Leynilega fjármagnaða áróðurssíðan Kosningar virðist hafa dregið víglínurnar, ef marka má nýjasta myndband síðunnar: Donald Trump er góði kallinn og Krakkafréttir á Rúv eru vondi kallinn.
Samkvæmt myndbandinu, sem birt var í dag, eru Krakkafréttir hluti af áróðri gegn Donald Trump, Sjálfstæðisflokknum og Sigmundi Davíð Gunnlaugssyni, sem þurfi að stöðva.
Ekki er vitað hver fjármagnar gerð myndbandanna og auglýsingabirtingar á þeim, en í myndbandinu er niðurstaðan sú að Trump hafi fengið ómaklega umfjöllun í Krakkafréttum. Tilgreint er að Trump hafi tekist að „afvopna einn versta einræðisherra heims“.
Ekki er fyllilega ljóst hvernig Trump náði að afvopna Kim Jong-un, en gagnrýnt hefur verið, þó ekki í Krakkafréttum, að Trump hafi með fundi sínum með einræðisherranum í raun gefið honum og stjórnarfari hans ákveðið heilbrigðisvottorð.
Trump hrósaði Kim á blaðamannafundi eftir viðræður þeirra, sérstaklega fyrir „hörku“. Hann sagði Kim vera „very smart“ og „very talented“ og það sjáist af því að hann hafi náð að halda styrkum höndum utan um Norður-Kóreu - „run it tough“.
Hann hefur áður hrósað Duterte, forseta Filippseyja, fyrir átak sitt í fíkniefnamálum, en það fól í sér að taka af lífi tugþúsundir meintra fíkla og fíkniefnasala án dóms og laga.
Myndbandið: Krakkafréttir eru að mati aðstandenda síðunnar með óréttmætan áróður gegn Trump.
Umfangsmikill áróður til að breyta landinu
Fyrir íslensku alþingiskosningarnar 2017 voru áróðursmyndbönd frá síðunni Kosningar, sem þá hét Kosningar 2017, spiluð hátt í tvisvar sinnum á hvert mannsbarn á Íslandi á Youtube. Til viðbótar voru myndböndin spiluð ríflega 1,2 milljón sinnum á Facebook fyrir síðustu alþingiskosningar. Hversu stór hluti birtinganna var kostaður með auglýsingafé hefur ekki fengist uppgefinn, og Facebook neitar að svara spurningum um síðuna eða aðstandendur hennar. Í kjölfarið spratt upp önnur síða, Kosningavaktin, sem beindi spjótum sínum að Sjálfstæðisflokknum, en með mun minni framleiðslu og takmarkaðri dreifingu.
Efni myndbanda Kosninga gefur hins vegar skýrt til kynna hverjir eru álitnir óæskilegir í stjórnmálum af aðstandendum síðunnar. Þannig beindist efni þeirra gjarnan gegn Pírötum fyrir kosningarnar 2017 og bæði Vinstri grænum, Samfylkingunni og Viðreisn. Auk þess hefur efnið beinst gegn einstöku fjölmiðlafólki sem fjallað hefur gagnrýnið um viðskipti formanns Sjálfstæðisflokks og Miðflokksins.
Ekki ólöglegt - enda engin lög sett
Forsætisráðuneytið komst að því við athugun sína, sem birt var í vikunni, að ekki væri hægt að komast að því hverjir fjármögnuðu þessar leynilegu áróðurssíður. Og að þær væru ekki ólöglegar svo vitað sé. Kannski vegna þess að engin lög hafi verið sett gegn þeim?
Þess ber að geta að lögbundið er að fjárframlög til stjórnmálaflokka og -frambjóðenda séu gerð opinber, en einföld og áhrifarík leið fram hjá því er að fjármagna gerð áróðursauglýsinga.
Víða um heim eru við lýði lög sem skylda aðila sem birta stjórnmálaauglýsingar til að tilgreina hver borgaði fyrir þær.
