Fréttir

Pressan borgaði ekki af jeppa Björns Inga og stefnir í þrot út af ógreiddum iðgjöldum starfsmanns

Lífeyrissjóður Vestmannaeyja lagði fram gjaldþrotabeiðni út af skuld Pressunnar ehf. við sjóðinn. Borgaði ekki iðgjöld starfsmanns í marga mánuði. Pressan ehf. skuldar bílaleigu 2,7 milljónir út af jeppa sem Björn Ingi Hrafnsson fékk frá fyrirtækinu en heildargreiðslur út af jeppanum nema 8,3 milljónum.

Beiðni um gjaldþrotaskipti Beiðni Lífeyrissjóðs Vestmanneyja um gjaldþrot Pressunnar ehf. vegna vangreiddra iðgjalda starfsmanns félagsins var lögð fyrir Héraðsdóm Reykjavíkur fyrir tveimur vikum. Björn Ingi Hrafnsson var eigandi og stjórnarformaður Pressunnar ehf. Mynd: Skjáskot af ÍNN

2,7 milljóna króna skuld út af leigu á Landrover-jeppa fyrir Björn Inga Hrafnsson er útistanandi í bókhaldi Pressunnar ehf. Þetta herma heimildir Stundarinnar. Eins og miðilinn greindi frá fyrir síðustu helgi fékk Björn Ingi Hrafnsson, eigandi og útgefandi fjölmiðla Pressunnar ehf., afnot af jeppanum sem hluta af starfskjörum sínum síðastliðin ár. Leigan á bílnum var 350 þúsund krónur á mánuði. Heimildir Stundarinnar herma að einungis 8,3 milljónir af tæplega 11 milljóna leigu bílsins hafi verið greiddar til bílaleigunnar Arma ehf. Þetta þýðir að Pressan ehf. greiddi ekki af bílnum í meira en sjö mánuði á meðan Björn Ingi hafði afnot af honum. 

Pressan ehf. var móðurfélag fjölmiðlafyrirtækis sem Björn Ingi kom á laggirnar sem átti meðal annars Eyjuna, Pressuna, DV, Bleikt og ýmis héraðsfréttablöð. Björn Ingi tjáði sig sjálfur um jeppann í síðustu viku og sagði Stundinni frá því að hann væri búinn að skila jeppanum; hann sagðist hafa fengið reikning fyrir desembermánuð sendan á sína kennitölu. Í færslu á Facebook sagði hann frá því að jeppinn hefði verið hluti af „starfskjörum“ hans. Björn Ingi var sjálfur stjórnarformaður Pressunnar ehf. og stýrði stjórninni við annan manns, Arnar Ægisson, sem er viðskiptafélagi hans til margra ára sem stýrt hefur fjármálum fjölmiðla Björns Inga.

Greiddu ekki iðgjöld starfsmanns

Farið hefur verið fram á að Pressan ehf. verði tekin til gjaldþrotaskipta. Þetta var í gert í Héraðsdómi Reykjavíkur á miðvikudaginn fyrir tveimur vikum. Gjaldþrotabeiðnin kom frá Lífeyrissjóði Vestmannaeyja.  Úrskurður um hvort fyrirtækið verður tekið gjaldþrotaskipta eða ekki verður kveðinn upp í Héraðsdómi Reykjavíkur á miðvikudaginn kemur, á morgun það er að segja. Krafa lífeyrissjóðsins hljóðar upp á rúmlega 2.8 milljónir króna en þar af er höfuðstóll kröfunnar rúmlega 2 milljónir króna. 

„Þetta eru iðgjöld launþega sem eru í vanskilum“

Í samtali við Stundina segir Haukur Jónsson, forstjóri Lífeyrissjóðs Vestmannaeyja, að sjóðurinn hafi lagt beiðnina fram vegna ógreiddra iðgjalda af einum sjóðsfélaga. Pressan ehf. greiddi ekki iðgjöld af launum starfsmannsins frá seinni hluta síðasta árs og fram á þetta ár segir Haukur. „Þetta eru iðgjöld launþega sem eru í vanskilum og við erum bara að reyna að tryggja kröfuna með eðlilegum hætti. Þetta eru nokkrir mánuðir sem eru í vanskilum og myndar þokkalega kröfu. Við erum bara að fylgja hefðbundnum verklagsreglum,“ segir forstjórinn en umrædd vanskil áttu sér stað í eigendatíð Björns Inga Hrafnssonar þegar Pressan ehf. var móðurfélag DV ehf., Pressunnar, Eyjunnar og fleiri fjölmiðla. Hann segir að Pressan ehf. hafi ekki haft samband við lífeyrissjóðinn til að greiða kröfuna upp og eftir atvikum reyna að forðast gjaldþrotaskipti félagsins. 

