Auglýsingin hverfur eftir stutta stund...
Loka

Fréttir

Forsætisráðherra skammaði 18 ára pilt: „Alveg ótrúlega ómerkilegt“

„Þetta er ekkert nema áróður þetta Borgunarmál,“ sagði Bjarni Benediktsson forsætisráðherra um sölu á eignarhlut Landsbankans í Borgun. Hluturinn var seldur í lokuðu söluferli og á undirverði til frænda hans. Hann sakaði verzlunarskólanema um „ótrúlega ómerkilegan áróður“ fyrir framan samnemendur hans á kosningafundi í skólanum í dag.

Bjarni Benediktsson forsætisráðherra sakaði 18 ára pilt um „ótrúlega ómerkilegan áróður“ eftir að hann minntist á Borgunarmálið og skipun dómara við Landsrétt í pallborðsumræðum sem fram fóru í sal Verslunarskóla Íslands í dag.

Menntaskólaneminn spurði Bjarna eftirfarandi spurningar: „Í kjölfar stjórnarslita hafa sjálfstæðismenn talað mikið um hvað hinir svokölluðu smáflokkar á Alþingi hafi lítið bakland og þar af leiðandi mikilvægi þess að kjósa flokka með alvöru rætur. En eru það samt sem áður ekki hið sterka bakland Sjálfstæðisflokksins og hagsmunaárekstrar tengdir því sem hafa komið flokknum í sífelld vandræði, t.d. í Borgunarmálinu og Landsréttarmálinu?“

Bjarni brást harkalega við spurningunni og sakaði piltinn um ómerkilegheit. „Að taka Borgunarmálið sem dæmi um það að það sé eitthvað að í baklandi Sjálfstæðisflokksins er alveg ótrúlega ómerkilegt, fyrirgefðu, alveg ótrúlega ómerkilegt,“ svaraði Bjarni. 

„Það hefur hvergi nokkurs staðar komið fram ein einasta vísbending um að Sjálfstæðisflokkurinn, ég sem fjármálaráðherra eða einhver sem vann í stjórnkerfinu hafi reynt að hafa áhrif á niðurstöðu í því máli. Þess vegna er þetta ótrúlega ómerkilegur áróður sem þú ert að flytja hérna inn í salinn um það mál.“

Sem kunnugt er snerist Borgunarmálið um að Landsbankinn seldi hlut sinn í félaginu Borgun á undirverði og í lokuðu söluferli til frænda Bjarna Benediktssonar sem var fjármálaráðherra á þeim tíma. 

„Þetta er ekkert nema áróður þetta Borgunarmál, það er engin innistæða fyrir öllum stóru orðinum. Ég verð bara að fá að verja mig fyrst menn ætla að taka það hérna upp og nota það gegn mér. Þetta er ómerkilegt,“ sagði Bjarni.

Þá vék Bjarni að Landsréttarmálinu, en nýlega komst Héraðsdómur að þeirri niðurstöðu að Sigríður Á. Andersen dómsmálaráðherra hefði ekki farið að lögum við skipun dómara í Landsrétt, nýtt dómsstig. „Landsréttarmálið er síðan allt annað mál. Það hefur bara  farið sína leið og nýlega féll dómur í því þar sem öllum kröfum þeirra sem stefndu var hafnað,“ sagði Bjarni.

„Þú kemur hérna talar við hóp af ungu fólki og kallar einn þeirra ómerkilegan.“

Björt Ólafsdóttir, starfandi umhverfisráðherra og frambjóðandi Bjartrar framtíðar, gagnrýndi Bjarna fyrir orð hans í garð menntaskólanemans. „Í fyrsta lagi verð ég bara að viðurkenna að ég verð pirruð Bjarni, þegar þú kemur hérna talar við hóp af ungu fólki og kallar einn þeirra ómerkilegan. Mér finnst það ómaklegt, við erum að tala um pólitík og við skulum bara gera það almennilega,“ sagði hún. Síðar á fundinum áréttaði Bjarni að hann hefði ekki verið að kalla drenginn ómerkilegan heldur verið að vísa til efnisins sem hann spurði um. 

Hér má sjá myndband af málfundinum í heild sem birtist á Facebook-síðu Málfundafélags Verslunarskólans.

Athugasemdir

Allar athugasemdir eru ábyrgð á þeirra sem þær skrifa. Stundin áskilur sér rétt til að fjarlægja ærumeiðandi og óviðeigandi athugasemdir.

Mest lesið í dag

Fréttir

Húsleit á Arnarnesinu hjá fiskútflytjanda úr Panamaskjölunum: „Ég hef ekkert að fela“

Fréttir

Lofgrein um Davíð í Morgunblaðinu á skjön við Rannsóknarskýrsluna

Fréttir

Sveinbjörg um þéttingu byggðar: „Höfum misst bæði hundinn okkar og köttinn okkar“

Fréttir

Tryggvi Þór og Friðjón könnuðu aðstæður til raforkuframleiðslu í Dölunum fyrir GAMMA

Fréttir

Listi Roberts yfir stúlkur er enn til - lögregla hefji aftur rannsókn á kynferðisbrotum hans

Fréttir

Margt helsta áhrifafólk landsins fagnaði með Davíð

Mest lesið í vikunni

Viðtal

Þakklátur fyrir þessa lífsreynslu

Úttekt

„Ekki kominn tími til að ég brenni allar veraldlegar eigur mínar“

Fréttir

Skýrsla Hannesar rituð á ensku – „Ótækt“ segir formaður íslenskrar málnefndar

Fréttir

Húsleit á Arnarnesinu hjá fiskútflytjanda úr Panamaskjölunum: „Ég hef ekkert að fela“

Fréttir

Umboðsmaður fór fram á að ráðuneytið leiðrétti villandi svör

Pistill

VG framlengir tuttugustu öldina