Fréttir

Forsætisráðherra ranglega skráður stjórnarmaður hjá ISS

Bjarni Benediktsson er kynntur sem einn af stjórnarmönnum ræstingarfyrirtækisins ISS Ísland ehf. í upplýsingum sem fylgja ársreikningi félagsins fyrir árið 2016. ISS er í eigu félaga föður og föðurbróður forsætisráðherra og bróðir hans er jafnframt stjórnarmaður í félaginu sem gert hefur hagstæða samninga um þrif í ráðuneytum og opinberum byggingum.

Bjarni Benediktsson Var áður í stjórn ISS, þegar hann var þingmaður. Mynd: Pressphotos

Bjarni Benediktsson forsætisráðherra var skráður sem einn af stjórnarmönnum ræstingarfyrirtækisins ISS Ísland ehf í upplýsingum með ársreikningi félagsins fyrir árið 2016. ISS sér um þrif hjá ráðuneytum og fjölda opinberra stofnana og er í eigu félaga föður og föðurbróður forsætisráðherra.

Guðmundur Guðmundssonframkvæmdastjóri ISS á Íslandi

Guðmundur Guðmundsson, framkvæmdastjóri ISS, segir að fyrirtækjaskrá hljóti að hafa gert mistök ef skráningin sé með þessum hætti, enda séu mörg ár síðan Bjarni hætti í stjórninni. 

„Bjarni er frændi minn og var í stjórninni, en ég held að hann hafi hætt árið 2006 eða 2007,“ segir Guðmundur. Aðspurður hvernig standi á því að Bjarni sé samt tilgreindur sem einn af stjórnarmönnum félagsins á reikningsárinu 2016 segir Guðmundur: „Það er algjört bull, einhver vitleysa. Þetta hljóta að vera einhver mistök hjá firmaskrá því við höfum alltaf tilkynnt um breytingar á stjórn.“

Faðir og föðurbróðir Bjarna keyptu félagið

ISS er langstærsta ræstingarfyrirtæki á Íslandi og var í eigu danska félagsins ISS Facility Services A/S þar til fyrr á þessu ári þegar eignarhaldsfélagið Sandur ehf. keypti allt hlutafé þess. Samkvæmt skráningu á vef Creditinfo er Sandur alfarið í eigu Benedikts Einarssonar, sonar Einars Sveinssonar sem er föðurbróðir forsætisráðherra.

Benedikt Sveinssonfaðir forsætisráðherra er einn af eigendum ISS á Íslandi.

Í ákvörðun Samkeppniseftirlitsins frá 6. apríl síðastliðnum þar sem kaup Sands á ISS Íslandi ehf. voru samþykkt, kom fram að stefnt væri að því að Sandur yrði í eigu þriggja hluthafahópa; í fyrsta lagi Hafsilfurs, félags Benedikts Sveinssonar, og P126, félags Einars Sveinssonar; í öðru lagi erlendra fjárfesta og í þriðja lagi yrðu stjórnendur félagsins sjálfir hluthafar. Kaupin gengu eftir og Fréttablaðið greindi frá því þann 8. maí síðastliðinn að ISS væri komið í meirihlutaeigu félaga Benedikts og Einars Sveinssona. 

Í upplýsingum með ársreikningi ISS Íslands ehf. fyrir reikningsárið 2016 eru tveir Íslendingar tilgreindir sem stjórnarmenn í félaginu, þeir Bjarni Benediktsson forsætisráðherra og Ingimundur Sigurpálsson, forstjóri Íslandspósts. Guðmundur segir hins vegar að hvorugur þeirra hafi verið í stjórn félagsins á reikningsárinu.

„Ég hafði ekki rekið augun í þetta, en ég skil ekki hvers vegna það ætti að vera. Þetta hljóta að vera einhver mistök hjá firmaskrá því við tilkynnum alltaf um breytingar. Ingimundur hætti í stjórninni árið 2010 eða 2011, og þegar Bjarni sneri sér alfarið að stjórnmálum þá sagði hann sig úr öllu svona og hætti í stjórn ISS.“ Guðmundur segir hugsanlegt að gleymst hafi að fella út fyrri stjórnarmenn þegar upplýsingablaðið var útbúið, en í ársreikningi fyrir árið 2015 eru þó hvorki Bjarni né Ingimundur skráðir.

Greiddu sér 800 milljóna arð

Um 500 manns starfa hjá ISS. Hagnaður ársins 2016 eftir reiknaða skatta nam 172,6 milljónum og samþykkti stjórn félagsins að greiða hluthöfum hæsta mögulega arð, eða 800 milljónir króna. Í skýrslu stjórnar kemur fram að sökum markaðsstærðar geri ISS ekki ráð fyrir frekari vexti innan hreingerningarþjónustu. Hins vegar verði lögð áhersla á frekari sókn á sviði veitingaþjónustu. „Má gera ráð fyrir því vöxtur félagsins innan þeirrar greinar komi til með að leiða vöxt félagsins í heild á komandi árum,“ segir í skýrslunni. 

