Fréttir

Selur bílinn sinn til að borga ríkinu fyrir eigin brottflutning

Amir giftist íslenskum unnusta sínum á dögunum. Nú þurfa þeir að selja bílinn sinn til þess að greiða íslenskum yfirvöldum kostnaðinn við að flytja hann nauðugan úr landi.

Fluttur úr landi Amir Shokrgozar var fluttur á brott til Póllands og er nú á leið til Ítalíu. Mynd: Andri Snær Magnason

Amir Shokrgozar, samkynhneigður flóttamaður frá Íran, hefur auglýst bílinn sinn til sölu til þess að geta borgað íslenskum yfirvöldum reikning vegna flugfars lögreglumanna sem fóru með hann úr landi.

Amir bjó í tvö ár á Íslandi og hafði verið að læra íslensku, átt íslenskan unnusta og verið sjálfboðaliði hjá Samtökunum ’78 og Rauða krossinum, áður en honum var vísað úr landi í febrúar. 

Amir hugði á endurkomu til Íslands, en verður að greiða skuld sína til íslenskra yfirvalda eigi það að ganga eftir. Hann giftist íslenskum unnusta sínum á Sikiley fyrr í mánuðinum.

SkuldayfirlýsingAmir ber að greiða ríkinu andvirði dagpeninga og ferðakostnaðar lögregluþjónanna fimm sem fylgdu honum úr landi.

Í skuldayfirlýsingu vegna kostnaðarins við brottvísun hans, sem hann birtir á Facebook, kemur fram að hann eigi að greiða 427.907 krónur fyrir fimm lögregluþjóna sem fylgdu honum úr landi. Þá skuldar hann íslenska ríkinu dagpeninga til handa lögregluþjónunum, samtals 120.422 krónur. Samtals er skuldin, að meðtöldu hans eigin flugfari við brottvísunina, 634.944 krónur.

Samkvæmt útlendingalögum er ríkinu heimilt að rukka hælisumsækjendur, sem ekki fá samþykkta beiðni um hæli, fyrir brottflutning þeirra úr landi.

„Útlendingur sem færður er úr landi samkvæmt lögum þessum skal greiða kostnað af brottför sinni. Útlendingurinn skal einnig greiða kostnað af gæslu þegar hennar er þörf vegna þess að hann fer ekki úr landi af sjálfsdáðum. Krafan er aðfararhæf og hún getur auk þess verið grundvöllur frávísunar við síðari komu til landsins. Lögreglunni er heimilt að leggja hald á farseðla sem finnast í fórum útlendingsins til notkunar við brottför. Sama gildir um fjármuni til greiðslu á kröfu vegna kostnaðar við brottför og gæslu samkvæmt ákvæði þessu.“ 

„Fyrir íslenskum yfirvöldum er ég einskis virði“

Amir segist í samtali við Stundina þakka Íslendingum fyrir stuðning sem hann hefur fengið, en hann kveðst hafa áhyggjur af framferði íslenskra yfirvalda. „Mannréttindi útlendinga eru ekki virt,“ segir hann. „Ég er utanaðkomandi og fyrir íslenskum yfirvöldum er ég einskis virði.“

Amir flúði heimalandið vegna kynhneigðar sinnar, en samkynhneigðir geta átt von á refsingum í Íran. Hann segir yfirvöld hér á landi hafa staðið í vegi fyrir því að hann gæti gifst íslenskum unnusta sínum. „Við giftum okkur á Ítalíu vegna þess að íslensk yfirvöld synjuðu okkur um heimild til að gifta okkur hér. Við viljum selja bílinn okkar til þess að láta íslensk yfirvöld fá peninginn. Ég kem aftur til Íslands, en svo lengi sem ég borga ekki má ég ekki koma aftur.“

Bíllinn, sem er Toyota Avensis frá árinu 2004, er til sölu á 400 þúsund krónur. „Ég vona að bíllinn seljist eins fljótt og mögulegt er til þess að ég geti borgað íslenskum yfirvöldum og snúið aftur eins fljótt og hægt er,“ segir Amir.

Amir er ekki eini innflytjandinn sem íslensk yfirvöld rukka fyrir að flytja úr landi. Eugene Imotu fær ekki að koma aftur til Íslands fyrr en hann hefur borgað fyrir brottflutning sinn úr landi. Hann var handtekinn í sumar, aðskilinn fjölskyldu sinni og fluttur úr landi, eftir að hafa búið á Íslandi í þrjú ár. Stuttu síðar fengu börnin hans þrjú dvalarleyfi.

Athugasemdir

Allar athugasemdir eru ábyrgð á þeirra sem þær skrifa. Stundin áskilur sér rétt til að fjarlægja ærumeiðandi og óviðeigandi athugasemdir.

Mest lesið í dag

Fréttir

Vilhjálmur fékk 3,4 milljónir endurgreiddar – Þingmenn hæðast að umræðunni

Fréttir

Kölluð kellingartussa og negri

Viðtal

„Neita að eyða allri ævinni í að vinna fyrir einhvern steinkassa“

Viðtal

Keypti brúðarkjól og bað Guð um mann

Fréttir

Guðmundur rak Sif í kjölfar umfjöllunar um bætur til brotaþola

Listi

Fimm réttir úr fortíð og nútíð

Mest lesið í vikunni

Fréttir

Vilhjálmur fékk 3,4 milljónir endurgreiddar – Þingmenn hæðast að umræðunni

Fréttir

Stjórnun kynferðisbrotadeildar ábótavant – Sigríður skipti yfirmanni út fyrir stjórnanda með minni reynslu af rannsókn kynferðisbrota

Fréttir

Borgarstjórinn vísaði Eyþóri Arnalds af fundi í Höfða

Fréttir

Ferðaþjónustubændur í máli við Íshesta

Pistill

Karlar að spara okkur pening

Fréttir

Kölluð kellingartussa og negri