Þórhildur Sunna Ævarsdóttir, þingmaður Pírata, telur allar líkur á að lögregla hefji á ný rannsókn í máli Roberts Downey í ljósi breytts verklags í rannsóknum kynferðisbrota hjá embættinu. Robert var árin 2008 og 2010 dæmdur fyrir að brjóta kynferðislega gegn fimm unglingsstúlkum og í sumar lagði sjötta stúlkan fram kæru gegn honum. Á meðal gagna í málinu var minnisbók með lista yfir 335 kvenmannsnöfn með ýmist símanúmerum eða tölvupóstföngum og fyrir aftan nöfnin voru númer sem lögregla taldi víst að vísuðu í aldur stúlknanna. Þau svör höfðu áður borist frá lögreglunni að minnisbókin væri glötuð, en nú er komið í ljós að hún er aðgengileg á Þjóðskjalasafni Íslands.

Þórhildur Sunna segir að á sínum tíma hafi ekki verið reynt að hafa samband við stúlkurnar en á opnum fundi allsherjar- og menntamálanefndar í gær kom fram í máli Huldu Elsu Björgvinsdóttur, yfirmanns ákærusviðs lögreglunnar á höfuðborgarsvæðinu, að kæmi slík minnisbók inn á borð lögreglu í dag yrði leitað allra leiða til að upplýsa um nöfnin og rannsaka málið í þaula. 

„Þá finnst mér allar líkur á að það verði farið ofan í kjölinn á þessum nöfnum.“

„Það sem mér fannst mikilvægast að kom út úr þessum fundi er að verklagið hefur breyst talsvert hjá lögreglu,“ sagði Þórhildur Sunna í viðtali í Kastljósi í gær. „Það sem mér fannst alltaf stærsta vandamálið við þessa minnisbók á þessum tíma var að henni var ekki fylgt eftir, það er að segja þarna ertu að finna nöfn 335 kvenna sem líklegt þykir að hafi orðið, mögulega, fyrir misnotkun af hálfu Roberts Downey en það var ekkert gert til þess að athuga þessi nöfn eða hafa samband við þessa einstaklinga. Það sem kom út úr þessum fundi var að miðað við breytta afstöðu lögregluyfirvalda nú og breytt verklag gagnvart kynferðisbrotamálum, þá finnst mér allar líkur á að það verði farið ofan í kjölinn á þessum nöfnum og hugsanlega þessum risavaxna fjölda kvenna sem gætu hafa orðið fyrir barðinu á honum Robert Downey.“

Ekki öll sönnunargögn varðveitt

Anna Katrín SnorradóttirLagði fram kæru gegn Roberti Downey síðasta sumar. Hún er sjötta stúlkan til að kæra hann, en hann hlaut uppreist æru.

Mynd: Heiða Helgadóttir

Robert Downey, sá þá hét Róbert Árni Hreiðarsson, var árið 2008 dæmdur í Hæstarétti í þriggja ára fangelsi fyrir brot gegn fjórum unglingsstúlkum og árið 2010 var hann dæmdur fyrir brot gegn fimmtu stúlkunni, en ekki gerð refsing í því máli. Anna Katrín Snorradóttir er sjötta stúlkan til þess að kæra Robert fyrir kynferðisbrot, en hún lagði fram kæru síðasta sumar og treysti á að lögregla hefði enn aðgang að gögnum sem gerð voru upptæk í húsleit hjá Róberti í september 2005. 

Á meðal þess sem fannst voru tveir farsímar, fjögur símkort, yfir tvö hundruð ljósmyndir sem lögreglan flokkaði sem barnaklám og fimm myndbandsspólur sem sýndu börn á kynferðislegan máta. Það sem vakið hefur hvað mestan óhug í málinu var minnisbók Roberts með lista yfir stúlkur. Á bakhlið minnisbókarinnar voru síðan skráð þrjú nöfn, Rikki, Árni og Robbi, dulnefnin sem Robert notaði í samskiptum við stúlkurnar, og fyrir aftan hvert nafn var símanúmer. Anna Katrín telur nokkuð víst að upplýsingar um hana sé að finna í þessum gögnum. 

Helgi Magnús Gunnarsson vararíkissaksóknari sagði á fundinum að lögin gerðu ekki ráð fyrir að sönnunargögn í sakamáli, sem ekki flytjast áfram til dómstóla, séu varðveitt áfram ef ske kynni að vera að fleiri brotaþolar leggi síðar fram kæru. Þessum sönnunargögnum sé annað hvort eytt eða skilað. Í máli Roberts hafnaði dómurinn til að mynda upptöku á tölvum sem voru haldlagðar í málinu og eru þær því ekki lengur aðgengilegar. Þau gögn sem voru lögð fram fyrir dómstólum í sakamálinu sem leiddi til sakfellingar árið 2008, þar á meðal minnisbókin fræga, eru hins vegar aðgengileg í Þjóðskjalasafni Íslands.