Auglýsingin hverfur eftir stutta stund...
Loka

Fréttir

Bann á umfjöllun Stundarinnar framlengist út árið 2017

Héraðsdómur Reykjavíkur hefur ákveðið að aðalmeðferð í máli þrotabús Glitnis gegn Stundinni fari fram þann 6. janúar 2018. Því verður lögbann á umfjöllun Stundarinnar við lýði fram á næsta ár hið minnsta.

Umfjöllun Stundarinnar Eftir umfjöllun Stundarinnar um viðskipti forsætisráðherra með bréf tengd Glitni, samhliða aðkomu hans að málefnum bankans sem kjörinn fulltrúi, fékk Glitnir samþykkt lögbann á frekari fréttaflutning.

Lögbann á fréttir Stundarinnar upp úr gögnum, sem sögð eru koma úr þrotabúi Glitnis, verður áfram við lýði út þetta ár hið minnsta. Þetta er orðið ljóst eftir að dómari við Héraðsdóm Reykjavíkur boðaði að meðferð dómsmáls um lögbannið yrði ekki haldið áfram fyrr en 6. janúar 2018.

Í dómsmálinu stefnir þrotabú Glitnis, Glitnir Holding, Stundinni fyrir dóm, til að freista þess að fá staðfestingu á lögbanni sem Sýslumaðurinn í Reykjavík lagði  á umfjöllun Stundarinnar upp úr tilteknum gögnum sem þrotabúið gerir kröfu til. 

Inngrip í umfjöllun sem varðar ráðherra

Lögbann var sett á Stundina og Reykjavik media mánudaginn 16. október, þegar fulltrúar sýslumannsins í Reykjavík fyrirvaralaust á skrifstofu Stundarinnar ásamt lögmanni Glitnis og tilkynntu að lögbann yrði lagt á áframhaldandi umfjöllun. Fyrirvaralaust dómþing var samþykkt af sýslumanni að kröfu Glitnis með tilvísun um að Stundin hefði annars verið í aðstöðu til að birta meiri upplýsingar upp úr hinum meintu gögnum.

Stundin hafði þá fjallað um að viðskipti Bjarna Benediktssonar forsætisráðherra með bréf tengd Glitni, sem og lánamál hans hjá bankanum og boðsferðir, hefðu verið með öðrum hætti en hann hafði sjálfur lýst. Þannig hafði hann til dæmis losnað undan persónulegri ábyrgð á 50 milljóna króna kúluláni, þegar það var flutt yfir á einkahlutafélag í eigu föður hans skömmu fyrir hrun, en félaginu var slitið eftir efnahagshrunið þegar skuldir þess höfðu rokið upp úr öllu valdi. Auk þess fór Bjarni í fleiri boðsferðir í boði bankans en hann hafði greint frá áður, hafði átt 165 milljónir króna í peningamarkaðssjóði Glitnis, sem stangaðist á við fyrri yfirlýsingar, og seldi öll bréf sín í sjóðnum dagana fyrir bankahrunið. Þá fundaði hann með bankastjóra Glitnis um vanda bankans, sem kjörinn fulltrúi, tveimur dögum áður en hann hóf að selja persónuleg hlutabréf sín í bankanum fyrir rúmlega 120 milljónir króna.

Glitnir krafðist þess að Stundin eyddi öllum fréttum sem skrifaðar hefðu verið um málið af internetinu og afhenti tiltekin gögn. Lögmaður þrotabúsins féll hins vegar frá fyrri kröfunni og var síðari kröfunni hafnað, á grundvelli þess að ómögulegt væri að afhenda gögn sem gætu verið til rafrænt.

Sýslumaðurinn í Reykjavík sendi frá sér yfirlýsingu þess efnis að með lögbanninu væri verið að „frysta tiltekið ástand“, en þrotabú Glitnis hafði lýst áhyggjum af því að upplýsingar um fjármál þúsunda Íslendinga væri að finna í gögnum sem Stundin hefði undir höndum.

