Páll L. Sigurjónsson, hótelstjóri og fyrrverandi hluthafi í KEA-hótelum, hagnaðist um tæplega 173 milljónir króna í eignarhaldsfélagi sínu Selen ehf. árið 2017 þegar félag hans seldi hlutabréf í KEA-hótelum. Fjárfestar frá Alaska komu þá inn í eigendahóp KEA-hótela.

Þetta er 42-föld árslaun launþega á þeim taxta, 340 þúsund krónur, sem stéttarfélagið VR gerir nú kröfu um að verði skilgreind lágmarkslaun fyrir félagsmenn þess. Ef gert er ráð fyrir því að starfsævi sé 42 ár, til dæmis frá 26 til 68 ára, þá er um að ræða ævilaun starfsmanns sem fær greidd laun samkvæmt þessum taxta. 

Mynd: Stundin/Jón Ingi

Hagnaður hótellaHagnaður nokkurra hótelkeðja á árunum 2010 til 2017 sést hér. Hagnaður KEA sést á bláu línunni.

Mynd: Stundin/Jón Ingi

Veitir ekki viðtal

Stundin hefur gert ítrekaðar tilraunir frá því í síðustu viku til að ná viðtali við Pál um rekstur KEA-hótela þar sem verkföll Eflingar og VR beinast meðal annars að þessari hótelkeðju  þar sem félagsmenn þeirra eru þar í vinnu.

Páll hefur hins vegar birst í viðtölum við aðra fjölmiðla, meðal annars við Stöð 2 á föstudaginn, á verkfallsdegi, þar sem hann meðal annars sást þrífa klósett vegna verkfalla starfsmanna KEA-hótela. 

Ein af lykilspurningunum er hvort félag eins og KEA-hótel hafi forsendur til að greiða þau lágmarkslaun sem stéttarfélag eins og VR krefst en um er ræða 342 þúsund króna lágmarkslaun sem eiga að hækka um rúmlega næstu þrjú árin og enda í 425 þúsund. 

Söluhagnaður hlutabréfa bætist við 830 milljóna arð

Eins og Stundin fjallað um fyrir helgi hafa eigendur KEA-hótela hagnast vel á hótelkeðjunni á liðnum og skiptu fjórir eigendur keðjunnar, þeir Andri Gunnarsson, Páll L. Sigurjónsson, Fannar Ólafsson, Kristján M. Grétarsson og Þórður Kolbeinsson meðal annars með sér nærri 1800 milljónum króna sem greiddar voru út úr sameiginlegu eignarhaldsfélagi þeirra Tröllahvönn ehf. árið 2017. Síðastliðin 8 rekstarár, frá 2010 til 2017, nemur hagnaður KEAö-hótela rúmlega 2 milljörðum króna og hluthafarnir hafa greitt út 830 milljónir króna í arð. Við bætist svo söluhagnaður af hlutabréfum, eins og sá sem myndaðist inni í Selen eða Tröllahvönn árið 2017, og eins hagnaður áðurnefndra fjögurra hluthafa þegar þeir seldu Landsbréfum hlut í KEA-hótelum árið 2015.

„Við siglum í strand bara 
á fyrstu dögunum“ 

KEA-hótel hafa því verið frábær fjárfesting fyrir þessara einstaklinga og þeir hafa grætt vel á henni. Ein af spurningunum er hvort þessi gróði hafi meðal annars verið vegna lágra launa starfsmanna KEA-hótela. 

Greiddi út 30 milljóna arð

Í viðtali við Morgunblaðið nú í mars sagði Páll Sigurjónsson meðal annars: „Auðvitað virðum við verkfallsbaráttu starfsfólks okkkar. En fyrir okkur sem rekstraraðila þá er staðan auðvitað háalvarleg. Og við gerum þær kröfur til aðila að þeir fari að setjast niður til að semja.“

Í viðtali við fjölmiðla árið 2015, þegar einnig voru horfur á verkföllum, sagði Páll að loka þyrfti KEA-hótelum ef til verkfalla kæmi: „Komi til allsherjarverkfalls hérna á þessu svæði, þá er það mjög einfalt hvað gerist hjá okkur. Við siglum í strand bara á fyrstu dögunum.“ Hagnaður KEA-hótela árið 2015 nam 250 milljónum og árið eftir, 2016, fór hagnaðurinn upp í nærri 750 milljónir króna. 

Eftir að eignarhaldsfélag Páll hagnaðist um áðurnefndar 170 milljónir við sölu bréfa í KEA-hótelum greiddi eignarhaldsfélag Páls út 30 milljóna króna arð til hans en eftirstöðvar hagnaðarins urðu eftir inni í félaginu. 

Næsta verkfallslota verkalýðshreyfingarinnar hefur verið boðið á fimmtudaginn kemur.