fyrir nokkrum tegundum martraða. Grundvöllur samfélagsgerðar þeirra hefur tapast, margir hafa miklar fjárhagsáhyggjur og framtíðin er í gríðarlegri óvissu. Sú staða sem er uppi í dag á ekki að vera óvænt. Öll viðvörunarljós fóru að blikka fyrir mörgum árum. Stjórnvöld hafa hins vegar neitað að taka stöðuna jafnalvarlega og þörf var á. Þess vegna eru þau nú upp við vegg, nývöknuð af vondum draumi og ráðalaus gagnvart sjálfsögðum kröfum Grindvíkinga, og þorra almennings í landinu, um áræðnar og fumlausar aðgerðir.