Eins og Stundin greindi frá í sumar hefur ISS að undanförnu tekið yfir matreiðslu máltíða fyrir leikskóla- og grunnskólabörn á höfuðborgarsvæðinu. Heilbrigðiseftirlitið hefur gert margvíslegar athugasemdir við starfsemina, svo sem hvað varðar hreinlæti, rekjanleika og innra eftirlit í eldhúsi ISS, meðal annars vegna myglu. Að því er fram kemur í skýrslu stjórnar hyggst félagið vera leiðandi á sviði veitingaþjónustu næstu árin. „Á sviði veitingaþjónustu hafa margir smáir aðilar verið ríkjandi á markaðinum, en gera má ráð fyrir að einhver samþjöppun verði á þessum markaði sem leiðir til færri en stærri samkeppnisaðila. Félagið ætlar sér að vera leiðandi á þessum markaði.“ 

Starfsmannamál „erfiðari viðureignar“ vegna hagvaxtar

Fram kemur að félagið muni koma til með að njóta góðs af hagvexti í efnahagsmálum og almennum vexti fyrirtækja á næstu árum, en hagvöxturinn geti hins vegar gert það að verkum að starfsmannamál hjá fyrirtækinu verði erfið. „Hagvöxtur gerir það hins vegar að verkum að starfsmannamál verða erfiðari viðureignar á því sviði er félagið starfar,“ segir í skýrslu stjórnar. 

„Hagvöxtur gerir það hins vegar að verkum að starfsmannamál verða erfiðari viðureignar á því sviði er félagið starfar“

Virði samninga milli ISS og íslenska ríkisins nema á þriðja hundrað milljóna króna, en félagið sér meðal annars um þrif í utanríkisráðuneytinu, velferðarráðuneytinu og atvinnuvega- og nýsköpunarráðuneytinu, á Landspítalanum. í Flugstöð Leifs Eiríkssonar og húsnæði lögreglunnar á höfuðborgarsvæðinu og Tollstjóra. Samkvæmt upplýsingum sem birtar eru á hinum nýopnaða vef opnirreikningar.is greiddu fyrrnefnd ráðuneyti ISS samtals 3,4 milljónir fyrir þjónustu í ágústmánuði. 

„Allir opinberir samningar sem við erum með hafa farið í gegnum Ríkiskaup,“ segir Guðmundur, framkvæmdastjóri ISS, í samtali við Stundina. „Þetta er opið og gegnsætt ferli þar sem hagkvæmasta verð ræður.“ Hann tekur skýrt fram að þótt Bjarni hafi verið í stjórn félagsins fyrstu árin hafi hann aldrei komið nálægt rekstrinum. Samkvæmt tilkynningu ISS sem barst ríkisskattstjóra þann 11. maí er Jón Benediktsson, bróðir forsætisráðherra, nú í stjórn hjá ISS á Íslandi. Stundin sendi forsætisráðherra fyrirspurn í morgun þar sem spurt var hvort hann kynni skýringar á því að hann væri tilgreindur sem stjórnarmaður ISS og hvort hann hefði komið með einhverjum hætti að starfsemi félagsins undanfarin ár.

Athugasemdir

Allar athugasemdir eru ábyrgð á þeirra sem þær skrifa. Stundin áskilur sér rétt til að fjarlægja ærumeiðandi og óviðeigandi athugasemdir.

Mest lesið í dag

Fréttir

Dæmdur fyrir hrottalega nauðgun gegn þroskahamlaðri konu – fékk uppreist æru í fyrra

Fréttir

Geir Jón skrifaði meðmæli fyrir nauðgara sem hann rannsakaði

Fréttir

Sveinn segir söguna alla: „Okkur fannst þessi tengsl mjög skrítin“

Fréttir

Brynjar kemur fyrir í gögnunum sem áttu að fara leynt

Fréttir

Brynjar settur af sem formaður stjórnskipunar- og eftirlitsnefndar

Fréttir

Júlíus Vífill veitti lögmanni meðmæli

Mest lesið í vikunni

Fréttir

Hjalti fundaði með Bjarna og Brynjari eftir að hann var kærður

Fréttir

Dæmdur fyrir hrottalega nauðgun gegn þroskahamlaðri konu – fékk uppreist æru í fyrra

Fréttir

Geir Jón skrifaði meðmæli fyrir nauðgara sem hann rannsakaði

Pistill

Þessi ótrúlegi óheiðarleiki

Pistill

Karlmaður í kventíma

Fréttir

Faðir forsætisráðherra var meðmælandi Hjalta – ráðuneytið hélt því leyndu