Þó að oft sé ódýrara fyrir Íslendinga að sækja sér læknisþjónustu erlendis getur ferlið verið kvíðavaldandi og samskiptaörðugleikar flækt málin verulega. Eysteinn Harry Sigursteinsson komst að þessu að eigin raun, en hann fór tvær ferðir til Póllands í fyrra til að fá svokallaðan tannplant fyrir lægri upphæð en sambærileg aðgerð kostar á Íslandi.

Tannplant (e. implant) er skrúfa gerð úr títanmálmi, sem sett er í bein og þjónar sem rót fyrir nýja tönn. „Þetta var algjört flopp hvað varðar samskipti,“ segir Eysteinn um reynslu sína af tannlæknastofunni sem hann leitaði fyrst til. „Það hefði átt að hringja einhverjum bjöllum að læknirinn talaði ekki góða ensku. En þetta var mjög streituvaldandi.“ 

Birgitta Sigursteinsdóttir, leikstjóri og systir Eysteins, gerði ferð bróður síns að viðfangsefni í heimildarmynd sinni „Pólska tönnin“ sem nú er aðgengileg á YouTube. „Fólk hefur mikinn áhuga á þessu málefni og margir um þessar mundir í hugleiðingum um hvort borgi sig að fara til útlanda í þessum erindargjörðum,“ segir Birgitta. „Umræðan hefur líka verið svolítið einhliða lofræða um hvað þetta er sniðugt en eins og kemur fram í myndinni getur maður lent í svikum og mikilvægt að fólk taki það inn í dæmið.“

Læknirinn reyndist í Egyptalandi

Eysteinn starfar sem vélvirkjameistari í álverinu í Straumsvík. Í fríi í Póllandi með fjölskyldunni ákvað hann að leita sér tannlæknaþjónustu hjá klíník sem var í samstarfi við hótelið þeirra samkvæmt heimasíðu.