Fréttir

Seldi tveimur dögum eftir fund um „með hvaða hætti ríkisstjórnin getur komið að lausn vanda bankanna“

Bjarni Benediktsson fundaði með Lárusi Welding þann 19. febrúar 2008 og seldi hlutabréf í Glitni upp á 119 milljónir dagana á eftir. Efni fundarins er lýst í tölvupósti milli Glitnismanna, en Bjarni hafnar því að þar hafi verið fjallað um stöðu Glitnis.

Bjarni Benediktsson forsætisráðherra segir að engin tengsl séu á milli fundarins með Lárusi Welding, bankastjóra Glitnis, þann 19. febrúar 2008 og sölu sinnar á hlutabréfum í bankanum tveimur dögum síðar þann 21. febrúar. 

Þetta kemur fram í viðtali við Bjarna á Mbl.is. Þar fullyrðir hann jafnframt að á fundinum með Lárusi hafi ekki verið spurt um „stöðu Glitnis og hvernig bankinn stæði fjárhagslega“. 

Tölvupóstsamskipti sem Stundin hefur undir höndum benda til þess að fundurinn – sem Bjarni og Illugi Gunnarsson, þáverandi þingmaður sem var jafnframt stjórnarmaður í Sjóði 9, áttu frumkvæði að – hafi snúist um „vanda bankanna“ og hvernig heppilegast væri að ríkisstjórn Íslands kæmi til móts við slæma stöðu þeirra. Á þessum tíma hafði svokölluð súper-ráðherranefnd ríkisstjórnarinnar þegar fengið upplýsingar sem bentu til grafalvarlegrar stöðu fjármálakerfisins. 

„Ég þarf að fara á fund með Illuga Gunnarssyni, Bjarna Ben o.fl. vegna tillagna um með hvaða hætti ríkisstjórnin getur komið að lausn vanda bankanna. Fundurinn er að þeirra frumkvæði og boða þeir forstöðumenn bankanna,“ segir í tölvupósti Ingólfs Heiðars Benders, þáverandi forstöðumanns Greiningardeildar Glitnis, til Jóhannesar Baldurssonar sem var framkvæmdastjóri markaðsviðskipta bankans á þessum tíma. 

„Ég þarf að fara á fund með Illuga Gunnarssyni, Bjarna Ben o.fl. vegna tillagna um með hvaða hætti ríkisstjórnin getur komið að lausn vanda bankanna“

Verð á hluta­bréfa­mörkuðum hafði lækkað umtalsvert frá áramótum auk þess sem myndast hafði lánsfjárskortur á alþjóðafjármálamörkuðum. Hins vegar var ekki á almannavitorði hver stærðargráða vandans var.  

Að því er fram kemur í skýrslu rannsóknarnefndar Alþingis um bankahrunið áttu þáverandi forsætisráðherra, fjármálaráðherra og utanríkisráðherrafund með bankastjórn Seðlabankans þann 7. febrúar 2008 þar sem Davíð Oddsson seðlabankastjóri dró upp ,,mjög dökka mynd af stöðu og framtíðarhorfum íslensku bankanna“. Upplýsingarnar bentu til yfirvofandi hættu fyrir íslenskt efnhagslíf,“ segir í skýrslu rannsóknarnefndar.

Opinberlega kvað við jákvæðari tón. Þannig kom t.d. fram í Þjóðhagsspá Glitnis frá febrúar 2008 að uppbygging bankakerfisins á undanförnum hefði „gert það mun sterkara og áhættudreifðara“ og að það væri „þannig mun betur í stakk búið nú en áður til að taka á vandamálum sem nú blasa við á erlendum lánsfjármörkuðum“. 

Bjarni Benediktsson hefur ekki viljað ræða við Stundina um viðskipti sín, en í samtali við Mbl.is segir Bjarni meðal annars:

„Á fund­in­um með Lár­usi Weld­ing þá sát­um við Ill­ugi og vor­um að velta fyr­ir okk­ur hvaða aðgerða stjórn­völd gætu mögu­lega gripið til, til þess að bregðast við og auka til­trú á markaðnum. Við listuðum það upp í Morg­un­blaðsgrein hvað það var sem við teld­um að gæti komið að gagni. Við vor­um ekki mætt­ir þarna til að spyrja um stöðu Glitn­is, hvernig hann stæði fjár­hags­lega. Við vor­um mætt­ir þarna til að ræða það hvað við gæt­um gert til að styrkja stöðu ís­lenska fjár­mála­kerf­is­ins.“ 

Þá hafnar hann því alfarið að sala hlutabréfa hans í Glitni hafi tengst fundinum með Lárusi Welding og bendir á að hlutabréfamarkaðir hafi verið búnir að lækka hressilega frá áramótum á þessum tíma. 

Gögn sem Stundin hefur unnið úr í samstarfi við Reykjavik Media og The Guardian sýna að Bjarni seldi bréf sín í Glitni dagana 21. til 27. febrúar. Hann seldi fyrir rúmlega 119 milljónir króna í fimm viðskiptum en hélt eftir bréfum sem voru rúmlega 3 milljóna króna virði samkvæmt viðskiptayfirliti hans. 

Athugasemdir

Allar athugasemdir eru ábyrgð á þeirra sem þær skrifa. Stundin áskilur sér rétt til að fjarlægja ærumeiðandi og óviðeigandi athugasemdir.

Mest lesið í dag

Pistill

Áskorun um #strákahitting

Leiðari

Óvinir valdsins

Fréttir

Bjarni um viðskipti með Sjóvá sem fóru til saksóknara: „Mér líst mjög vel á þetta mál“

Pistill

Þorum við að vera við?

Fréttir

Fékk nóg af hagræðingartali ráðherra: „Við erum hér alla daga að reyna gera okkar besta“

Fréttir

Sagðist sjálfur hafa greitt skuldirnar sem faðir hans yfirtók

Mest lesið í vikunni

Fréttir

Lögbann á frekari umfjöllun um viðskipti forsætisráðherra

Fréttir

Faðir Bjarna Benediktssonar greiddi upp skuldir hans vegna áhættuviðskipta

Pistill

Það sem Sjálfstæðisflokkurinn vill ekki að þú vitir um húsnæðismál

Pistill

Áskorun um #strákahitting

Pistill

Baráttan við TR-kerfið – mig grunaði aldrei hversu niðurlægjandi hún yrði

Leiðari

Óvinir valdsins