Reykjavíkurborg ætti að stuðla að því með markvissum hætti að fjölga þeim dagforeldrum sem starfa tveir og tveir saman. Það væri meðal annars hægt að gera með því að bjóða dagforeldrum húsnæði í eigu borgarinnar á hóflegu leiguverði undir daggæsluna.
Þetta er meðal tillagna um endurskoðun og þróun á dagforeldrraþjónustu í Reykjavík sem starfshópur um málið hefur skilað. Meðal annarra tillagna sem starfshópurinn leggur til eru að niðurgreiðslur til dagforeldra hækki í áföngum þannig að kostnaður foreldra með börn hjá dagforeldrum verði sambærilegur við það ef börn eru á leikskóla. Lagt er til að miðurgreiðslurnar verði hækkaðar um fjórðung í fyrsta áfanga, um tæpar 14 þúsund krónur á mánuði. Skúli Helgason, formaður skóla- og frístundaráðs segir að ekkert sé hægt að nefna um tímasetingar í þessum efnum, fara verði yfir tillögurnar og meta kostnað við þær og taka umræðu áður en slíkt verði hægt. Skúli segir jafnframt að á fundi skóla- og frístundaráðs í gær hafi verið samþykkt að láta sviðsstjóra vinna innleiðingaráætlun sem komi til meðferðar á næsta fundi ráðsins í ágúst. Með slíkri innleiðingaráætlun verði tillögurnar endanlega kostnaðarmetnar, þeim forgangsraðað og eftir atvikum áfangaskipt.
Þá er lagt til að veittur verði 200 þúsund króna aðstöðustyrkur árlega til dagforeldra til að mæta kostnaði við húsnæði og aðbúnaðar. Sömuleiðis verði veittur 300 þúsund króna stofnstyrkur til að ýta undir nýliðun í starfsstéttini.
Auk þessa verði framlög borgarinnar hækkuð vegna grunnnámskeiðs fyrir verðandi dagforeldra, að dagforeldrar fái greiddan kostnað vegna slysavarna- og eldvarnarnámskeiða og að ýtt verði undir símenntun og faglegt samstarf við leikskólana.
Aðrar tillögur starfshópsins snúa að því að bæta upplýsingagjöf af hálfu dagforeldra, að ytra mati og öryggi í starfseminni, ráðgjöf og miðlægri innritun barna til dagforeldra.
Reykjavíkurborg hefur á undanförnum misserum opnað ungbarnadeildir við leikskóla í borginni og stefnt er að því að enn fleiri slíkar taki til starfa á þessu ári. Í haust er stefnt að því að fjórtán slíkar verði starfandi, við tíu leikskóla. Spurður hvort að það sé framtíð í því að breyta dagforeldrakerfinu í þessu samhengi og hvort ekki standi til að opna ungbarnadeildir í öllum leikskólum borgarinnar svarar Skúli hvoru tveggja játandi. „Það er stefnan að bjóða upp á ungbarnadeildir í öllum leikskólahverfum. Við erum hins vegar að koma til móts við að þarfir foreldra eru mismunandi. Mikill meirihluti foreldra kýs að vera með sín börn á leikskólum en það er ákveðinn, umtalsverður hópur sem að velur frekar að dagforeldra valkostinn ef báðir eru í boði. Það er töluverður munur á greiðslum sem inna þarf af hendi og því er mjög rökrétt tillaga starfshópsins að hækka greiðslur til dagforeldra, þó að tillagan um hækkunina sé býsna róttæk. Við höfum nálgast þetta þannig að það sé mikilvægt að foreldrar hafi val um hvorn kostinn þeir taki og því sé mikilvægt að bæði kerfi séu til á sama tíma.“
Athugasemdir