Sjálfstæðisflokkurinn er sá stjórnmálaflokkur sem fékk veglegustu styrkina frá handhöfum fiskveiðikvóta í aðdraganda Alþingiskosninganna 2016. Þetta má lesa úr útdráttum úr ársreikningum stjórnmálaflokka sem Ríkisendurskoðun birti í dag. 

Alls styrktu kvótahafar stjórnmálaflokka um rúmar 16 milljónir árið 2016, en mikil og hávær umræða stóð þá yfir um uppboð fiskveiðiheimilda og gjaldtöku í sjávarútvegi.

Aðeins tveir stjórnmálaflokkar töluðu gegn hvers kyns hugmyndum um uppboð fiskveiðiheimilda fyrir síðustu þingkosningar, Sjálfstæðisflokkurinn og Framsóknarflokkurinn. Sömu tveir flokkarnir fengu hæstu styrkina frá þeim fyrirtækjum sem hafa yfir fiskveiðiheimildum að ráða þetta ár. 

Hér má sjá yfirlit yfir fjárstyrki útgerðarfélaga til stjórnmálaflokka árið 2016:

Sjálfstæðisflokkurinn fékk 6,8 milljónir frá kvótahöfum sem er litlu hærri upphæð en árið á undan. Alls hafa handhafar fiskveiðikvóta þannig styrkt flokkinn um 27 milljónir frá árinu 2013. 

Framsóknarflokkurinn fékk 4,8 milljónir og hefur samtals fengið 22,3 milljóna styrki frá kvótahöfum frá 2013. Hér má sjá yfirlit yfir styrki útgerðarfélaga til Sjálfstæðisflokksins og Framsóknarflokksins á árunum sem flokkarnir sátu í ríkisstjórn, 2013 til 2016.

Framlög kvótahafa til Sjálfstæðisflokksins frá 2013:

Framlög kvótahafa til Framsóknarflokksins frá 2013:

Lækkuðu veiðigjöldin og fengu 50
milljóna fjárstyrki frá útgerðinni

Styrkveitingar útgerðarfyrirtækjanna til umræddra flokka eru ekki nýjar af nálinni. Á árunum 2008 til 2011 fengu Sjálfstæðisflokkurinn og Framsóknarflokkurinn rúmlega tífalt hærri fjárframlög frá fyrirtækjum tengdum sjávarútvegi en allir aðrir flokkar til samans. Sjálfstæðisflokkurinn fékk þá 23 milljónir og Framsóknarflokkurinn 11 milljónir, en á sama tímabili beittu flokkarnir sér af hörku gegn því að hróflað yrði við íslensku fiskveiðistjórnunarkerfi og gjaldtöku í sjávarútvegi. Þetta birtist í eindreginni andstöðu við upphafleg áform vinstristjórnarinnar um innköllun og endurráðstöfun aflaheimilda, upptöku sérstaks veiðigjalds og stjórnarskrárbreytingarnar sem miðuðu m.a. að lögfestingu þjóðareignarákvæðis um auðlindir.

Frá 2013, árinu sem flokkarnir settust saman í ríkisstjórn, hafa flokkarnir fengið tæplega 49 milljóna fjárstuðning frá handhöfum fiskveiðikvóta. Eitt af fyrstu verkum ríkisstjórnarinnar sem tók við völdum árið 2013 var að breyta og lækka sérstaka veiðigjaldið og létta þannig um 40 milljarða króna fjárhagsbyrðum af útgerðinni yfir kjörtímabilið. Ríkisstjórnin vann einnig að lagabreytingum þar sem til stóð að gera langtímasamninga við handhafa kvótans og úthluta tíu stórum útgerðarfyrirtækjum 90 prósent alls makrílkvóta til sex ára án endurgjalds, en málin fengu ekki framgöngu á þinginu.

2 milljónir til Vinstri grænna

Eins og Stundin hefur áður greint frá fengu Vinstri græn 2 milljónir frá útgerðarfélögum í fyrra, sem er miklu hærri upphæð en flokkurinn fékk árin á undan, og Viðreisn aðeins 800 þúsund krónur.

Í gögnunum sem birtust á vef Ríkisendurskoðunar í dag kemur fram að Samfylkingin fékk 1,8 milljónir frá kvótahöfum en Píratar og Björt framtíð ekki neitt. Hér má sjá yfirlit yfir heildarframlög einstaklinga (þ.m.t. félagsgjöld) og lögaðila til stjórnmálaflokka í fyrra.