Fréttir

Formaður Sjálfstæðisflokksins segir fjölmiðla fjalla of mikið um hneykslismál

Bjarni Benediktsson, formaður Sjálfstæðisflokksins, segist hafa orðið fyrir vonbrigðum með fjölmiðla. Einn eigenda Morgunblaðsins telur umræðuna „rætna“ og bendir á fjölmiðla. Rætt um „árásir sorpmiðla“ í leiðara Morgunblaðsins.

Ósáttir við umræðuna Sigmundur Davíð Gunnlaugsson hefur boðað málsóknir gegn blaðamönnum og Bjarni Benediktsson hefur orðið vonbrigðum með fjölmiðla. Báðir hafa verið til umfjöllunar vegna leynilegs hagsmunaáreksturs. Mynd: Pressphotos

„Ég hef orðið fyrir vonbrigðum með fjölmiðlana,“ sagði Bjarni Benediktsson, formaður Sjálfstæðisflokksins, í gær í fyrsta umræðuþættinum eftir að úrslit alþingiskosninganna lágu fyrir.

Bæði Bjarni og Sigmundur Davíð Gunnlaugsson, formaður Miðflokksins, hafa gagnrýnt umræðu um stjórnmálamenn, en þeir hafa báðir verið til umfjöllunar á Íslandi og erlendis vegna viðskipta sinna. 

Fjallað um hagsmunaárekstra

Sigmundur var til umfjöllunar fjölmiðla eftir að leynilegur hagsmunaárekstur hans varð ljós við leka úr Panama-skjölunum og var Bjarni þar einnig til umfjöllunar. Bjarni, sem hafði sagst engar eignir hafa átt í skattaskjóli, reyndist hafa átt skattaskjólsfélag. Þá kom fram í umfjöllun Stundarinnar í byrjun október um viðskipti Bjarna samhliða þingmennsku með bréf tengd Glitni, að Bjarni hafði sagt ósatt um viðskipti sín og tengsl við Glitni.  Meðal annars hafði hann sagt að hann hefði ekki átt neitt sem skipti máli í Sjóði 9, en fram kom í umfjöllun Stundarinnar að ný gögn sýndu að hann hafði selt fyrir 50 milljónir króna í sjóðnum dagana fyrir bankahrunið, en einnig höfðu ættingjar hans átt stórfelld viðskipti með bréf í Glitni samhliða Bjarna. Þá hafði Bjarni fengið aflétt af sér persónulegri ábyrgð á 50 milljóna króna kúluláni, sem var flutt yfir á einkahlutafélag föður hans, sem var slitið nokkru eftir hrun með meira en fjögurra milljarða króna afskriftum.

Sigmundur sagði í Silfrinu í gær að umræðan væri svo lituð af „persónulegu níði“ um stjórnmálamenn að konur treystu sér síður í stjórnmál. Það væri ástæðan fyrir því að einungis einn af sjö þingmönnum Miðflokksins væri kona. Hins vegar var aðeins ein kona valin oddviti í sínu kjördæmi innan flokksins.

Leynilega fjármagnaðar auglýsingar

Leynilega fjármögnuð auglýsingSkatta glaða skatta Kata var ein af nafnlausum auglýsingum á netinu sem beint var gegn Vinstri grænum.
ÁróðursmyndbandÍ myndbandinu er Viðreisn meðal annars nefnd vinstri flokkur.

Í umræðum um kosningabaráttuna hefur verið gagnrýnt að gríðarlega umfangsmiklum auglýsingaherferðum, fjármögnuðum af óþekktum aðilum, hafi verið beint sérstaklega gegn andstæðingum Sjálfstæðisflokksins, að Vinstri grænum, Viðreisn, Pírötum og Samfylkingu, til dæmis frá Facebook-hópnum Kosningar 2017, sem neitar að gefa upp aðstandendur sína. Einnig var kosningum beint gegn Sjálfstæðisflokknum, á nýrri Facebooksíðu, Kosningavaktin.

„Netmiðlarnir gera þetta töluvert auðveldara, að ráðast að fólki,“ sagði Bjarni í Silfrinu, en beindi orðum sínum að fjölmiðlum, sem hann telur hafa fjallað of mikið um hneykslismál.