Haukur segir því að af öllu óbreyttu þá stefni Pressan ehf. í gjaldþrot út af málinu. Forstjórinn segir að lífeyrissjóðurinn hafi lagt fram tryggingu fyrir skiptakostnaði í málinu, 300 þúsund krónur.   

Harðar deilur staðið yfir

Miklar deilur hafa staðið yfir vegna eignarhalds Pressunnar ehf. og tengdra félaga síðastliðna mánuði á milli Björns Inga Hrafnssonar og aðila honum tengdum og Róberts Wessmann og aðila honum tengdum. Félag tengt Róberti, Dalurinn ehf., setti tugmilljóna króna hlutafé inn í Pressuna ehf. fyrr á árinu en stjórn Pressunnar ehf. ákvað eftir þetta að selja allar helstu eignir félagsins út úr því og til fyrirtækisins Frjálsrar fjölmiðlunar ehf. sem lögmaðurinn Sigurður G. Guðjónsson fer fyrir. Þetta var gert án vitneskju Dalsins ehf. og þýddi í reynd að Pressan ehf. var búin að selja þær eignir sem Dalurinn ehf. var nýbúinn að kaupa í.  Litlar eignir eru því eftir inni í félaginu Pressan ehf. og óljóst hversu mikið kröfuhafar félagsins muni fá upp í kröfur sínar.

Síðan þetta gerðist hefur verið skipuð ný stjórn yfir Pressuna ehf. sem er nú mönnuð aðilum á vegum Dalsins, meðal annars Ómari Valdimarssyni. Hin nýja stjórn vill að félagið verði tekið til gjaldþrotaskipta þar sem búið er að rýra eignir þess svo mikið með sölunni á fjölmiðlunum til Frjálsrar fjölmiðlunar ehf. 

Í ljós hefur komið að heildarskuldir Pressunnar ehf. og tengdra félaga við opinbera aðila eins og tollstjóra út af rimlagjöldum nam um 500 milljónum króna í lok síðasta árs. Kröfur á hendur Pressunni ehf. munu því að öllum líkindum verða verulegar en auk þess á félagið Útvörður ehf. í málaferlum við Pressuna út af 90 milljóna króna láni sem veitt var árið 2014 til að kaupa DV ehf. Þá hefur sænskt ráðgjafafyrirtæki stefnt Pressunni út af 40 milljóna króna skuld.

Athugasemdir

Allar athugasemdir eru ábyrgð á þeirra sem þær skrifa. Stundin áskilur sér rétt til að fjarlægja ærumeiðandi og óviðeigandi athugasemdir.

Mest lesið í dag

Fréttir

Nýtur trausts innan lögreglunnar þrátt fyrir nauðgunarkærur

Viðtal

Næturnar voru algert helvíti

Greining

Miðflokkurinn er stærsta popúlíska hreyfing Íslands

Fréttir

Greiðsluþakið hækkað þrátt fyrir loforð um lækkun

Leiðari

Hvers virði eru völdin?

Fréttir

Óásættanlegt að ferðaþjónusta fatlaðra skerðist vegna landsleiksins

Mest lesið í vikunni

Úttekt

Laun íslenskra bæjarstjóra hærri en í erlendum stórborgum

Fréttir

Sósíalistar vilja afnema greiðslur slökkviliðsins til borgarstjóra

Fréttir

Bróðir Hauks handtekinn fyrir að flagga tyrkneska fánanum á Stjórnarráðshúsinu

Fréttir

Vildi ekki verða „húsþræll“ í vinstri- og miðjusamstarfi en myndaði atkvæðablokk með Sjálfstæðisflokknum

Fréttir

Nýtur trausts innan lögreglunnar þrátt fyrir nauðgunarkærur

Viðtal

Næturnar voru algert helvíti