Borgarfulltrúar Sjálfstæðisflokksins greiddu atkvæði á fundi borgarstjórnar í gær gegn svæðisskipulagi höfuðborgarsvæðsins varðandi svokallaða Borgarlínu. Málið snérist um samþykkt Samtaka sveitarfélaga á höfuðborgarsvæðinu þar sem skilgreindir eru samgöngu- og þróunarásar fyrir Borgarlínu, nýtt kerfi almenningssamgangna sem sveitarfélögin á höfuðborgarsvæðinu undirbúa nú í sameiningu.

Kjartan Magnússon, borgarfulltrúi Sjálfstæðisflokks, sagði á fundi borgarstjórnar í gær að Borgarlína yrði myllusteinn um háls skattgreiðenda. „Ég held að öll þessi vinna í kringum Borgarlínu sé því marki brennd að eiga að þjóna eins og margar aðrar glærusýningar borgarstjóra, sem eins konar villuljós gagnvart þeim málaflokkum sem meirihlutinn ræður ekki við,“ sagði Kjartan. „Borgarlína, markmiðið er göfugt, en það er hins vegar mjög ólíklegt að við náum að efla almenningssamgöngur sem nokkru nemi sérstaklega með þeirri aðgerð og það er alveg ljóst að það gerist ekki strax. Ég tel að Borgarlínuhugmyndin sé að miklu leyti villuljós, sem núverandi meirihluti Samfylkingar, Bjartrar framtíðar, Pírata og Vinstri grænna setur á flot til þess að draga athyglina frá slælegri frammistöðu þessara flokka í almenningssamgöngum í Reykjavík.“

Afstaða frambjóðenda flokksins á skjön

Aðeins einn af núverandi borgarfulltrúum Sjálfstæðisflokks, Marta Guðjónsdóttir, sækist eftir endurkjöri í sveitarstjórnarkosningum í vor. Hún sagði á fundinum stefnu Sjálfstæðisflokksins í málaflokknum vera skýra, flokkurinn vilji samgöngumiðstöð í Kringlunni og efla almenningssamgöngur. „Við viljum skoða alla samgöngukosti, en við höfum sett mikinn fyrirvara hvað varðar Borgarlínu,“ sagði Marta. „Við vitum að á endanum lendir það á skattgreiðendum að borga brúsann, bæði framkvæmdina og reksturinn.“

Eyþór Arnalds

Mynd: Sjálfstæðisflokkurinn

Eyþór Arnalds leiðir lista flokksins í borginni, en Hildur Björnsdóttir skipar 2. sætið. Hildur hefur í viðtölum lýst sig jákvæða gagnvart Borgarlínu. Í viðtali við Vísi sagði Hildur ekkert því til fyrirstöðu að Reykjavík vinni Borgarlínu í samvinnu við nágrannasveitarfélögin. „Ég er ung og mér finnst gaman að hafa framtíðarsýn og það er margt spennandi í þessum hugmyndum um borgarlínu en fólk hefur líka ýmsar áhyggjur, til dæmis að kostnaðurinn sé mjög vanreiknaður og að það eigi að loka einhverjum stórum stofnbrautum sem nú þegar eru stíflaðar og svo framvegis og mér finnst allt í lagi að taka tillit til þess að fólk hafi þessar áhyggjur,“ sagði Hildur.

Oddviti framboðsins, Eyþór Arnalds, hefur sagt að hann telji að Borgarlína muni auka á vandann í gatnakerfinu. Í kosningaáherslum flokksins, sem Eyþór kynnti á dögunum segir: „Bætum Strætó með tíðari ferðum, bættu leiðarkerfi og betri skýlum“.