„Þeir elska skandala.“

„Ég held að fjölmiðlarnir verði líka að taka aðeins til sín í þessari umræðu. Þeir elska skandala. Þeir elska eitthvert rosalegt uppþot. Og að hlaupa á milli með míkrafónana. Og ég get alveg sagt að mér fannst sumir fjölmiðlar, fyrir þessar kosningar, bara tapa sér í stemningunni yfir næsta skandal. Og það kemur svona heilt yfir betra jafnvægi á þetta. Þegar öllu er á botninn hvolft eru það persónuleg tengsl milli fólks sem ráða því hvort menn geta haldið stjórn á þessu landi. “

Eigandi Morgunblaðsins gagnrýnir „neikvæða pressu“

Þá sagði annar sjálfstæðismaður, Eyþór Arnalds, í Silfrinu að skoða þyrfti fjölmiðlana í kjölfar kosningabaráttunnar. „Það er ekki nóg að tala bara um nafnlausu auglýsingarnar,“ sagði Eyþór. „Heldur er umræðan í heild rosalega rætin. Því miður er það þannig að reynslan hefur sýnt að neikvæðar auglýsingar virka betur en jákvæðar. Það er mjög leiðinlegt. Og ekki bara auglýsingar, heldur neikvæðar fréttir selja meira. Og þess vegna er slúðurpressa, neikvæða pressa, og ráðist á manninn.“

Eyþór varð í vor kjölfestufjárfestir í Árvakri, útgáfufélagi Morgunblaðsins, þegar hann keypti 26,6 prósenta hlut með ótilgreindri fjármögnun. Hann tók sæti í stjórn útgáfufélagsins í byrjun mánaðarins. 

Leiðari Morgunblaðsins: „Árásir sorpmiðla“

Í Morgunblaðinu, sem er í ritstjórn Davíðs Oddssonar, fyrrverandi formanns Sjálfstæðisflokksins til 14 ára, eru fjölmiðlar uppnefndir „sorpmiðlar“ í leiðara um kosningarnar. „Eftir ótrúlegar árásir sorprita og Ríkisútvarpsins á flokksformanninn í aðdraganda kosninga bentu kannanir til að Vinstri grænir stefndu í stórsigur og fast að 30 prósentum atkvæðanna... En flokkurinn tapaði kosningabaráttunni með óskiljanlegum hætti. Ekki þurfti hann að sitja undir árásum sorpmiðla og Ríkisútvarpsins. Öðru nær. Silkihanskar settir upp við öll tækifæri.“

„Ekki þurfti hann að sitja undir árásum sorpmiðla“

Leiðarinn er nafnlaus, en höfundur leiðara er jafnan talinn ritstjórinn, Davíð Oddsson.

Ólína Þorvarðardóttir, fyrrverandi þingmaður Samfylkingarinnar, sagði í Silfrinu að stjórnmálaflokkarnir hlytu að bera ábyrgð á nafnlausum niðurrifsauglýsingum á samfélagsmiðlum og annars staðar netinu, sem fjármagnaðar eru með leynilegu fé. „Hverjir hagnast á þessu?“ spurði hún.

Athugasemdir

Allar athugasemdir eru ábyrgð á þeirra sem þær skrifa. Stundin áskilur sér rétt til að fjarlægja ærumeiðandi og óviðeigandi athugasemdir.

Mest lesið í dag

Fréttir

Sósíalistar vilja afnema greiðslur slökkviliðsins til borgarstjóra

Fréttir

Bróðir Hauks handtekinn fyrir að flagga tyrkneska fánanum á Stjórnarráðshúsinu

Blogg

Hættum að bregðast Hauki

Blogg

Píp Trumps um viðskipahalla og fleira

Úttekt

Laun íslenskra bæjarstjóra hærri en í erlendum stórborgum

Pistill

Að búa í glerhúsi

Mest lesið í vikunni

Pistill

Hjúkrunarfræðingur: „Landspítalinn er í frjálsu falli“

Fréttir

Bankastjóri Landsbankans þiggur boðsferð á heimsmeistaramótið í Rússlandi

Fréttir

Hagnaður ISS dróst saman en hluthafar fengu 760 milljóna arð

Pistill

Krakkafréttir - hin raunverulega ógn mannkyns?

Fréttir

Sósíalistar vilja afnema greiðslur slökkviliðsins til borgarstjóra

Úttekt

Einkavæðingin í heilbrigðiskerfinu: 20 ára saga í máli og myndum