Fréttir

Forstjóri Isavia segir miklar launakröfur áhyggjuefni: Hækkaði sjálfur í launum um 400 þúsund milli ára

Björn Óli Hauksson fékk 25,1 milljón króna í laun á síðasta ári. Hækkanir á launum stjórnarmanna samþykktar á síðasta ársfundi Isavia.

Launin hækkuðu duglega Laun Björns Óla Haukssonar, forstjóra Isavia, hækkuðu um 400 þúsund krónur á mánuði milli áranna 2016 og 2017. Björn Óli lýsti áhyggjum af miklum launakröfum í komandi kjarasamningum á ársfundi Isavia.

Forstjóri Isavia, Björn Óli Hauksson, sagði í ræðu á ársfundi Isavia 5. apríl síðastliðinn að það veikti samkeppnishæfni Keflavíkurflugvallar að launakostnaður á Íslandi væri á uppleið, á sama tíma og krónan styrktist. „Miklar launakröfur í kjarasamningum eru því áhyggjuefni,“ sagði Björn Óli enn fremur. Þessi orð vekja athygli í ljósi þess að laun Björns Óla sjálfs hækkuðu um um það bil 400 þúsund krónur á mánuði milli áranna 2016 og 2017.

Árið 2016 voru laun Björns Óla 20,8 milljónir króna á ársgrundvelli en árið 2017 voru þau 25,1 milljón króna, að því er Kjarninn greindi frá. Laun Björns Óla hækkuð því um 20 prósent milli ára. Þá var samþykkt á ársfundinum að laun stjórnarmanna Isavia yrðu hækkuð úr 180 þúsund krónum á mánuði í 195 þúsund krónur. Stjórnarformaður Isavia, Ingimundur Sigurpálsson, fær tvöfalda þá upphæð, 390 þúsund krónur á mánuði. Isavia er opinbert hlutafélag og að fullu í eigu íslenska ríkisins. 

Vilhjálmi Birgissyni missboðið

Orð Björns Óla sem vitnað er til hér að framan vöktu litla kátínu Vilhjálms Birgissonar, formanns Verkalýðsfélags Akraness, en hann kallaði þau hræsni á Facebook-síðu sinni. „Þvílík hræsni og siðblinda því á sama tíma og forstjóri Isavia lét þessi orð falla lá fyrir að hann sjálfur hafði hækkað í launum um 400.000 kr. á mánuði en mánaðarlaun hans fóru úr 1,7 milljón í 2,1 milljónir.

Kemur svo og talar um að samkeppnishæfni Keflavíkurflugvallar sé að veikjast vegna þess að launakostnaður sé á uppleið og lýsir sérstökum áhyggjum yfir að launakröfur verkafólks og annarra verði of miklar í komandi kjarasamningum.

Halló er til meiri hræsni en þetta? Ný búinn sjálfur að fá 400.000 kr. hækkun á sínum mánaðarlaunum en verkafólk sem vinnur á Keflavíkurvelli og víðar fengu flestir um 12.000 kr. hækkun á sínum launum í fyrra.“

Næst ekki í Björn Óla

Stundin hefur ítrekað reynt að ná tali af Birni Óla vegna þessa, bæði í síðustu viku og í dag en án árangurs.  Hins vegar sendi Guðjón Helgason, upplýsingafulltrúi Isavia, blaðamanni yfirlýsingu frá Birni Óla vegna málsins. „Það hefur ítrekað komið fram að Ísland er að verða eitt dýrasta land í heimi. Nú síðast var fjallað um það í nýútkominni skýrslu Íslandsbanka um íslenska ferðaþjónustu þar sem segir að verðlag hér landi sé að meðaltali 28% hærra en á hinum Norðurlöndunum. Það eru ýmsir þættir sem þarf að hafa áhyggjur af sem gætu orðið til kostnaðarauka fyrir rekstur Keflavíkurflugvallar, og það var það sem ég benti á í ræðu minni á aðalfundi Isavia. Ég var að lýsa áhyggjum mínum af því að rekstrarkostnaður haldi áfram að aukast og það verði til að veikja samkeppnishæfni landsins enn frekar. Ég er alls ekki á móti þeim launahækkunum sem hafa orðið í samfélaginu undanfarið og fagna því að greidd séu góð laun til okkar öfluga starfsfólks. Þá hlýtur það að vera sameiginlegt verkefni okkar allra er að tryggja samkeppnishæfni Íslands og að kaupmáttur sé áfram hár hér á landi.“

 

 

 

Athugasemdir

Allar athugasemdir eru ábyrgð á þeirra sem þær skrifa. Stundin áskilur sér rétt til að fjarlægja ærumeiðandi og óviðeigandi athugasemdir.

Mest lesið í dag

Fréttir

Vigdís Hauksdóttir lætur víkinga bera sig í kosningamyndbandi

Aðsent

400 manns senda Katrínu Jakobsdóttur opið bréf vegna „vanrækslu stjórnvalda“ í máli Hauks

Fréttir

Segir ummæli Brynjars ófagleg og afvegaleiða umræðu

Aðsent

Typpi, hvalir og Kristján Loftsson

Fréttir

Inga Sæland segist ekki vera hugsjónalaus afæta

Fréttir

Kallar tilmæli Svandísar „veruleikafirringu“ – Ljósmæður telja sig hafa gert samning

Mest lesið í vikunni

Fréttir

Björn Ingi Hrafnsson ógjaldfær

Fréttir

Ætlar ekki að segja sig úr Sjálfstæðisflokknum

Viðtal

Finnur mun meira fyrir fötluninni á Íslandi

Fréttir

Forstjóri Isavia segir miklar launakröfur áhyggjuefni: Hækkaði sjálfur í launum um 400 þúsund milli ára

Fréttir

Vigdís Hauksdóttir lætur víkinga bera sig í kosningamyndbandi

Fréttir

Starfsfólk Árnastofnunar reitt við Ríkisútvarpið