Stundin vildi flýta málinu

Sýslumaðurinn í Reykjavík féllst ekki á þá vörn Stundarinnar í skyndilegu dómþingi á skrifstofu miðilsins að umfjöllunin ætti erindi til almennings, hefði þýðingu í lýðræðislegu samfélagi og nyti verndar stjórnarbundins tjáningarfrelsis.

Stundin fór fram á að málinu yrði flýtt eins og auðið yrði fyrir héraðsdómi. Beiðni Stundarinnar um flýtimeðferð var ekki formleg í skilningi einkamálalaga, þar sem einungis stefnandi máls getur óskað eftir flýtimeðferð formlega. Hins vegar taldi dómari að dagsetningin samræmdist tímaramma flýtimeðferðamála.

Bæði Kjarninn og Ríkisútvarpið hafa fjallað um upplýsingar um viðskipti innan Glitnis fyrir hrunið á undanförnum vikum. Viðbrögð lögmanns þrotabús Glitnis hafa verið að biðja Kjarnann að upplýsa um hvort frekari umfjöllun væri fyrirhuguð úr gögnunum. Fyrirvaralaus koma á skrifstofur Kjarnans átti sér því ekki stað, líkt og í tilfelli Stundarinnar.

Frá því að Glitnir fékk samþykkt lögbann á umfjöllun Stundarinnar og Reykjavík Media hefur verið greint frá því, upp úr gögnum frá bankanum, að hópur stjórnenda og starfsmanna Glitnis hafði stundað umfangsmikil viðskipti með bréf tengd bankanum eftir að hafa fengið þá vitneskju að stjórnarformaður Glitnis hefði hitt seðlabankastjóra og sóst eftir fyrirgreiðslu Seðlabanka Íslands vegna þess að bankinn væri fyrirsjáanlega ógjaldfær.

Leki á gögnum úr Glitni er til rannsóknar hjá Héraðssaksóknaraembættinu, sem áður hét Sérstakur saksóknari. Ritstjórar Stundarinnar fóru til skýrslutöku hjá embættinu á mánudag og verða samtals tólf blaða- og fréttamenn boðaðir til skýrslutöku hjá embættinu vegna málsins samkvæmt frétt Ríkisútvarpsins.

Fyrirvari vegna hagsmuna: Í fréttinni fjallar Stundin um dómsmál sem varðar Stundina beint og Stundin er aðili að.

Athugasemdir

Allar athugasemdir eru ábyrgð á þeirra sem þær skrifa. Stundin áskilur sér rétt til að fjarlægja ærumeiðandi og óviðeigandi athugasemdir.

Mest lesið í dag

Fréttir

Gagnrýnir „afsal á forystuhlutverki Sjálfstæðisflokksins til VG“ og segir að frjálsar umræður leyfist ekki í Valhöll

Fréttir

Gagnrýnir prófíl-mynd þingkonu sem kvartar undan áreitni

Fréttir

Isavia þarf að afhenda Aðalheiði yfirstrikaðar upplýsingar: „Svo mér endist ævin til að reka þetta mál“

Viðtal

Frá fíkli til flóttamanns

Fréttir

Þrjú hundruð stjórnmálakonur skora á stjórnvöld: „Hótað nauðgun vegna skoðana minna“

Fréttir

Óttast að trúfélagsapp safni persónuupplýsingum

Mest lesið í vikunni

Pistill

Davíð spilar með Geir og þjóðina

Aðsent

VG – in memoriam

Fréttir

Selur bílinn sinn til að borga ríkinu fyrir eigin brottflutning

Fréttir

Gagnrýnir „afsal á forystuhlutverki Sjálfstæðisflokksins til VG“ og segir að frjálsar umræður leyfist ekki í Valhöll

Fréttir

Umtalaðasta símtalið birt: „Þetta eru 100 millj­arð­ar, spít­al­inn og Sunda­braut­in“

Fréttir

Súr Sigmundur kallar Bjarna farþega og segir að hann hljóti að hætta í stjórnmálum