Hér er látið í veðri vaka að vandinn sé minni, vegna þess að um sé að ræða innlenda styrkjendur en ekki erlent yfirvald.
Bæði Bjarni Benediktsson, formaður Sjálfstæðisflokksins, og Sigmundur Davíð Gunnlaugsson, formaður Miðflokksins, beindu sjónum síðan að fjölmiðlum sem vandamálinu, þegar umræða var um hulduauglýsingar gegn stjórnmálamönnum eftir alþingiskosningarnar í fyrra.
Formennirnir hafa áhyggjur af fjölmiðlum
Sigmundur sagði í Silfrinu á RÚV að umræðan væri svo lituð af „persónulegu níði“ um stjórnmálamenn að konur treystu sér síður í stjórnmál. „Ég hef orðið fyrir vonbrigðum með fjölmiðlana,“ sagði Bjarni síðan. Báðir hafa verið til umfjöllunar í fjölmiðlum vegna viðskipta sinna, Sigmundur vegna leynilegs hagsmunaáreksturs sem hann sagði rangt til um, og Bjarni vegna ýmissa rangra upplýsinga sem hann gaf upp varðandi viðskipti sín fyrir hrun, og hvernig hann náði að koma undan miklum fjármunum af hlutabréfa- og skuldabréfamarkaði þegar hann seldi bréf sín tengd Glitni banka skömmu fyrir hrun, eftir að hafa fengið upplýsingar um slæma stöðu bankans sem kjörinn fulltrúi og átt fund með bankastjóra Glitnis um vanda hans. „Ég get alveg sagt að mér fannst sumir fjölmiðlar, fyrir þessar kosningar, bara tapa sér í stemningunni yfir næsta skandal. Og það kemur svona heilt yfir betra jafnvægi á þetta,“ sagði Bjarni.
Við sama tækifæri sagði Eyþór Arnalds, eigandi fjórðungshlutar í útgáfufélagi Morgunblaðsins og síðar leiðtogi Sjálfstæðisflokksins í Reykjavík, að vandamálið væri ekki bara nafnlausu auglýsingarnar, heldur væri „umræðan í heild rosalega rætin“. Þá varaði hann við „slúðurpressu“ og „neikvæðri pressu“ sem „ráðist á manninn“. Eitt af myndböndum nafnlausu síðunnar fyrir sveitarstjórnarkosningarnar í ár beindist sérstaklega að höfuðkeppinauti Eyþórs, Degi B. Eggertssyni, en það náði minni útbreiðslu en myndböndin fyrir alþingiskosningar.
Nú eru það Krakkafréttir
En í nýjasta myndbandinu er sem sagt fjallað um Krakkafréttir sem óvininn. „Haldið áróðrinum frá börnunum okkar!“ segja aðstanendur síðunnar Kosningar í myndbandinu til varnar Donald Trump. Það er hins vegar ljóst að íslensk börn hafa horft á mörg myndbönd frá síðunni, með sjálfspilandi milli barnamyndbanda, fjármögnuðum af hulduaðilum til að hafa áhrif á skoðanir, þar sem íslenskir stjórnmálamenn eru tengdir við hryðjuverk og ýmislegt annað misjafnt, með dramatískum myndbirtingum og jafnvel lekandi blóði, án þess að vitað sé hver fjármagnar það eða ber ábyrgð á efninu.
En hverra hagsmuna er verið að gæta þegar hulduaðilar taka afstöðu með Donald Trump gegn Krakkafréttum?
Aðstandendur Krakkafrétta, sem koma sannarlega fram undir nafni og eru ekki hluti af stjórnmálastarfi, mega vera stoltir af því að vera teknir fyrir af þeim sem vilja breyta niðurstöðum kosninga með því að fara fram hjá leikreglunum í krafti fjármagns til að styðja valdasamþjöppun og veikja gagnrýnið aðhald með valdhöfum.
Athugasemdir