Pistill

Fjallkonan 2017

„Veistu ekki hver ég er?“

Þau virða fyrir sér fjallið og þegja.

Karlinn snýr sér að stúlkunni til að segja:

„Þú verður að flýta þér að kjósa,

áður en það fer að gjósa.“

Hún virðir hann fyrir sér:

„Veistu ekki hver ég er?“

 

Ég er sú sem hafði hátt

og rauf þar með samfélagssátt

um það sem ég mátti við una

svo lengi sem elstu konur muna

 

Ég er Hallgerður Langbrók

með brennandi vanga

ég er vinnukonan sem var tekin til fanga

Ég er barn borið út í hríðarbyl

ég er brotaþoli í drekkingarhyl

Ég er k a f l a s k i l

því ég er hætt að finna til

smæðar minnar

 

Nú hef ég hátt,

því ég var aldrei smá

hvorki nú né þá

 

Ég er valkyrja með spenntan boga,

geng hnarreist gegnum vítisloga,

Ég er sjálf fjallkonan, ástfangin af dáta

ég er úrhrak sem get ekki hætt að gráta

því ég er Kanamella með barn undir belti

send í útlegð með harðneskju og svelti

 

Ég er Bríet að heimta að stelpur læri að synda

svo þær geti synt á móti straumnum, til að mynda

 

Ég er komin til að sjá og sigra

miklu stærri andstæðinga en Sigurjón digra

Ég er með heiminn mér að fótum

eins og Aníta Hinriks

á heimsmeistaramótum

 

Ég er frambjóðandinn Vigdís

í félagsskap karla.

„Kynbundið misrétti? Varla, varla.

Konur fá völd ef eftir því er sóst.

En hvernig ætlarðu að vera forseti með bara eitt brjóst?“

 

Ég er kvennafrídagurinn 1975

ég er konan sem kyndir ofninn þinn

Ég er Björk Guðmunds og Salka Valka

Ég er barin kona með brotinn kjálka

Ég er lesbían sem þú reyndir að kenna

að karlmaðurinn væri gjöf guðs til kvenna

 

Ég er Reykjavíkurdóttir og Tyrkja-Gudda

ég er píka og tussa og bredda og budda

Hent út af Facebook, þögguð og bönnuð

því hann er jú saklaus uns sekt er sönnuð

 

Höfum hátt

um kjaftæði og karlrembublæti

og ásakanir um „stelpupussulæti“

Bitch please, láttu mig í friði

Heldurðu að þú vitir eitthvað um mannasiði?

 

Ég á mig sjálf og er alger drusla

Berbrjósta á netinu að valda usla

ég er samstaða og styrkur

sem mun aldrei fyrnast

ég er Birna

sem var svo lengi að finnast

og við ætlum að minnast

fyrir æviveginn sem hún gekk,

en ekki endalokin sem hún fékk.

 

Ég er framtíðin, ég er næsta stig,

og ég skil vel að þú óttist mig

því ég er bálið sem verður af litlum neista

Þegar níðingur fær æru sína uppreista

 

Ég er óhrædd að berjast

á hverjum fokking degi.

 

Hann svarar smeykur: „Það er það sem ég segi.

Flýttu þér nú að kjósa,

áður en það fer að gjósa.“

 

Brosið á vörum hans er frosið þegar hún segir:

Skilurðu þetta ekki ennþá?

 

Ég er gosið.

Athugasemdir

Allar athugasemdir eru ábyrgð á þeirra sem þær skrifa. Stundin áskilur sér rétt til að fjarlægja ærumeiðandi og óviðeigandi athugasemdir.

Mest lesið í dag

Fréttir

Kölluð kellingartussa og negri

Viðtal

„Neita að eyða allri ævinni í að vinna fyrir einhvern steinkassa“

Fréttir

Slys hjá Arnarlaxi: Eldiskví með um 500 tonnum af laxi sökk í Tálknafirði

Viðtal

Keypti brúðarkjól og bað Guð um mann

Listi

Fimm réttir úr fortíð og nútíð

Fréttir

Helga Vala skoraði á Alþingi að aflétta leyndinni tafarlaust – Jón: „Dæmigerð popúlistauppákoma“

Mest lesið í vikunni

Fréttir

Vilhjálmur fékk 3,4 milljónir endurgreiddar – Þingmenn hæðast að umræðunni

Fréttir

Stjórnun kynferðisbrotadeildar ábótavant – Sigríður skipti yfirmanni út fyrir stjórnanda með minni reynslu af rannsókn kynferðisbrota

Fréttir

Kölluð kellingartussa og negri

Pistill

Karlar að spara okkur pening

Fréttir

Ferðaþjónustubændur í máli við Íshesta

Fréttir

Borgarstjórinn vísaði Eyþóri Arnalds af fundi í Höfða