Fréttir

Forsætisráðherra segir gagnrýni á viðbrögð við Sýrlandsárás óréttmæta

Katrín Jakobsdóttir telur forystufólk stjórnarandstöðunnar reyna að slá pólitískar keilur. „Mér finnst þessi gagnrýni ekki eiga rétt á sér,“ segir hún í samtali við Stundina.

Óréttmæt gagnrýni Katrín Jakobsdóttir forsætisráðherra segir gagnrýni á viðbrögð hennar og ríkisstjórnarinnar við loftárásum í Sýrlandi vera óréttmæta. Mynd: Pressphotos

Katrín Jakobsdóttir forsætisráðherra segir gagnrýni á framgöngu hennar varðandi viðbrögð við loftárásum Bandaríkjamanna, Breta og Frakka í Sýrlandi ekki eiga rétt á sér og með henni séu pólitískir andstæðingar hennar að reyna að slá pólitískar keilur. Fullkominn samhljómur sé innan ríkisstjórnarinnar um málið og lögð hafi verið áhersla á að alþjóðasamfélagið verði að stuðla að pólitískum og friðsamlegum lausnum í Sýrlandsstríðinu.

Katrín hefur sætt gagnrýni fyrir þau orð sín að Ísland hafi ekki lýst „sérstökum stuðningi“ við loftárásirnar í ljósi þess að Ísland samþykkti stuðningsyfirlýsingu NATO við loftárásirnar.

Forsætisráðherra segir í samtali við Stundina að þjóðir hafi í upphafi brugðist mismunandi við árásunum.

„Sumar þjóðir lýstu yfir sérstökum stuðningi strax við aðgerðirnar, það gerðu Íslendingar ekki og ekki Norðmenn eða Svíar til að mynda. Síðan var málið tekið fyrir hjá NATO. Það liggur auðvitað fyrir að Ísland er ekki aðili að þessum aðgerðum og ekki heldur NATO. Hins vegar var málið tekið fyrir á þeim vettvangi og samþykkt stuðningsyfirlýsing sem er auðvitað bara málamiðlun þeirra 29 ríkja sem eru aðilar að NATO. Eðli málsins samkvæmt er hún ekki í samræmi við nákvæmar yfirlýsingar einstakra ríkja í þessu máli,“ segir Katrín.

Fylgja þjóðaröryggisstefnu

Katrín segir að fastafulltrúi Íslands hjá NATO hafi samþykk yfirlýsinguna fyrir hönd ríkisstjórnarinnar. Ríkisstjórnin öll og bæði hún sjálf og Guðlaugur Þór Þórðarsson utanríkisráðherra hafi lagt áherslu á að stefna Íslands varðandi Sýrlandsstríðið sé hins vegar fyrst og fremst sú að stuðla verði að pólitískum og friðsamlegum lausnum og að samstaða náist innan öryggisráðs Sameinuðu þjóðanna um aðgerðir. Það sé grundvallaratriði í hennar huga. Afstaða Vinstri grænna til aðildar Íslands að NATO sé ekki breytt, flokkurinn telji að Ísland ætti ekki að vera aðili að bandalaginu.

„Við höfum hins vegar ákveðið það í stjórnarsáttmála þessarar ríkisstjórnar að við fylgjum samþykkt Alþingis í þessum málum, sem byggir á þjóðaröryggisstefnu Íslands þar sem aðildin að NATO er áréttuð. Við höfum fallist á að fylgja samþykkt meirihluta Alþingis en við erum sem flokkur í grundvallaratriðum ósammála þessu ákvæði í þeirri stefnu.“

Katrín segir þeirra skoðunar að gagnrýni sem hún og Vinstri græn hafa setið undir vegna þessa, frá formönnum Samfylkingar, Viðreisnar og þingmönnum Pírata meðal annarra, sé óréttmæt. Þar fari flokkar sem séu þeirrar skoðunar að aðild Íslands að NATO sé eðlileg á meðan að Vinstri græn séu andvíg henni. Það sé orðin einhver stefnubreyting hjá þeim flokkum og segir Katrín að hún myndi fagna því ef svo væri. Spurð hvort hún telji þá að leiðtogar stjórnarandstöðunar séu að fella pólitískar keilur með gagnrýni sinni svarar hún því játandi. „Já, mér finnst þessi gagnrýni ekki eiga rétt á sér, ef ég á að vera alveg heiðarleg. Það liggur fyrir að við byggjum á þjóðaröryggisstefnu í stjórnarsáttmála og það liggur líka fyrir að ríkisstjórnin hefur lagt áherslu á friðsamlegar og pólitískar lausnir í málinu og það er fullkominn samhljómur um það innan ríkisstjórnarinnar.“

Athugasemdir

Allar athugasemdir eru ábyrgð á þeirra sem þær skrifa. Stundin áskilur sér rétt til að fjarlægja ærumeiðandi og óviðeigandi athugasemdir.

Mest lesið í dag

Fréttir

Vigdís Hauksdóttir lætur víkinga bera sig í kosningamyndbandi

Aðsent

400 manns senda Katrínu Jakobsdóttur opið bréf vegna „vanrækslu stjórnvalda“ í máli Hauks

Fréttir

Segir ummæli Brynjars ófagleg og afvegaleiða umræðu

Aðsent

Typpi, hvalir og Kristján Loftsson

Fréttir

Inga Sæland segist ekki vera hugsjónalaus afæta

Fréttir

Kallar tilmæli Svandísar „veruleikafirringu“ – Ljósmæður telja sig hafa gert samning

Mest lesið í vikunni

Fréttir

Björn Ingi Hrafnsson ógjaldfær

Fréttir

Ætlar ekki að segja sig úr Sjálfstæðisflokknum

Viðtal

Finnur mun meira fyrir fötluninni á Íslandi

Fréttir

Forstjóri Isavia segir miklar launakröfur áhyggjuefni: Hækkaði sjálfur í launum um 400 þúsund milli ára

Fréttir

Vigdís Hauksdóttir lætur víkinga bera sig í kosningamyndbandi

Fréttir

Starfsfólk Árnastofnunar reitt við Ríkisútvarpið