Hvernig vildi það til að íslenskur rannsóknarblaðamaður gerðist ritstjóri Wikileaks, heimsþekktra en umdeildra samtaka sem hafa hrist upp í hverju valdakerfinu á fætur öðru og afhjúpað spillingu og lögleysu með birtingu leynigagna? Til þess að útskýra það er nauðsynlegt að fara rúmlega tíu ár aftur í tímann, aftur til janúar 2009, þegar búsáhaldabyltingin stóð sem hæst og Kristinn Hrafnsson var sjónvarpsfréttamaður á Stöð 2. Þar starfaði hann við fréttaskýringaþáttinn Kompás og hafði um nokkurt skeið verið að vinna í frétt um Robert Tchenguiz, breska fjárfestinn sem hafði verið gríðarlega stór lántakandi í íslensku bankakerfi á árunum fyrir hrun. Upplýsingarnar sem Kristinn hafði undir höndum sýndu að flestar fjárfestingar Tchenguiz fóru í gegnum aflandsfélög og höfðu lítil sem engin veð á bak við sig. Til stóð að flytja þáttinn á mánudagskvöldi og því hafði Kristinn samband við fréttastjóra og óskaði eftir aðstoð fréttastofunnar við að kynna það sem í vændum var. …