Aðeins um 12 prósent landsmanna eru ánægð með tekjuskattskerfið á Íslandi en 47 prósent eru óánægð. Óánægjan er afgerandi hjá lágtekju- og millitekjufólki en miklu minni hjá hátekjufólki. Þetta er niðurstaða skoðanakönnunar sem Maskína vann fyrir Stundina í janúar.
Könnunin sýnir einnig um 73 prósenta stuðning meðal almennings við stighækkandi tekjuskatt þar sem háar tekjur eru skattlagðar af meiri þunga en lágar tekjur. Meirihluti kjósenda allra flokka nema Sjálfstæðisflokksins er hlynntur slíku kerfi.
Svarendur Maskínu eru 1.410 talsins og koma úr Þjóðgátt fyrirtækisins sem er panelhópur fólks sem er dreginn handahófskennt úr þjóðskrá. Gögnin eru vigtuð með tilliti til kyns, aldurs og búsetu.
Langmest ánægja með núverandi tekjuskattskerfi er hjá hátekjufólki, þeim svarendum sem eru með meira en 1,2 milljóna tekjur á mánuði, en minnst ánægja er meðal þeirra sem lifa á tekjum undir 400 þúsund krónum. 22,2 prósent þeirra sem tilheyra hátekjuhópnum segjast almennt ánægð með tekjuskattSkerfið en aðeins 7,4 prósent þeirra sem tilheyra lágtekjuhópnum. 59,3 prósent lágtekjufólksins eru beinlínis óánægð með kerfið en helmingi færri úr hópi hátekjumanna eru óánægðir, eða 28 prósent.
Alls vilja 72,8 prósent svarenda að hæstu tekjur beri hærra tekjuskattshlutfall en aðrar tekjur en aðeins 22,3 prósent eru mótfallin því. Stuðningur við flata kerfið er mestur meðal kjósenda Sjálfstæðisflokksins (47,3 prósent), Miðflokksins (35,2 prósent) og Viðreisnar (31,7 prósent). Við samanburð á afstöðu tekjuhópa kemur í ljós að stuðningur við stighækkandi tekjuskatt er minnstur meðal fólksins sem er með hæstu tekjurnar en þó hátt í 60 prósent.
Athugasemdir