Fréttir

Eyþór vildi taka sæti forsætisráðherra

Morgunblaðið, sem Eyþór Arnalds á stóran hlut í, gagnrýnir Dag B. Eggertsson harðlega fyrir að hafa vísað Eyþóri af fundi í Höfða. Dagur segir Eyþór hafa ætlað að setjast í sæti sem ætlað var Katrínu Jakobsdóttur forsætisráðherra.

Eyþór Arnalds Hlaut nýverið kosningu í fyrsta sæti framboðs Sjálfstæðisflokksins í borginni fyrir borgarstjórnarkosningarnar sem haldnar verða í lok maí. Mynd: Heiða Helgadóttir

Eyþór Arnalds, oddviti Sjálfstæðisflokksins í komandi borgarstjórnarkosningum, bauðst til að setjast í sæti sem ætlað var forsætisráðherra á fundi þingmanna og borgarfulltrúa í Höfða sem haldinn var á mánudag. Dagur B. Eggertsson borgarstjóri greinir frá þessu á Facebook, en þar bregst hann við umfjöllun Morgunblaðsins um þá sérkennilegu atburðarás sem átti sér stað í Höfða í vikubyrjun. 

Eyþór Arnalds er kjölfestueigandi Morgunblaðsins; hann á 22,87 prósenta hlut í Þórsmörk ehf. sem á 99 prósent í Árvakri, útgáfufélagi Morgunblaðsins.

Í staksteinum Morgunblaðsins í dag er Dagur gagnrýndur harðlega fyrir að hafa vísað Eyþóri af fundinum. „Var það gert í þágu samræðustjórnmálanna? Var það gert til að auka skilning þingmanna á þörfum Reykjavíkur? Var það gert til að styrkja stöðu Reykjavíkur? Var það gert, eins og borgarstjóri heldur fram, vegna þess að oddvitinn á ekki enn sæti í borgarstjórn?“ spyr staksteinahöfundur og svarar svo sjálfum sér: „Nei, ekkert af þessu getur átt við. Dagur veit, líkt og allir aðrir, að oddvitinn leiðir borgarstjórnarflokk Sjálfstæðisflokksins og er á leið í borgarstjórn. Þátttaka hans í samtali við þingmenn ætti því að vera af hinu góða.“

Dagur segir Morgunblaðið afbaka atburðarásina og leggja allt út á versta veg. „Verður blaðið og ritstjórn þess að eiga það við sig og sína lund,“ skrifar hann. Dagur segist hafa boðað fundinn í kjördæmaviku samkvæmt hefð og að höfðu samráði við utanríkisráðherra og forsætisráðherra. Í fundarboði hafi komið skýrt fram að um hefðbundinn fund þingmanna Reykjavíkur og borgarfulltrúa í kjördæmaviku væri að ræða. Því hafi komið honum á óvart að hitta Eyþór Arnalds, verðandi oddvita Sjálfstæðisflokksins í borgarstjórn, rétt áður en fundurinn hófst. Málsatvikum lýsir Dagur með eftirfarandi hætti:

„Ég heilsaði honum í andyri hússins og sagði honum hvernig í málinu lagi, fundurinn væri fyrir borgarstjórn og þingmenn en frambjóðendur hefðu ekki verið boðaðir. Ekkert fór á milli mála í þessum samskiptum. Þess var beðið í nokkrar mínútur að allir fundarmenn skiluðu sér og þegar forsætisráðherra var komin í hús bauð ég fundargestum að setjast við langborð.

Ég sat fyrir miðju borðsins öðrum megin með Halldór Halldórsson oddvita Sjálfstæðisflokksins í borgarstjórn við hlið mér, en Guðlaug Þór utanríkisráðherra á móti mér. Þá brá svo við Eyþór gengur í salinn og býst til að setjast í auða sætið við hlið Guðlaugs, sem ætlað hafði verið fyrir forsætisráðherra. Við það gerði ég athugasemd, ítrekaði hvers eðlis fundurinn væri, hverjum hefði verið til hans boðið og að ég væri viss um að Vigdís Hauksdóttir hefði líka verið til í að sitja fundinn en hann hefði ekki verið ætlaður frambjóðendum. Ef áhugi væri á slíkum fundi þyrfti að boða hann sérstaklega. Eyþór vék við svo búið af fundinum, forsætisráðherra tók sæti sitt en utanríkisráðherra upplýsti að hann hefði boðið Eyþóri. Voru ekki höfð uppi mikið fleiri orð um þetta atvik þótt sérstakt hafi verið.“

Athugasemdir

Allar athugasemdir eru ábyrgð á þeirra sem þær skrifa. Stundin áskilur sér rétt til að fjarlægja ærumeiðandi og óviðeigandi athugasemdir.

Mest lesið í dag

Fréttir

Kölluð kellingartussa og negri

Viðtal

„Neita að eyða allri ævinni í að vinna fyrir einhvern steinkassa“

Fréttir

Slys hjá Arnarlaxi: Eldiskví með um 500 tonnum af laxi sökk í Tálknafirði

Viðtal

Keypti brúðarkjól og bað Guð um mann

Listi

Fimm réttir úr fortíð og nútíð

Fréttir

Helga Vala skoraði á Alþingi að aflétta leyndinni tafarlaust – Jón: „Dæmigerð popúlistauppákoma“

Mest lesið í vikunni

Fréttir

Vilhjálmur fékk 3,4 milljónir endurgreiddar – Þingmenn hæðast að umræðunni

Fréttir

Stjórnun kynferðisbrotadeildar ábótavant – Sigríður skipti yfirmanni út fyrir stjórnanda með minni reynslu af rannsókn kynferðisbrota

Fréttir

Kölluð kellingartussa og negri

Pistill

Karlar að spara okkur pening

Fréttir

Ferðaþjónustubændur í máli við Íshesta

Fréttir

Borgarstjórinn vísaði Eyþóri Arnalds af fundi í Höfða